Au c'menchement y'avait la Pathole, et la Pathole d'meuthait auve lé Bouôn Dgieu, et la Pathole 'tait l'Bouôn Dgieu.

Chette-là 'tait au c'menchement auve lé Bouôn Dgieu,

Toutes choses lus pâssîtent par lyi, et sans lyi rein né s'pâssit, pas même eune seule chose tchi s'pâssit.

En lyi y'avait la vie, et la vie 'tait la leunmiéthe ès hoummes,

et dans la nièrcheu la leunmiéthe lithait, et la nièrcheu n'l'appèrchévait pon.

V'là tchi vînt un houmme, tch'avait 'té env'yé par l'Bouôn Dgieu, tch'avait nom Jean.

V'là tchi vînt pouor lé têmouongnage, à seule fîn d'têmouongni entouor la leunmiéthe, pouor qué touos pûssent craithe par li.

Li, i' n'tait pon la leunmiéthe, mais à seule fîn d'têmouongni entouor la leunmiéthe.

Chette-chîn 'tait la vraie leunmiéthe, tch'êcliaithe châque houmme en v'nant au monde.

Dans l'monde ou 'tait, et par lyi l'monde avait 'té fait, et l'monde n'l'èrconnut pon.

Ès siens ou vînt, et san peupl'ye à lyi n'l'èrchut pon.

Mais à touos les cheins tchi l'èrchûtent ou donnit l'autorité d'dév'nîn d's êfants du Bouôn Dgieu - ès cheins tchi criyaient en san nom

et tchi fûtent nés, pas du sang, ni d'la volanté d'la chai, ni d'la volanté d'un houmme nitout, mais du Bouôn Dgieu.

Et la Pathole dévînt la chai, et d'meuthait siez nous, remplyie d'grâce et d'véthité, et j'vînmes sa glouaithe, eune glouaithe coumme au seul êfant d'un péthe.