V'là tchi vînt un houmme, tch'avait 'té env'yé par l'Bouôn Dgieu, tch'avait nom Jean. V'là tchi vînt pouor lé têmouongnage, à seule fîn d'têmouongni entouor la leunmiéthe, pouor qué touos pûssent craithe par li. Li, i' n'tait pon la leunmiéthe, mais à seule fîn d'têmouongni entouor la leunmiéthe...
Et né v'chîn coumme tchi qu'Jean têmouongnit quand les Juis envyîdrent des prêtres et des Lévites dé Jérusalem à l'achîtrer atout la tchestchion, "Tchi qu'tu'es?" Et i' n'ânionnit pon mais dit bein cliaithement, "Ch'n'est pon mé, l'Christ." Et i' lî d'mandîdrent, "Tchi don? Ch'est-i' qu'tu'es Elie?" Et i' dit, "Jé n'sis pon li." "Ch'est-i' qu'tu'es chu prophète-là?" Et i' rêponnit, "Nânnîn-dgia." Épis i' lî dîdrent, "Tchi qu'tu'es don? J'avons à en rapporter la rêponse ès cheins tchi nos ont env'yé. Tchi don qu'tu dis qu'tu'es?" I' dit, "J'sis la vouaix du chein tchi brait dans lé d'sèrt: Griyiz lé c'mîn du Seigneu, coumme lé prophète Esaie l'dit." Les cheins tch'avaient 'té env'yés v'naient des Pharisiens. et i' lî tchestchionnîdrent coumme chennechîn, "Pouortchi don qu'tu bâptîse si tu n'es ni l'Christ ni Elie ni chu prophète?" Jean lus rêponnit, "J'baptîse, mé, atout l'ieau: mais y'en a d'parmi vous qu'ou connaîssiz pon; ch'est li tchi veint auprès mé tch'est avanchi l'avant à mé, dé tchi l'lachet d'saûlé jé n'méthite pon d'dêlachi." Et tout chennechîn s'adonnit à Bethannie d'l'aut' bord du Jourdain où'est qu'Jean 'tait à bâptîsi.
 

Lé lend'main Jésû eut un affit pouor aller en Galilée. Il achîtrit Ph'lippe et lî dit, "Vé-t-en m'siéthe." Ch'est en tchi Ph'lippe 'tait d'Béthsaïda, la ville à André et Pièrre. Ph'lippe achîtrit Nathanaël et lî dit, "J'l'avons dêmuchi! Lé chein entouor tchi qu'il' êcrivîtent, Moïse, dans la louai, et les prophètes: ch'est Jésû d'Nazareth, fis Joseph." "Nazareth!" dit Nathanaël. "Ch'est-i' pôssibl'ye qué d'tchi bouôn veinge dé Nazareth!" Ph'lippe lî dit, "Vé-t-en l'vaie!" Jésû vit Nathanaël tchi s'en appréchait et lî dit, "N'en v'là-t-i' pon un bouôn Israélite sans sifèches!" Nathanaël lî dit, "Dé ioù qu'tu m'connais?" Jésû rêponnit, "D'vant qu'Ph'lippe t'achîtrîsse, j't'avais veu souos l'fidgi." Nathanaël lî rêponnit, "Maît', tu'es l'Fis dé Dgieu, tu'es l'Rouai d'Israël!" Jésû lî rêponnit, "As-tu la fouai d'pis qué j'té dis qué j't'avais veu souos l'fidgi? Tu'en vèrras d'tchi pus grand qu'chennechîn." Et i' lî dit, "Véthe, j'vos dis qu'ou vèrrez l'ciel tchi s'ouvre et l's anges du Bouôn Dgieu à monter et d'valer sus l'Fis d'l'houmme."