|
J'voudrais bein savé t'chesque j'ai fait Pour être si soudainement meins d'côtet, Pour eune anneaie de temps; j'tais aimai de tous Et quand v'nait la fein, n'ou m'ergardet de d'sous. Quand la premièthe fais parmi l'pubblique j'arrivi, Je fut le beinv'nu et très bein atcheullyi, Dans les grandes familles t'chet t'chquest qui m'vêrret l'premi Et après châtcheun m'ergardet avec plaisi. Tout l'monde sait bein que je sis sourd et muet Et quoique chonna à des milles personnes j'ai paslé. Je sait bein que plusieurs m'ont ergardet et pâsset lus opinion, Mais je sis trantchille et content, et j'nen ait pas entendu un son. J'étais tant aimé, y m'portaient dans lus mains, Dans la tchuiezeine, les salons, jamais j'man sis piaîns. Quand y voulaient sçavé pour la leunne ou l'soleit, J'lus disaient quand yieun ou l'aoutre se l'vait et s'kouochet. N'ou m'consulte pour les grandes, et les p'tites matheaies, J'donne einformation pour quand les vraics sont coppeaies. Pour les fêtes, les saisons, les pianettes et êclipses, Pour poste, télégraphe et Cour Ecclésiastique. Pour les jours de Naissances de la famille Royale, Pour les Banques, les Etats et la Cour Royale, Pour toutes les rentes, pour les faithes de la Manche, J'vos donne tout chonna, et pus; un an d'avanche. Pour douze longs mais, j'étais tréjous prêt: A donné toute l'einformation que j'pouvais. En m'ergardant où pouvaîtes tout d'suite sçavé, Ouè-que vos pathens et anmeins sont à d'meuthé. Ministres, Docteurs, Dentistes et autres, Eglyises, Chapelles, "Mission Rooms," et tant d'autres, Des p'tites histoèthes en français et jerriais, Qui sont faites avec piaîzi, et t'chiques fais sont vraies. Quand la préchaine année esça arriveaie, Je sçai meins sus l'ais, chest la ma destineaie. Nou m'ettra d'côtet comme un vieir chappé, Comme en m'disant j'nai pas d'autres besoin de té. Chest bein souvent d'même que nos anmeins nos laisse, Y vaient d'nouvieaux visages qui souvent lus pliaîze, Au lieu de resté fidèles pour toute la vie, Et prendre l'exempyïe du yièrru qui j'amais n'varie. - Mais qui s'attache contre arbres où murailles fermement, Comme pour chimenté, où joindre un vieir bâtiment. Adieu: Vieir Almanach te v'la meins d'côtet, Tout chein que tu nos as dit ne sça pas oubliet. Georgie |
Viyiz étout: