Ch'tait Mêcredi passé que pathu le prumi numétho de not'e gâzette souos san nouveau titre de “Les Chroniques de Jersey” et “La Rédaction” adresse à ses lecteurs un brillant articlye intitule “L'Union fait la Force,” un articl'ye qui fait honneur au sien qui l'a êcrit.
Mais, par la négligence du Rédacteur ou de tchique autre membre de l'administration qui dev'thait souogni d'ches choses là, notre prumi numétho a 'té absolument désécré par l'inclusion de l'articlye à Piteur Pain dans tchi qu'i' s'est permins d'maudithe touos les siens qui l'avaient abandonné dans s'n êlection.
Quant ès insultes qu'il a lanchi à la tête à Laïesse Bilo, Freinque Podèstre et Cliem Ernon, je n'm'en otchupe pas, je laisse à ches messieux là de lus d'fendre comme bouan lus sembliétha, mais dame! Je n'peux pas li permettre d'attachi l'Caouain, comme nou dit en français, “impunément,” comme il a fait dans s'n articlye de Mêcredi, sans riposte de toutes mes forches.
J'en ai grand r'gret, mes chiers lecteurs, je sais bain que je c'menchons mal en ayant du hèrtchin dans les prumiers numéthos des “Chroniques” si v'là qui continue je s'sons bétôt aussi piéthe comme nos contemporains angliais, mais ch'n'est pas ma faute, ch'est Pain qu'a c'menchi, et je sis persuadé qu'ou perdethiez bain vite le respect qu'ous avez tréjous ieu pour le Caouain si ch'est qu'i' s'laissait vilipender par un ex-forgeux de chu calibre-là.
Sans l'vouler, v'là un individu qui m'fait oquo un assez joli complîment quand i' dit que ch'est mé qu'est la cause qu'i' n'a pas 'té mins Juge. Si ch'est qu'ch'est d'même, l'île toute entchiéthe devethait m'en être bain erconnaissante car de chu coup-là en aithait-che 'té une calamite!! La modestie m'empêche quâsiment de publier tch'est qu'était la vraie position du moment que Moussieu Orange se décidi de n'se porter pas candidat. Si je l'fais, ch'est simpliément pour prouver au public et à Piteur Pain qu'i' n'fut pas seulement tchestion d'li pour un instant.
V'là qu'avait c'menchi à l'occasion du discours êloquent de l'Avocat Perrotchet dans la célèbre cause du “Caouain v. le Chef de la Chronique” (qui fut rapporté tout du long dans la pouorre défunte “Chronique” l'été passé et qui 'tait tellement important qui fut r'produit dans san dernier Almanâ) quand les autorités réalisirent que la race ouaîseline n'était pas appréciée ni respectée comme ou dev'thait l'être, i' firent la resolution qu'i' r'pathethaient chenna à la prumiéthe opportunité.
Eh bain, ch'tait à l'occasion de la vacance, iun d's autres jours, sus l'banc d'justice que l'opportunité s'présenti. Nou dit comme chenna: J'avons le chouaix de deux ouaîsiaux. I'y a d'abord la Caouain, de tchi la sagesse et la capacité sout connues par tout l'monde, et pis, en cas de r'fus, i'y a l'Rossigno, qui n'li dait pas grand'chose.
Pour des raisons dans tchi qu'i' n'est pas besoin d'entrer acheteu, le Caouain s'êffachi en faveur du Rossigno, et fis san possiblye pour li en usant de s'n influence pour qu'i' fusse êlu sans opposition.
Bilo, Podèstre et Compagnie eurent pus d'avis que de s'faithe motchi au public en mettant Piteur Pain sus les rangs et ils eurent bain raison d'abandonner la partie. Sans doute, nou sait bain qu'il est frouaîssi. V'là qu'a une telle ambition! Mais, par exemple, faut pas qu'il êprouve à insulter ses supérieurs! Mé, jaloux? L'insolent qu'il est, d'aver l'audace de compather ma fille avec sa grosse bourrique! Et de s'glorifier que sa femme peut chanter pus haut que Marie Hibou! J'admets bain, mon doux, que Marie Hibou n'est pas chanteresse, mais qu'Piteur amène sa Laizé jusque dans l'Vièr Marchi pour se m'suther avec Marie, et j'garantis que dans mains d'deux minutes chette-chin vos la mettra d'sorte qu'ou ne r'chant'ta pas d'cantiques pour une fichue volée!
Et pis je sis jaloux qu'il a fait san d'vé dans les tranchies?
Vaithe, je crai bain que j'en s'sais jaloux si j'étais convaintchu qu'i' y avait jamais 'té, mais, jusqu'acheteu je n'avons qu'sa pathole à chu sujet-là et sa pathole vaut... Eh bain tch'est qu'ou vant? Pouvons me l'dithe?
Caouain
1917
Viyiz étout: