'Tchi qu'tu penses' me d'mandit le Ph'lip Desclios l'aut' jour, 'de chu projet de bâti eun golf-course ès Creux?'
'Y'a eune pause dépis que j'fus la, 'j'lis dis, 'et tout qu'j'en sais ch'est chein que l'mounde me dit ou que j'lis dans la gazette, mais i' semmblye que y'a certains pèrrots qui veullent empiéter sus d'la buoanne terre labourablye pour y faithe eun golf course, pas à neu' creux, mais à dgiex-huit.
'Et i' prétendent qu'i nos l' faut pour attither pus d'touristes, coumme si j'en avaîmes pas déjà trop. Et même y'a tchiques Jèrriais dans l's Etats qui sount en faveur de chutte bêtise.'
'Eh bein,' s'fit l'Ph'lip, 'me j'sis fèrmi, et coumme de raisoun j'favorise l'agritchultuthe, mais quand même n'est y poun vrai qu'les touristes apportent bein des sou a l'île, et qu'les hôtels, restaurants, les boutiques et d'même se trouv'raient hardi en embarras si ch'en 'tait pas pour les touristes? I' faut qu' tout l'mounde en Jèrri puissent gagnyi lus vie.'
'J'n'ai rein a r'dithe là d'sus,' j'lis rêpounnis, 'mais i' faut s'rapp'ler qu'Jèrri n'est qu'eune p'tite île.
'Sans paler d'touristes, j'avouns déjà pus qu'deux fais pus d'résidents que j'pouvouns acc'moder.
'Et les touristes, y'en veint bein mains au jour d'agniet qu'y'en v'nait d'vant - le dêbaclye de prospérité partout l'Europe et l's Etats Unis en est l'résultat. Et pis, les siens qu'ount l'moyen d'viagi ne veinnent pas tant à Jèrri coumme i'soulaient, i' lus vaut bein mus d'aller en Espagnye, en Italie, ès îles d'la Carribée, en Grèce, et ès pays iou qu'el temps est pus favourablye qu'en Jèrri.
'I' n'faut pas trop s'fier sus les touristes.
'Ervénant ès Creux, tu sais bein que deux fais dans l'couthant d'not' vie j'avouns 'té en danji d'affamer par la manque de nourrituthe, et pour se garder en vie i'fallait tchultiver jusqu'au dernyi pouce de terre labourablye.
'Que l'Buoan Dgieu nos garde d'eune aut' dgèrre mais nou'n'sait jamais et sans pâler d'dgèrre tchique aut' avârie pourrait nos assoumer.
'Par exemplye, si les marins allaient en grève, les batchos qui nos apportent nos vivres ne pouarraient pas v'ner et v'là tchéthait le même effet qu'eune dgèrre, et, quant à la nouarituthe j'éthaimes a nos dêbrouallyi du mus possiblye.
'Nânnîn, mon Ph'lip, j'avouns déjà saccagi trop d'bouanne terre par bâti d'sus, que ch'sait des maisouns, des offices, des pièches de coummerce ou des hangars dans la campagnye, et pa'ce qué j'avouns bein trop d'mounde en Jèrri, creuser eun réservoir à la Vallée d'la Reine, tchi qu'a dêparé l'paysage et bein d'vrégies d'buoanne terre agricole étout.
'Y'a loungtemps qu'éthaimes deu empêchi tout chu saccage. J'avouns failli not' d'ver.
'Je n'pouvouns pas r'am'ner chein qu' j'avouns dêtruit mais au mains j'pouvouns y mettre' fin - et la preumieure chose qu'i nos faut faithe ch'est d'arrêter chu scandale des Creux.'
Viyiz étout: