|
Quand l'solet qu'menche à ramonter, Et qu'les coqs sont tous à chanter Et que l'fermi tchitte à ronflier I' pense - à tchi? devant sè l'ver? A ses Patates! L'prumi des raons tchi pénêtre L'long du ridjeau d'la pus gran' f'nêtre, Forchant la nièt à dispathaitre, Lis fait penser qu'i' dev'thait être?... A ses Patates. La tête occouo sus l'ouotchill'yi I' s'frotte et s'frotte en cl'yintant d'l'yi; Et d'vant qu'être à mié rêvill'yi I' crait dèjà d'être à fouoillyi?... A ses Patates! Tout d'un coup prins d'un êvredin I' saute à bas - coumme un lapin, - Un mio frîlieux d'si grand matin! Court à sa f'nêtre et r'garde enfin? A ses Patates. I' n'pathaît pon y'aver d'rousèe, N'y'en a pas qu'aient l'air d'être g'lèes. - Pourtant, i' r'garde et r'garde assez; Nou dithait qu'ses yeux sont rivès A ses Patates! Mais en fin d'tout, tch'est qu'ch'est qu'i' fait? Le v'la qui hall' san bounnet d'nièt Et laissant la bouann' femme au lièt V'lo qu'i' s'habille et couort d'un trait A ses Patates. Coumme i' s'en va de clios en clios, Ses pids trempès dans ses chabos, Et ses deux mains driéth' san dos Pensant au temps, à ses gouânos, A ses Patates! Enfin, i' vait qu'i' n'y'en a pon Entout de g'lèes dans tout l'canton; I' s'en r'veint dghai coumme un pinchon, Suffliant, heutheux; car y'a du bon A ses Patates!
|
Viyiz étout: