Moussieu l'Editeu,
Hier au sé, la Merrienne et mé j'nos mîmes à pâslé d'plusieurs choses. Nos v'là tout près d'Nouë, et tout près étout d'la fin de notre vieille Chronique, chen tchi veur dithe qu'ou ne s'sa pas là pour publié la lettre que j'écris toutes les s'maines. Touos les deux j'en avons grand r'gret, et j'avions à craithe étout que dans la Campagne y y'a ocquo bein d'bouons viers Jêrriais tch'y manq'thont la lettre. J'ai tréjous tâchi d'la faithe intérêssante et amûsante par bordée, sans faithe de ma à pérsonne. Y'a huit ou neuf ans que la preumièthe pathut, il est pourtchi j'en ai êcrit au mains quatre chents, et quand j'n'ai pas tait bein, la Merrienne s'y'est minse et a fait d'san mûs. D'vant la fin d'l'année j'éspèthe de pouvé êcrithe ocquo yunne ou deux articlyes, car y faut absolûment souhaité un Bouon Nouë et une Bouonne Année à nos amins et ès messieux tch'y nos gouvernent.
Quand la Merrienne liut que l'Comité d'Agritchultuthe avait tait mint à la porte, ou m'dit qu'ou s'y'attendait, et qu'ou n'comprenait pas pourtchi qu'le Sieur Baal et ses collègues n'avaient pas donné lûs démission pûstot qu'd'être forchie de l'faithe. “Ch'est tout bein bouon d'être têtoigne,” ou s'fit, “mais nou peut poussé chonna trop lien.”
“Je crais, Merrienne,” j'l'y dit, “tch'ils éspethaient ocquo qu'la majôrité des membres, étant des gens d'bouon tchoeur, lûs pardoun'naient lûs bêtises et les gardethaient en office, lûs dîsant comme j'ai oui l'Baillyi Vernon dithe pûs d'une fais: “à tout pêcheur miséricorde!" Jusqu'au dernié moment un homme comme le Sieur Du Feu et tan couôsin l'Sénateur Dorey avaient ch't'idée-là ou au mains y s'attendaient à une p'tite mâjorité d'un bord ou d'l'autre.”
“Ch'est pôssiblye,” ou s'accordit, “mais ach'teu, Ph'lip, tchèsque tu crais du nouviau Comité? F'tha-t'y mûs que ch't'îchin?”
“Eh bein, Merrienne,” j'l'y dit, “ch'est une chose que l'temps ditha, mais au mains y'a d'bouons Jèrriais dans l'nouviau lot.”
“Et pourtchi deux membres d'la Ville?” ou d'mandit. “Le Sieur Rumfitt et l'Sieur Cronshaw ont'y jamais mâté une bouaite de patates ou trait une g'niche après san preumié viaud?”
J'm'êgouffit d'rithe, Moussieu. “J'en doute hardi” j'l'y dit, “mais si fallait des r'présentants d'la Ville sûs l'Comité, ch'est p't'être là les deux miyeurs, et ch'n'est pas yeux tch'y f'thont des diffitchultés pour le Président.”
“Je sais bein tchèsque tu'as dans l'idée,” ou dit. “Ch'est que si les choses ne vont pas au goût du Sénateur Le Mérquand, il étha bein vite tchiquechose à dithe.”
“J'n'ai jamais connu un Mérquand de tch'y qu'nou n'éthait pas deut dithe la même chose,” j'l'y dit. “Si jamais y'a yeu une famille tch'avait la langue bein pendue ch'est chette-là. Mais je crais vraiement que chutte fais notre “J.J.” étha pûs d'avis, et si l'Président peut l'pérsuadé que djais heuthes du matin pour une rêunion n'est pas onze heuthes et d'mie, y n'y'a pas grand'chose à craindre.”
“Bon,” ou dit, “mais y'a une autre chose que j'voudrais té d'mandé, Ph'lip. Ch'est au sujét d'chais bêtes tchi futes dêtruites. Peux-tu m'dithe...?”
“La seule chose que j'peux t'dithe, Merrienne,” j'interrompit, “ch'est de taithe ta béque. As-tu fait touos les podins et toutes tes gâches?”
“Oui,” ou dit, “mais chein tchi m'fait dêpié ch'est que je n'avons pas tâchi d'faithe un mio d'nier-beûrre. J'ai gouôté le nier-beûrre tchi fut fait à Springfield et j'trouve tch'il est un mio trop amiérti. P't'être tch'y y'avaient mint du liquorice et l'avaient bouollyi trop longtemps. Je s'y seuze que j'éthais peut faithe aussi bein, ou même mûs.”
“Ma pouôre femme,” j'l'y dit, “toute ta vie tu'as creu qu'tu pouvais faithe mûs qu'autchune autre pérsonne. J'l'ai gouôté étout mé, chu nier-beûrre et y n'est pas mauvais. Au mains y n'est pas brûlé comme y 'tait ichin la dernié fais qu j'en fîmes.”
“Y n'tait pas brûlé du-tout,” ou dit. “Ch'tait t'imaginâtion, et tu'en mangeais deux ou trais fais par jour. Ach'teu il est temps d'allé nos couochi.”
Ph'lip.
1959
Viyiz étout:
