Y'a du bon! Laïzé et Lonôre sont engagis dans eunne store a patates. Lonôre coumme contre-maître, pour prendre les titchets des fermiers, mertchi combin d'cabots d'mids, villyi a ch'qui n'y'en ai pon d'malades, ni d'rouogneuses, faithe sinné l'titchet dans l'office, et prendre les "tips" pour les mettre dans la bouête. Laïzé, lyi, est monniethe de "handyman," un mio partout. I' l'ont mînze a survillyi les mousses qui cliouent les titchets sus les bathis, pour les faithe se moustré, et n'pon s'trompé d'adresse, et lus dounné des cliamuses toutes les faies qu'ou les trouve a s'abûzé.
Lonôre r'vînt siez nous, divérsement d'bounne humeu la preumi séthée; ses pouchettes pliennes de patates que les fermiers y'avaient dounné, sans pâslé d'eunne pouognyie d'cappeurs qui y'avaient 'té dounnés pour lyi même, viyant qu'ou n'est pon trop difficile si y'a offûche tchq' moyennes parmi les grosses.
"Et pis, sais tu, pépée," qu'ou m'dit: "les fils d'fermi sont si contents d'la moniethe douoche et 'kind' qué j'lus pasle, qu'i pensent a mé quand i' r'veinnent avec eunne deuxième cherge. Ch'est des gaches, et du chocolat, et d'la limounade, et des chucrins; et, pus tard, y'en a yun qu'a promins d'm'apporté un p'tit ponnyi d'frâzes touos les matins - pour me bouchi l's iers, qu'i dit en clyîntant. Pourtchi qu'i veurt me bouchi l's iers, chu fermi là, dis, pépée?"
Hélas! J'm'en doutais! L'tcheu d'l'houmme est déséspérement malin, coumme dit Laïzé. J'pense bin qu'en chérfouoillant nou pouorrait trouvé pus qu'i n'faut d'terre dans des bathis, a chu jeunne pendloque la. Mais j'n'en sufflyit mot a Lonôre. Ch'n'est pas de m's affaithes - et pis, j'sis hardi porté pour les frâzes.
Pour quand a Laïzé, l'affaithe n'a pon 'té si bin; les mousses, a ch'qu'ou dit, lis font des chent-coups. I' lis mettes des "tacks" dans ses souliers, lis rouôlent des bathis dans les gambes, lis saupoudrent les g'veux d'ponci, et la font anglyi tant qu'i peuvent. Ou r'vînt ov sa robe toute trillyie; tandi qu'oul 'tait mâtée contre un pillyi, a survillyi deux mousses, les autres y'avaient clioué san fro contre le pillyi; quand ou s'dèstouôni, la maintchi d'san fro resti contre la pathé! Et coumme ou s'n'allait s'plaindre a l'office, les pendloques la fîtes choppé dans eunne corde, ou ou s'èstrueûlli pataflias la fache dans eunne cassé de cliou; oul a l'nez et les joes picottés coumme s'oul avait la rouogeulle. "Chès avièrs la," qu'ou dit, "n'ont pas eunne mie d'réspé pour man sexe; et i' s'servent d'un langage a faithe rouogi l'manche d'un g'nèt."
J'la r'consilli d'man mus. J'lis dit d'patienté un mio; qu'la saison n'dueûrait pas longtemps; qu'i' fallait bin dounné san coup-d'main a ch't'heu qu'les hoummes 'taient èscarses; et que quand tout s'ait fini j'éthaimes eunne belle poutchie d'sous dans la carre du titheux. J'lis dis étout que j'lis paiethais un bieau holiday a la fin d'la saison. "J'îthons touos les deux passé eunne arlevée a la Corbiethe," que j'lis dit; "tu t'assiéthas auprès d'mé, et tandi que tu s'as a mangi des beurrées, tu mé r'gardethas 'polish-off' du houmard! La! ès tu contente? et j'sis ti ten chier gros Piteur!"
Pour de mé, j'sis tout a fait décidé étout a dounné un coup-d'main, s'il faut. J'sis pas un piércheux, gas-deouelle! J'ai offert mes services jus'qu'ichin sans succès. Ch'est eunne pliéche assise qu'i m'faut - rapport a ma courte halleine - et pas trop a faithe - j'perds la tête quand j'sis prèssi.
Piteur Pain
Evening Post 1/6/1916
Viyiz étout: