J'ai oui dithe qu'y'a pus d'sous en Jerri qu'les Banques n'peuvent monyé! Né v'la pour bin dthe très ans d'siette qu'les poummes-de-terre passent bin: touos les viers comptes sont payis: touos les fermiers sont au lis du vent. d'viers compts qu'avaient trainé sus es livres des marchands d'pi d's années, ont 'té payis, avec les intéthêts; y'a même des fermiers qu'ont payi lus guano d'l'année tchi vint, pour sauvé l'disconte.
Tout l'monde est dans la jouée! Les marchands s'en vont hauchi les gages de lus clerques, lus dounné eunne arlevée la s'maine avec un titchet pour la Corbiéthe et un "lobster tea" siez Mess Le Sauteux. Y'en a même, a ch'que j'ai oui, qui s'en vont avé tchinze jours sus l'continent, touos frais payis, et un neu fa d'habits.
Persounne né dét pus rin a persounne! Touos les comptes d'èspici, de drapi, etc., sont settlés. N'y'a pus d'arrérage de rente nulle part, et touos les fermages sont payis jusqu'a Noué tchi vint. L'prix d'la terre a hauchi d'un bouon quart. La terre heuthive se loue l'prix qu'nou veurt en d'mandé, et y'a eunne grand d'mande pour la tardive d'pis qu'chest la récolte de fin d'saison qui rapporte l'pus.
N'y'a pon un quartchi d'bouonne rente a vendre sus l'marchi. Quand ch'est d'la bouonne rente fonciéthe (la moindre soumme d'un quartchi) sus un mênage passabliement franc, y'a d's abéyants par la douzaine; et même la Rente assinable a r'print èstounamment du prix.
Coumme j'vos disais, les caves des Banques sont pliennes de souverains y'en a a puchi a la pelle; et i' s'en vont être oblyijis d'en envié tchiq' tounnieaux en Angliéterre - n'y'a pus persounne en Jerri qu'aie besoin d'lus en emprunté. Sinon mé? Et les pendloques ont la chose de m'dithe que ma signatuthe né vaut pas chinq sh'lings!
Les boutiques vendent ch'qui veullent. Touos les fermiers se sont ridjis d'neu d'la tête ès pids: lus femmes ont accaté des chents vérges de cotton, de telle, de fliannet. Et les filles! N'y'en a pas ieunne qui n'aie deus-très neuves blouses, eunne robe ou deux, tandi qu'les chapiaux qu'nou vé a ch't'heu a la Chapelle, vos font oublié d'èscouté l'prédicateu. Et sitot les fains rentrés, la puspart des fermiers s'en vont avec lus famille faithe un tou en Suisse, en Autriche, en France. Y'en a même eunne djingue qui pâsle d'allé jusqu'en Portunga vaie d'iou vint les poummes-de-terre qui nos badrent au c'menchment d'la saison.
J'en sis à mé d'mandé si j'n'éthais pas mus fait d'prendre eunne ferme a la pliéche de m'en v'nin en ville. Ch'n'est pas que j'm'y counnaisse, a labouothé d'la terre. Mais nous apprend Lonore éthait souognyi les vaques, Laizé éthait fait l'beurre et abreuvé les viaux, nous éthait yeu un valét pour faithe le travas de d'hort, et mé, j'ethais survillyi tout et gardé les comptes. Véthe! J'ai moniéthe'ment r'grét d'avé mantchi cheunna a ch't'heu qu'nous y puche tant d'sous.
Et coumme j'disais a Laizé: toutes les filles de fermi, bouonnes a mathié sont diversement r'cherchis, et n'restent pon a paitre ès coucous coumme ta bitche é d'fille! R'gas Amice L'Enfêsté! I' n'a yeu qu'a dithe, a la dernié Visite de Branquage, qui dounnait Chent casses de Royales pour s'menche a châtchunne des ses filles - toutes les très futes engagis dans l'couothant d'la s'maine!
Piteur Pain
La Chronique de Jersey 8/7/1914
Viyiz étout: