Moussieu l'Editeu,
Hélas! chutte fais ch'n'est pas bonjour ou bonsouair, ch'n'est pas “à bétôt,” ou même, “à la préchaine!” Nan, Moussieu, ch'est “Adieu,” car chutte léttre ichin est la draine que j'vos êcrithai, et pour la raison que chutte bouonne vieille gâzétte de “Les Chroniques de Jersey” pathaîtra chutte s'maine pour la dérnié fais. Que ch'est triste!
J'tiomes à en pâslé hier au sé, la Merrienne et mé, assis aupi d'notre feu, et ch'tait la bouonnefemme tch'y qu'menchit. “Y fallait s'y'attendre,” ou dit. “Aut' fais ch'tait du jêrriais partout l'ile, et du français dans l's'Etats et dans la Cour Royale et la P'tite Cour, mais quand vint l'jour que la langue angliaise fut introduite dans l's'Etats, ch'tait le qu'mench'ment d'la fin. Même dans nos boutiques au jour d'agniet, le jêrriais est presque inconnu. Y'a tchiques s'maines quand, dans la Rue d'Drièthe je d'mandit à la drinétte d'l'autre côté du conteux pour une qu'minse de molleton et tchiquechose d'autre que je n'm'en vais pas mentionné, en rouoge laine, oulle me r'gardit comme si j'tais un anima sauvage, et sinon pour un jeune homme tch'y pâssait et tch'avait 'tait bein êdutchi, j'éthais yeu à chérchi ailleurs.”
“R'venant à la gâzétte,” j'l'y dit, “te r'souveins-tu que quand j'tiomes jeunes y' y'avait plusieurs gâzéttes en français?”
“Oui,” ou dit, “par éxemplye y y'avait la Vieille Chronique et la Nouvelle Chronique tch'y s'entre insultaient toutes les s'maines.”
“Y'en avait d'autres,” j'l'y dit. “J'me r'souveins d'avé ouï les vieilles gens pâslé du Constitutionnel et d'la Voix des Iles, et d'autres que j'ai oublié. Chien que j'trouve drôle, Merrienne, ch'est que l'français est ocquo la langue officielle de l'île. Nou m'a dit que ch'est parsque touos les vièrs contrats et les dotchuments officiels étant en français, nos êcrivains et avocats, sans pâslé des Officiers d'la Cour et des Etats n'pouôrraient pas fonctionné s'y n'comprenaient qu' l'angliais, mais j'ai dans l'idée que y'en a hardi d'yeux tch'y s'saient bein contents si ch'n'tait pas d'même.”
“Si ch'tait mé,” ou s'fit, “je f'thais touos chais jeunes avocats pâssé un examen en chinouais d'vant pouvé pratitchi, et nou n'en vêrrait pas tant. Y nos en veint d'pûs en pus, et si chonna continue y n'y étha bétôt pas d'run dans la Cour Royale pour le publyic.”
Après chonna, Moussieu, j'nos mîmes à pâslé d'la Nouvelle Année et j'crut tchi 'tait temps d'annoncé ma grande surprinse.
“Ecoute, Merrienne,” j'l'y dit, “y faut qu'tu m'accate une neuve pliume, car j'éthai ocquo d'l'êcrituthe à faithe.”
“Bon,” ou s'fit, “et à tchi qu'tu t'en vas êcrithe ach'teu qu'tu'as fini avec Les Chroniques? J'ai ouï que l'Douard Le Bro est en train d'êcrithe ses mémouaithes; voudrais-tu, par chance, t'y méttre étout? Si ch'est d'même tu'en éthas d'pûs d'une sorte à raconté et j'doute hardi qu'tu pouôrras trouvé pérsonne avec le couothage de publié l'histouaithe de ta vie.”
“Nânin, Merrienne,” j'l'y dit, “que l'Bouan Dieu m'prêserve de faithe patheille bêtise. Ch'n'est pas chonna du-tout, mais d'vant que j'te diche tchèsquechais y faut qu'tu dans l'armouaithe.”
“Oh!” ou s'fit, “et pourtchi chonna?”
“Parsque,” j'l'y dit, “y faut bèthe, té et mé, à la santé d'l'Evening Post.”
Ou me r'gardit pour une bouonne démié-minute, épis: “J't'avais dit,” ou s'fit, “que tu but trop d'santés Vendredi et qu'tu paiethais pour. Je crais qu'tu f'thas mûs d'allé t'couochi.”
“Eh bein,” j'l'y dit, “si ch'est d'même je n'te dithai rain et tu n'dormithas pas d'niet, car la tchuthiôsité t'gardetha êvillyie. Ach'teu fais comme tu voudras.”
J'n'ai pas vêtchu toutes chais années avec la bouonnefemme, Moussieu, sans la connaître, et je n'me trompais pas chutte fais. Après une pôse la v'là tch'y s'lêve et ramâsse la bouteille et deux vêrres. “Ach'teu,” ou dit, “éxplique-mé, Ph'lip, pourtchi chutte santé à la Post?”
“La raison, ma vieille,” j'l'y dit, “est que qu'menchant la s'maine tchi veint mes articlyes s'en vont pathaître dans la Post. Comme chonna j'éthai des lecteurs partout l'monde, par éxemplye au Canada en Australie, à la Nouvelle Zélande, en Afrique et en bein d'autres pays ouèsque y'a des Jèrriais domiciliés. J'ai veu l'propriêtaithe d'la gâzétte, le Sieur Harrison, et ch'est décidé. Ach'teu, veur-tu bèthe la santé d'la Post?”
Ou l'vit san vêrre. “Oui, man Ph'lip, et d'bouon tchoeu, car je s'y bein contente. Une Bouonne Année à la Post et à touos nos amins ichin et ailleurs!”
Et Moussieu, comme chonna, la Nouvelle Année s'en va qu'menchi raide bein pour Ph'lip et sa Merrienne.
Ph'lip.
1959
Viyiz étout:
