Les Pages Jèrriaises

Les patates et l's'Etats

L'Opinion d'la Merrienne

Moussieu l'Editeu,

Quand j'entendit, l'autre jour, que ch't'année y faudra péyi onze louis pour le dêfouissage d'une vrégie d'patates, je m'dis à mé-même que nos fermiers ne pouôrraient jamais éspethé une bouonne saison.

"Ch'est pûs qu'l'industrie peut supporté," j'dis à la Merrienne, tch'y tait otchupée à êcalé le restant d'nos pais. "Quand nou veint à pensé que dans l'temps d'man péthe un bouon Breton vos dêfouissait ses vingt à vingt-chinq pérques par jour, au taux, à tout faithe, d'un louis ou un mio pûs pour un vrégie."

"Chonna, man Ph'lip," ou dit, en méttant un autre choutchét sus l'feu, "ch'tait dans les bouons viers temps que je ne r'vêrrons pas. Ach'teu, à la fin d'la saison, ch'est l'ouvrilyi tch'y met des sous à la banque, et non pas san maître, tch'a yeu tout l'couôtage et toutes les anxiêtés. Heutheusement j'n'en avons pas un grand bétchet ichin, et j'avons d'bouons êfants tch'y veinnent tréjous à notre aide quand y'a besoin. Epis y n'faut pas oublié qu'au jour d'agniet hardi d'nos férmiers ont d'chais machines à dêfoui. Quant à onze louis la vrégie y'en étha ocquo tchitchuns tch'y pouôrront les péyi, mais ch'n'est pas tous tch'y peuvent se fié d'pouvé dêfoui à chinq ou siez louis l'chent. J'appréhende que y'étha hardi d'férmes à loué ou à vendre quand veindra le s'tembre."

"Et mé étout," j'l'y dit, "mais enfin y n'faut pas crié d'vant avé ma, et y faut éspethé qu'la saison s'sa miyeuthe que la draine. Ach'teu, Merrienne, changement d'sujet, tchèsque qu'tu pense des propositions dans l's'Etats, chutte semaine, de péyi les dêpenses des candidats pour la djobbe de Député? En approuve-tu ou tchi?"

"Tu me d'mande si j'en approuve," ou raiponnit vivement, "mé, une Saint-Ouennaise tch'a veu tant d'fameuses êléctions dans la pâraisse et ailleurs! Péyi les dêpenses d'autchun individu tch'y voudrait avé un siége dans la Chambre! Quand chonna veindra, man Ph'lip, Jêrri pouôrra dithe à-bétôt à ses pathens. Et, comme de règlye j'n'ai pas souvent yeu l'occâsion d'félicité l's'Etats, mais chutte fais y faut l's'admithé pour avé envié chais projets-là tu sais bein iou. Un membre tch'y m'êtonne hardi ch'est l'Député d'Saint-Cliément. Une chose tchi m'amûsit quand je liut l'rapport ch'tait de r'mertchi que neuf des Députés d'la Ville votites pour. Sans doute y'avait une bouonne raison dans pûs d'un cas."

"Vèthe," ou dit, "l's'êléctions pûs tard, ch'tait chonna tch'y n'pouvaient pas oublié. Y veulent les vouaix d'la clâsse ouvrièthe. Mais sérieusement, Merrienne, nous est bein content que tout chonna a tait envié au royaume des taupes, car autrement ch'n'éthait tait qu'un qu'mench'ment. Si la Chambre avait tait bête asséz d'accepté chais projets nous éthait bétôt veu une demande pour le paiement des membres, comme en Angliétêrre, ouèsqu'ils ont tchinze chents louis par an, et d's'allouanches pour plusieurs choses."

"Vraiement," ou s'fit, "je n'connais pas un Député tch'y vaut tchinze chents louis par an, ou même pour le couothant d'sa vie. Mais ch'est seux et cértain, Ph'lip, que j'en r'ouithons pâslé. Et la préchaine chose che s'sa l'paiement des Connêtablyes, des Chantgniers et tout l'réstant. J'vais chonna v'nin, mé, p't'être pas ocquo, mais pûs tard."

"N'oublie pas les pouôres Récteurs," j'l'y dit. Nou veur dithe que y'en a pûs d'yun qu'a d'la peine à vivre. Un Récteur n'a qu'dans les djais louis la s'maine."

"Et sa maison, san gardin, sa lumièthe, san tchérbon, les offrandes de Pâques, et bein d'autres choses," ou dit. "Ne t'gène pas d'nos Récteurs, man Ph'lip. Ils ont tout ch'que lûs faut, et n'y'a pas hardi d'gens tch'y peuvent en dithe autant."

Ph'lip
9/2/1957

 

Viyiz étout:

 

Les Pages Jèrriaises