Le Ménage ès Feuvres,
St. Ouën.
Lé 10 d'août, 1968.
Moussieu l'Rédacteu,
Eune chose qué j'ai souvent r'mèrtchi est tch'i' y'a un tas d'monde tchi craient tch'il éthaient fait mus dans la vie s'il' avaient chouaîsi eune difféthente vocâtion ou un aut' mêtchi. J'avais un oncl'ye - i' n'est pus, l'pouorre baloque - tchi m'disait tréjous: Si j'm'en 'tais allé à La Côte, à la pliaiche d'êt' bête assez dé m'mathier, j'n'éthais p't êt' pon l'nez sus la meule à ch't heu! Y'a tout lieu d'craithe tch'i' sé s'sait mathié à La Côte s'i' y'avait 'té, mais pour li, resté à d'meuther et travailli en Jèrri jusqu'au jour dé san décès, ch'tait tréjous la pensée qu'un homme avait l'chouaix du mathiage ou d's'en aller houors-pays. Il avait eune bouanne femme, pourtant!
La chose en est qu'les jannes tchi s'en allaient au Cannada pour les Robîns ou les Boutillièrs ou les Fruïngs à l'âge dé dîsons treize ou quatorze ans, èrvénaient en Jèrri auprès lus apprentissage chînq ou siex ans pus tard pâsser deux-s'trais mais siez lus gens dévant lus en r'aller à La Côte. Comme nou peut s'y attendre, i' r'vénaient habilyis comme au Dînmanche, atout eune blianche quémînse et eune dgène emb'sée, et un dû chapé sus la tête, et, endueurchis par la fraid d's hivièrs à Paspédgia et à Barachouais ou à Gaspé, il' 'taient forts comme des capestes, et quand i' racontaient l's histouaithes dé lus vie d'aventuthe là-bas, ch'est naturel dé penser tch'i' faîsaient un mio d'lus tchian et faîsaient l'affaithe pathaître pus pliaîsante qu'ou' n'l'était en rêalité! Actuellement, i' n'avaient pon un tas d'sou dans lus pouchettes, viyant qu'les chînquante louis accordés pour les chînq ans d'apprentissage 'taient quâsi deus à lus maison d'conmèrce pour habits et fournituthes dans l'couothant des chînq ans. Mais les jannes hommes restés siez ieux en Jèrri n'savaient pon touos ches dêtails-là, et viyant iun d'lus âge à s'promener touos les jours atout ses habits du Dînmanche sus l'dos les faîsait penser tch'il' éthaient deu aller à La Côte étout!
Touos les cheins tchi s'y en allaient, à La Côte, né r'vénaient pon. S'i' n'taient pon trop robustes, la fraid d's hivièrs là-bas n'lus faîsaient pon d'bein. Y'en avait tchi souffraient d'la conseumption et tchi mouothaient là, et y'en avait tchi r'vénaient en Jèrri et tch'y pâssaient l'pas. Y'avait bein pus d'gens tchi mouothaient d'la conseumption dans chu temps-là tch'i' n'y en a à ch't heu. Y'en avait, étout, tchi lus mathiaient auve des Canadgiennes-Françaises et n'èrvénaient janmais en Jèrri viyant tch'il' avaient d'grand' fanmiles à êl'ver, et tch'il' avaient changi d'réligion. Et y'en avait tchi s'mathiaient parmi les Canadgiens-Français mais tchi restaient Anglyicans, comme lé Sieur Charles Powell dé La Pointe, à St. Ouën. I' math'yit Marie Boutin à La Grand' Rivièthe, mais i' restit Anglyican et Franc-Machon jusqu'à la fîn d'ses jours. Quand j'vais tréjous vaie san tombé dans l'chînm'tchièthe dé l'églyise Anglyicane dé St. James.
En fîn d'compte, j'pense bein qu'ch'est naturel dé sé d'mander si nou-s-éthait fait mus d'adopter eune aut' vocation, mème quand nou-s-a joui d'un mio d'succès dans la vie. Mais l'destîn - ou les circonstances - vouos jouent des farces! Quant à mé, j'éthais deu êt' forgeux - comme touos m's anchêtres. Man nom mème dé fanmile est v'nu du mot latîn pour forgeux. Et j'ai tréjous gardé un bouan souv'nîn des heuthes passées dans la forge auve man p'pèe et man papa. Mais quand i' mouothit, man papa (man p'pèe 'tait à La Côte par chu temps-là), dans sa souoxante-septième année, j'n'avais qu'douze ans et j'm'en fus d'meuther siez ma tante et marraine à La Mouaie, à St. Brélade. Ou' criyait qué j'tais trop d'licat en santé pour apprendre la vocation d'forgeux, et ou' fît d'sorte qué j'îthais dans eune office et gangni ma vie atout eune plieunme et du papi à la pliaiche d'un marté et eune enclieunme! J'n'en 'tais pon fort en peine dans l'temps. Ouaithe qué j'n'avais pon 'couo quatorze ans, j'avais dêjà apprîns l'diton Jèrriais tchi nouos dit qu'ch'est l'ouaîsé tchi n'a qu'eune plieunme tchi vole lé pus!
Il a passé hardi dg'ieau par La Corbièthe dépis chu temps-là, et L'Bouan Dgieu m'a 'té bouan. J'en ai fait d'toutes les sortes mais j'n'ai pon volé pèrsonne atout ma plieunme, ouaithe qué l'papi n'a janmais r'fusé l'encre qu'oulle a griffouôilli d'ssus! Et mé v'la à griffouôilli du Jèrriais pour la gâzette sus mes vièrs jours!
J'éthais-t-i' fait mus d'êt' forgeux? Tch'est tchi sait? J'y pense dans des temps, à tout chen'na, quand j'sis à reunmînner à man tout seu en Améthique, et i' m'veint à l'idée qu'ch'est au mains pliaîsant d'penser qu'j'éthais passé ma vie à la forge où'est qué j'fus né, et qu'j'éthais vêtchu toute ma vie parmi les gris-ventres dé man vaîsinné et qu'j'éthais connu et féthé lus j'vaux jusqu'au temps tch'il' ont 'té rempliaichis par des machinnes dé tchi la forche est m'suthée en j'vaux à tchi tch'i' n'èrsemblient pon! N'împorte! J'sis acouo...
George d'La Forge
Viyiz étout: