Moussieu l'Editeu,
"Vraiement, Ph'lip," s'fit la bouonnefemme hier au sé, après avé mint bas la gâzette, "y'a des gens que je n'comprend pas."
"Chonna, ma vieille, ne m'surprend pas," j'l'y dit, "car, té et mé, j'avons 'tait mathiés bein d's'années, et si j'dîsais que j'te comprends tréjous au jour d'agniet, j'dithais un mensonge. Mais tchèsque tu'as veu dans la gâzétte tch'à évôtchi chutte r'mérque-là?"
"Ch'est l'Sénateur John Le Mérquand, et les patates," ou dit, et ou s'en allait continué quand j'l'intérrompit.
"Pâslant d'patates, Merrienne," j'l'y dit, " tu-as si dêchithé ma bordeuse, que si tu continue pour une autre s'maine, y n'y'étha prèsque rain d'restant. Mé, j'me grais ocquo avec les vieilles, mais té, ch'est des nouvelles patates pour tan dêjeuné, pour tan dîné et pour tan soupé. J'caltchule que tu'en avale trais bouonnes livres par jour, et au prix tchi sont dans les boutiques, ch'est une ruine. L'année tchi veint je pliant'tai d'la sousique dans ma bordeuse et tu pouôrras t'amûsé à faithe d'la soupe d'anguiulle."
"Ocquo du gniolin," ou dit. "Est-che que tu n'peux pas être sérieux par bordée? Comprends-tu, pouôre achocre que tu'ès, que si l'Sénateur avait gâgni san point dans l's'Etats, notre bouonne vielle Royale s'sait finie. Par chein tch'y propôsit touos les férmiers dév'thaient être libres de plianté autchune variété de nouvelles patates."
"Vèthe, mais, Merrienne," j'l'y dit, "à qu'menchi y faut prendre en considéthation que l'Sieur Le Mérquand a tréjous yeu de bein drôles d'idées, epis n'oublie pas que quand sa propôsition fut mînse aux vouaix, y n'en trouvit qu'neuf de san bord, contre pûs de trente tch'y n'en approuvaient pas."
"Vèthe," ou dit, "y'a ocquo d's'hommes dans l's'Etats tch'ont un mio d'bouon-sens, mais j'voudrais savé pourtchi qu'notre Député, l'y tch'y n'crais pas d'patates, votit du mauvais bord."
"N'y'a qu'à l'y d'mandé, et y pouorrait te l'éxplitchi," j'l'y dit, "mais, sans doute, tu'as veu que l'Frainque Le Boutillyi 'tait ocquo pour la Royale, et pourtant, y'a bein d's'années, y portit un viage à douze sous l'cabot. J'garantis tch'y n'a pas roublié chutte saison-là."
La Merrienne dit qu'oulle avait consulté la liste des membres tch'avaient voté pour le Sénateur Le Mérquand. "Le Sieur Venables, par éxemplye," ou s'fit, "tch'y 'tait d'chu bord-là; peux-tu m'dithe tchèsqu'y s'y-connaît? Et l'en avait d'autres de la même trempe, tch'y connaissent une nouvelle patate quand y l'a vais sûs lûs assiétte. Quand à mé, j'voudrais vais autchun d'yeux happé une frouque et cliérgi vingt-chinq pérques dans san jour. Après un cabot ou deux y faudrait l'éxpédié par ambulance à l'hôpita."
Sûs chonna, j'eut à rithe, Moussieu, et pour changi l'sujet je d'mandit s la bouonnefemme tchèsqu'ou criyait d'la situâtion en France.
Ou fit une grimache: "Je n'sais pas tchi en craithe Ph'lip," ou dit. "Autchune chose peut s'arrivé-là, même une dguêrre civile. Dans m'n'opinion le Général De Gaulle éthait fait mûs d'résté trantchillement siez-l'y, car il a dêjà d'l'âge et y dait savé tch'y n'a pas toute la nâtion à san dos. L'homme que j'pliains, ch'est l'Président Coty, tch'a 'tait forchi de d'mandé à De Gaulle de formé un gouvérnement, contre sa volonté. Nou sétha bétôt si l'Général a peu réussi, mais nous en doute. Ch'est en Algérie que l'vrai troublye éxiste et le problême là pouôrrait être la ruine de la France. Ach'teu, as'tu liut la longue distchussion dans l's'Etats au sujét du tourisme?"
"Oui," j'l'y dit, "et j'n'en crais pas grand'chose. Nou peut vais ach'teu que l'agricultuthe ne compte que pour prèsque rain. accordant qu Sénateur Krichefski et au Cyril Le Mérquand, ch'est les vîsiteurs tch'y s'en vont sauvé l'île, et chein tchi faut faithe ach'teu ch'est de tâchi d'en vais de pûs en pûs chaque année."
"Ch'est absolûment honteux," ou s'fit. "Les cafés et les réstaurants ach'teu n'dév'thont pas freumé à une heuthe, car chais pouores vîsiteurs ont faim. Il est vrai que dans certaines parties d'la Ville, à chein qu'nou ouai, y'à tant d'brit dans les p'tites heuthes que personne ne peut dormi, mais disent les Sénateurs Krichefski et Cyril Le Mérquand, tchèsque chonna fait, après tout, pour bein qu'les vîsiteurs s'saient satisfaits."
"Vèthe, ma vieille," j'l'y dit, "mais chais deux-là prennent bouon soin de d'meuthé ouèsqu'y sont seux de pouvé dormi trantchilles!"
Ph'lip
Les Chroniques de Jersey 31/5/1958
Viyiz étout: