Les Pages Jèrriaises

Lé Caouain et les patates

Le Chef m'envyi l'aut'e jour sus l'weighbidge pour prendre des renseignements quand au prix des patates, etc., et tandis que j'tais là je ouï la pus drôle d'histouèthe imaginablye.

Ch'tait d'tchi qui s'était arrivé dans la nièt, dans iune des pâraisses de l'Est, pas bain des milles du Vier Châté.

Le Caouain n'en vit rain personnellement, ch'est raique des ouï-dithes, ch'est pourtchi i'n'peut pas garanti que ch'est la véthité malgré que l'information fut apportée sus l'Bridge par des fermiers dignes de fouai.

V'chin soi-disant tch'est qui s'arrivi.

Percy Jour Niots ervenait gentiment tard dans san motor-car et en passant le long de san côti i' cru vaie tchiquechose bouogi dans ses patates. I' pointi les lampes de sans môtor dans chute direction-là et à sa grande surprinse il aperchu du monde à dêfoui ses patates. N'ayant pas donné d'ordres à ch't êffet-là, i' trouvi chenna bain drôle, mais i' dêcouvri bain vite que che n'tait pas ses gens à li et i' r'connu le p'tit Jack Gig-Lamps qu'êprouvi à s'muchi pour éviter les rayons des veues à Percy. Un homme ne peut pas dêfoui des patates comme-i'-faut quand il est d'même êgalué par des lumièthes êlectriques, ch'est pourtchi le p'tit Jack ermins la partie à une aut'e fais.

Ou criyiz sans doute, qu'il 'tait. de propos délibethé, à dêfoui des patates qui n'y appartenaient pas. Ch'n'est pas ch'là du tout.

I' faut r'garder la chose d'un point d'veue pus charitablye. N'ayant pas ieu l'temps d'aller vaie dans l'jour si ses patates étaient bouannes à dêfoui, il y fut la nièt.

Eh bain le temps était un mio à la bliâse chute nièt-la et ses lunettes lus trouvithent conséquemment toute embliâsées et i' s'trompi d'clios.

Et v'là tout chein qu'en est!

* * *

En pâlant d'patates, ch'est une récolte tout-d'même qu'est la cause de bain des soucis et bain d'la minséthe pour les siens qui lus en otchupent.

I' y a un pouore fermi à St.-Brelade qu'avait fait v'nin sa djaingue de Bretons et pis quand i' furent arrivés siez-li, i' réalisi qu'il en avait trop, comme l'année avait fait.

Une frouque pouvait li faithe et il en avait deux.

I' lus dit: "Mes pouores bouannes gens, je n'sais pas tch'est que je m'en vais vos donner à faithe!"

Et i' s'mins à plieuther!

Iun des Bretons, qu'avait l'tchoeu diversement tendre, fut tout-à-fait bouleversé de vaie san patron plieuther comme chenna et il en fut prins d'pitchi et li dit: "Oh! dry those tears." "Je n'm'en vais pas vos rester sur les bras, gardez man compagnon, quant à mé, je connais l'Ile tout-à-fait bain et je peux tréjous trouver du travas ailleurs."

Et i' s'en fut trouver le Sécrétaithe de l'Union li d'mander de l'pliaichi ailleurs.

Caouain
Les Chroniques de Jersey 3/6/1922

 

Viyiz étout:

 

Les Pages Jèrriaises