Les Pages Jèrriaises

Un p'tit siez sé vaut mus qu'un siez l's aut's




Jé n'sis pon hardi contente, mé, pa'ce qué j'ai 'té à jouer eune gamme bein connue – la batâle des bâtisseurs et la femme ménâgéthe. Dé couôteunme, i' n'y'a pon deux paids ni deux m'suthes auve mé, et quand j'dis nânnîn, v'là tchi veurt dithe nânnîn-dgia!

Mais y'a tréjous tchique hannicroche tch'empêche, comme lé temps quand les cheins d'la compangnie d'gaz martellîtent un cliou l'travèrs du grand tchuyau dg'ieau et changîtent ma tchuîsinne en bangnérêsse. J'ouïyais l'cliapotis dg'ieau coumme des louêmes à l'entou d'man nouvieau fou qu'lé tchèrpentchi faîthait sèrvi comme un x.

Ch'tait la seule partie d'la maîson tchi 'tait finnie, et à ch't heu né v'là l'machon à la buchi auve eune hache-bigorne.

“À seule fîn qu'la compangnie dg'ieau piêsse èrpather lé creux dans l'tchuyau, Missis,” qu'i' dit.

Les bâtisseurs otchupîtent ma maîson et pliantîtent lé chaûfaud. Eh bein, i'n'sé doutent pas d'la mathée tchi lus court souos les pids.

J'ai souffèrt la chiviéthe, les pelles, les boutchets et les couoches archéologiques dé gâzettes tabloïdes tch'atchumulaient dans l'parleux – sans pâler d'la poussiéthe! Mouôn Doue d'la vie, ché n'tait pon pôssibl'ye d'êpoussetilyi auve un êpousseteux. Ch'tait si poudreux, qu'nou pouôrrait y plianter trais vrégies d'patates sans aver a le's arrouôser nitout.

Et les bâtisseurs ouaient haut – i' daivent touônner l'radio si fort à seule fîn qu'i' piêssent l'ouï par d'ssus la drill'lie, et Ph'lip crie à Wesley, et Wesley crieà Archie et Archi crie ès deux aut's tout l'temps, et né v'là toute la pâraîsse à l's entendre.

Rein n'm'avait prépathé pouor lus moments d'èrpos, lus bouochies et lus tâssées d'thée, mais j'n'avais janmais attendu qu'les ouvrièrs înfectent la p'tite maîson auve la feunmée d'cigarettes. Ouaithe qué j'eusse détesté même pus, coumme nou m'dit, s'il' avaient abattu la muthâle au but du gardîn.

Nou n'éthait dgéthe creu chein qué j'fis pouor ieux. J'eus à bandagi l'preunmié dé à Wesley quand, tant pus d'prêsse tant pus d'abus, il eut du hèrtchîn auve san marté. Et pis êtanchi l'sang des buts bliêssés à Archi quand i' pèrdit pâcienche et jouit à football auve san radio. Tchi nicodème! Et Ph'lip, êpèrtchi coumme un maq'thé à s'tchi, à tchi qué j'donnis eune boutelle dé whiskey à Noué, dit:

“Jé n'sommes ni au feu ni à l'ieau.”

Mais Paris n'fut pon bâti dans un jour, et né v'là Pâques dêjà pâssé et auprès tchiques sémaines la maîson r'sembl'ye à la Batâle d'la Somme.

Mais séthieusement à ch't heu. La grande bîngue en méta – chein qu'nou-s'appelle un skip – et tchi m'couôte un tas d'sou, est remplyie d'tâsses en pliastique, dé boêtes à sannouiches et d'patchets à cigarettes.

Jé n'voudrais pon jouer la nouôrriche pouor aver des convèrsâtions fanmiliéthes entouor Dâvi Beckham et san transfèrt à Real Madrid – chein qué j'veurs, ch'est r'aver ma maîson à mé.

Et les bâtisseurs? I'sont êbahis par chutte femme et s'n attaque dé nèrs.


A Le P
 

Viyiz étout:

 

Les Pages Jèrriaises