Le Ménage ès Feuvres,
St. Ouën.
Lé 30 d'août, 1975.
Moussieu l'Rédacteu,
Nou pâle d'aver la tête cratchie, mais quand des malfaîteurs font du mêché en Jèrri viyant qu' iun d'lus anmîns (ou sembliabl'ye) a 'té condâmné à peine dé prison en Angliétèrre, nou peut dithe tch'i' l'ont, la tête cratchie, et tch'il' ont l'esprit biscâsié en mème temps. Viyant qu' un nommé Davis est en prison en Angliétèrre, ses anmîns, tchi disent tch'il est innocent, veinnent d'endommagi et coper les pneus d'eune chentaine dé motos à St. Aubîn dans la niet d'sanm'di ou dînmanche pâssés. Pouv'-ous m'dithe tchi y'a autcheune raîson là d'dans? Et la gâzette nouos dit qu' les motos 'taient dans les pars en drièthe dé la Salle Parouaîssiale, et tch'i' y'en avait en d'vant étout, et sus L'Boulevard. Et y'a eune stâtion d'police au côté d'la Salle Parouaîssiale et i' faut penser tch'i' y'avait un agent d'police dédans toute la niet et i' n'en vit rein. J'pense bein tch'il a à sé t'nîn près du téléphone dans s'n office en cas d'appel toute la niet, mais lé fait qué du mêché peut s'faithe si près d'li sans tch'i' s'en appèrchéve est preuve tch'il en faut iun à marchi les c'mîns étout. Ches malfaîteurs ou vandales dév'thaient êt' peunnis sévéthement s'i' sont attrapés, car i' sont à faithe des frais à un tas d'pèrsonnes tchi sont absolûment înnocents d'aver iun rein à faithe auve l'emprisonnement d'un îndividu en Angliétèrre. Et i' lus mettent du rang des terroristes Arabes tchi font mêché un mio partout pour attither l'attention mondial à lus problèmes en Mouoyen Orient. Hélas! Comme lé monde est boulevèrsé d'nouos jours, dans eune êpoque dans tchi j'sommes supposés êt' si êcliaithis. À m'n idée, il est grand temps d'tchitter à pouloter les malfaîteurs et dé rêtablyi la peine dé mort.
J'viyais dans la gâzette qué les Parisiens n'considéthent pon Jèrri comme étant idéal pour lus vacanches viyant tch'i' craient qu' san clyînmat est mouoilli et fraid, et iun d'nouos grosses têtes pathaît craithe qué nou dév'thait dêpenser un tas d'sou à mett' des affiches partoute la France pour lus faithe à saver qu' Jèrri est l'pays du solé. Eh bein, i' faut admettre qué ch'est bein l'cas ch't' année, mais j'ai connu un tas d'êtés tch'étaient actuellement mouoillis et fraids, et j'sis d'avis qu' nouos autorités touristiques dév'thaient aller douochement dans l's annonces au sujet d'Jèrri ensoleilli. Autcheune pèrsonne tch'a viagi dans l'Pacifique Sud né pens'sait pon à compather nouot' clyînmat au chein d's îles dans chutte mé là. Mais, quand j'y pense, est-ch' nécessaithe dé dêpenser un tas d'sou pour am'ner acouo pus d'êtrangièrs ichîn en êté quand j'sommes dêjà accâbliés par la foule tchi veint touos l's ans? Pourtchi êt' si gourmands?
Un aut' item dans la gâzette dé mardi nouos dit qué deux soudards Jèrriais fûdrent bliessés viyant qué l'patron d'eune aubèrge en France avait tithé sus ieux. Ch'tait-i' pon à Paris? L'explyicâtion d'iun d'ieux 'tait tch'i' y'avait ieu du tîntamarre dé tchique sorte dans l'aubèrge où'est qu' eune dgiêxaine dé ieux avaient entré pour un booze up! Acouo eune preuve qué la béthie n'paie pon, prîncipalement quand i' faut goudaler la quantité voulue pour constituer un booze-up!
Et nouos r'vélà à la tchestchion du brancage. La gâzette nouos dit qué Moussieu l'Connêtabl'ye L'Mèrquand d'St. Pièrre a changi s'n idée au sujet d'l'aver les deux preunmié s'maines dé juîn. Il est d'idée, à ch't heu, qué ch'dév'thait êt' les deux dreines sémaines dé mai. N'étant pon fèrmyi, j'n'ai pon d'opinnion au sujet, mais j'ouîyais tout pliein d'objections siez les fèrmiers, à cause du manque dé la main d'oeuvre, quand y'avait tchestchion d'l'aver les deux preunmié s'maines dé juîn. J'n'ai autcheune idée, au moment actuel, tch'est tch'i' pensent au sujet d'l'aver dans l'mais d'mai. Ché s'sa întérêssant d'vaie tch'est qu' les membres campangnards en dithont quand l'affaithe veindra d'vant L's Êtats.
J'disais y'a tchique temps qu' j'avions quâsi autant d'Avocats comme dé pigeons dans La Rue ès Trais Pigeons en ville, mais j'vai qu' j'en avons acouo un nouvieau - Moussieu Richard Francis Valpy Jeune, fis du Sénateu Jeune. J'lî souhaite bouanne chance et tout pliein d'clients. Étant l'fis d'san péthe, tchi s'est si bein distîndgi dans La Société des Gens de Droit de Jersey et dans L's Êtats, il est seux d'aver un supèrbe av'nîn dans la profêssion d'san chouaix.
Quant à mé, jé s'sai en France quand chuttre lettre pathaîtra dans la gâzette, et j'm'en vais y'être tout l'mais d'septembre. Né séyiz don pon surprîns s'ou n'viyiz pon eune lettre dé mé toutes les s'maines dé chu mais là. Mais j'pens'sai en vous quand mème, car mes pensées viagent en Jèrri n'înmporte où'est qué j'sis!
George d'La Forge
Viyiz étout: