Le Ménage ès Feuvres,
St. Ouën.
Lé 6 d'août, 1977.
Moussieu l'Rédacteu,
Dépis m'n arrivée en Jèrri ch't' année, j'ai pâssé un tas d'temps à liéthe les gâzettes des preunmièrs mais d'l'année, et j'vai dans ieune dé ches-là qué l'fanmeux navithe à vailes C.R.C. (pour Collas, Robîn et Compangnie) fut bâti à St. Mâlo. J'dis fanmeux car il 'tait bein connu dans man janne temps, et j'tais hardi întérèssi dans les navithes viyant qué man Papa Giffard avait 'té Cap'taine et qu' Papa L'Feuvre, ouaithe qu'étant forgeux et fétheux dé j'vaux d'vocation avait navidgi étout. J'crai bein qu' un tas des jannes d'à ch't heu n'ont même pon veu un navithe à vailes.
Lé C.R.C. eune bèrquentinne dé deux chent trente-huit tonnieaux, fut bâti pour les Robîns y'a septante-chînq ans. Ch'tait Cap'taine T. C. Bréhaut tch'allit le ramâsser à St. Mâlo et tchi fut san preunmié Cap'taine. Ch'tait un mangnifique navithe qué j'ai veu maintes fais dans la caûchie quand j'allais en ville auve Papa. La brigantinne Dawn, dans tchi P'pèe et M'mèe et mes fréthes Sydney et John Giffard s'en fûdrent à Paspédgia en avri, 1901, appartenait ès Robîns étout. Oulle avait 'té bâtie à La Pointe St. Pièrre, près d'Malbaie à La Côte. Ou fut êventuellement naufragie dans la grève dé l'île dé St. Pièrre, des îles dé St. Pièrre et Miquelon, mais jé n'sai pon tch'est tch'est dév'nu du C.R.C. Ché s'sait bein întérêssant d'dêcouvri l's histouaithes et la fîn dé touos ches bouans vièrs navithes à vailes qué nouos anchêtres ont navidgi partout l'monde dans lus temps.
Il' taient longtemps en mé, ches navithes là. I' prenait d'habitude un mais à aller à La Côte. En 1946, j'fis la travérsée dé Tèrre-Neuve à Prestwick, en Ecosse, dans huit heuthes dans un avion Lancaster Bomber du Royal Air Force tch'avait 'té convèrti pour porter huit pâssagièrs dans san bomb bay - et j'tais iun des huit. À ch't heu, nou fait l'viage dé l'Améthique à Londres dans chîntch' heuthes, et l'avion Concorde l'fait dans trais heuthes et d'mie dé Londres à Washington. Né v'la l'progrès!
Mais l'progrès nouos a apporté d'aut' choses qué dé viagi en vitesse en faîsant san c'mîn avau l's années, et il a amorti, ensév'li et entèrré la trantchilité d'la paisibl'ye vie du temps jadis. À m'n idée, lè changement n'est pon pour lé mus.
Jé n'peux quâsi craithe mes ièrs quand j'lié dans la gâzette entouôrre lé vandalisme tchi s'pâsse dé s'maine en s'maine en Jèrri. Ch'est vrai qué ch'n'est pon seulement en Jèrri qué v'la tchi s'adonne. Et ch'n'est pon seulement l'vandalisme tchi pathaît êt' l'ordre du jour. La gâzette est plieine d'histouaithes dé vols, d'ivrouangn'nie, d'assauts, même d'assauts sus la police, dé vacâbonn'nie, et à ches drein même dé pouangnardéthies par des jannes tch'ont acouo les talons jaunes. Et hardi d's assauts sont par des jannes contres des grand' pèrsonnes dans les rues d'la ville la niet. Nou s'attend d'vaie d'ité dans les grandes villes en Améthique. Mais en Jèrri? Ch'est încriyabl'ye!
V'la tchi montre qué chutte mauvaîtchi est eune maladie d'la vie modèrne d'au jour d'aniet, et qué hardi d'la cause est lé manque dé controle par les pathents sus lus êfants. Iun des troubl'yes, sustout en Améthique, est qué péthe et méthe ont à travailli pour gangni assez pour acater toutes les c'modités d'la vie actuelle - motos, télévisions, machinnes à laver et à stchi, et machinn'nies d'toutes les sortes - et qu' les mousses sont laîssis à lus ramâsser du mus tch'i' peuvent, et sans la disciplinne tch'est si nécessaithe dès lus p'tits jours pour engendrer la bouanne condite et l'bouan caractéthe.
Quant au vandalisme, tch'est tch'est lé r'miède? Quand i' iut tchestchion d'former eune Cour pour la jannèche en Jèrri, j'mentionnis dans ieune dè mes lettres qué ches cours là n'avaient pon ieu grand succès en Améthique viyant qu' la grand' partie n'étaient pon sévéthes assez. En général, les jannes malfaiteurs étaient renv'yes souos les soins des pathents tchi promettaient d'en souangni. Et jé n'crai pon tch'i' sont sévéthes assez en Jèrri. J'vai par des lettres dans la gâzette tch'i' y'a des gens tchi sont dé m'n avis qu' la badgette dév'thait êt' en usage pour cachi un mio d'avis dans la couenne dé ches jannes malfaiteurs. Et j'ai tréjous pensé qué la miyeu manniéthe dé l's arrêter est d'faithe les pathents payi pour les d'gâts. V'la tchi n'pathaît pon les gêner d'vaie lus mousses en embarras auve les autorités, mais si v'la tchi touchait lus pouchettes ché s'sait aut' affaithe!
George d'La Forge
Viyiz étout: