Les Pages Jèrriaises

Chanson

Air: “There is nae luck about the house.”




Tout va d'travers dans le mainage,
Depis que m'n homme est hors;
Ch'est de qui tristre qu'un mainage,
Quand le maître en est hors.

Le temps assez vite se passe,
Ocuo quand i' fait jeu;
Mais de la niet vite je m'lasse,
Quand j'sis à men tout seu.

Est-che êtonnant que je m'engnie,
Quand depis diex-sept meis,
Je me trouve sans compangnie,
Car je ne sors jamais.

Il est dans une buon' consortie,
Nou dit qu'il y fait bein;
Mais quand il est en Australie,
Ch'est comme s'i' n'm'était rein.

I' mandait dans sa dergnier' lettre,
Qu'i' r'veindrait chut hiver;
J'espèr' qu'i' n's'en va pas m'dêmettre,
L'buon Dgui vielle le ramener.

Tout va d'travers dans le mainage,
Depis que m'n homme est hors;
Ch'est de qui tristre qu'un mainage,
Quand le maître en est hors.

 

 

Vèrsion en mannuscrit:

Chanson

Tout va d'travers dans le mainsnage,
Depis que m'n homme est hors;
Ch'est de qui triste qu'un mainsnage,
Quand le maître en est hors.

Le temps assez vite se passe,
Ocouo quand i' fait jeu;
Mais de la gniet vite je m'lasse,
Quand j'sis à men tout seu.

Est-che surprenant que je m'engnie,
Quand depis diex-sept mais,
Je me trouve sans compangnie,
Car je ne sors janmais.

Ch'est vrai il est déja captaine
Et i' gangne des sous;
Mais me j'ai bein de la peine
Et l'argent n'est pas tout.

Il est dans un' bouann' consortie,
Nou dit qu'il y fait bein;
Mais quand il est en Australie,
Ch'est comme s'i' n'm'était rein.

Nou dit bein, "faut aver patienche";
Est-che la veue de pain,
Ou de boeu ou de lard un' tranche,
Qui apaise la faim?

I' mandait dans sa dergnier lettre,
Qu'i rveindrait chet hiver;
J'espere qu'i' n's'en va pas m'dêmettre,
L'Bouan Gueu vieille l'ramner.

Tout va d'travers dans le mainsnage,
Depis que m'n homme est hors;
Ch'est de qui triste qu'un mainsnage,
Quand le maître en est hors.

PL
30/9/1872

 

Viyiz étout:

 

Les Pages Jèrriaises