Les Pages Jèrriaises

La Bouonne Nouvelle s'lon Jean

Chapitre 14, vèrsets 1-14



Né vos troubliez pon l'esprit; ou criyiz en Dgieu, criyiz étout en mé.

Y'a hardi d'appartéments dans la maîson à man Péthe; si ché n'tait pon l'cas, j'vos l'éthais dit. J'm'en vais vos prépather la pliaiche;

et quand jé s'sai hors, et qué j'vos éthai prépathé la pliaiche, j'èrveindrai, et vos prendrai auve mé, à seule fîn qué iou qu'jé s'sai, ous y séyiz étout.

Et ou savez bein où'est qué j'm'en vais, et ous en savez lé c'mîn.

Thomas lî dit: Seigneu! jé n'savons pas où'est qu'tu t'en vas; et coumme tchi qué j'pouôrrêmes en saver lé c'mîn?

Jèsû lî dit: Mé, j'sis lé c'mîn, la véthité et la vie; pèrsonne né veint au Péthe qué par mé.

S'ou m'connaîssêtes, ou connaîtrêtes man Péthe étout; et achteu ou l'connaîssez, et ou l'avez veu.

Ph'lippe lî dit: Seigneu, mouontre-nous l'Péthe, et n'en v'là tchi s'sa assez pouor nous.

Jésû lî dit: "Ph'lippe, j'ai 'té auve té d'pis bein longtemps, et tu n'm'as pon connu, té! Lé chein tchi m'a veu a veu l'Péthe. Pouortchi don dithe, mouontre-nous l'Péthe?

Ch'est-i' qu'tu n'crai pon qué j'sis dans l'Péthe et l'Péthe est en mé? Les patholes qué j'vos dis, jé n'les dis pon d'mé-même; et l'Péthe tchi d'meuthe en mé est l'chein tchi fait tout chein tch'a 'té fait.

Criyez-mé, j'sis dans l'Péthe, et l'Péthe est en mé; ayiz la fouai en mé viyant chein tch'a 'té fait.

Véthe, véthe, j'vos l'dis, l'chein tchi crait en mé f'tha tout bouonnement d'même qué j'fais, et il en f'tha d'miyeurs car mé, j'm'en vais siez man Péthe.

Et tout chein qu'ou d'mand'dez en man nom, j'lé f'thai, à seule fîn qu'lé Péthe sait glorifié dans l'Fis.

S'ou d'mandez autcheune chose en man nom, j'lé f'thai."
 

 

La Bouonne Nouvelle s'lon Jean, Chapitre xiv: 2.

Jésu dit, dans la Maison d'man Péthe l'y'a plusieurs démeuthes. J'm'en vais vouos prépather lé lieu.
 

Viyiz étout:

 

Les Pages Jèrriaises