Les Pages Jèrriaises

Les patates et la politique

Countes d'un Èrv'nu 'Djatre sait; s'fit l'Ph'lip Desclios qui r'venait d' tchérier eune chèrge éd patates au 'dump', mais tchi triste saisoun ch't'année! Jé n'mé rappelle pas d'en aver veu ieune si mauvaise qué chétchein'.

'Tu n'as pas la mémouaithe bein lounge, dounc,' j'li rêpounnis, car dans la tchulbutte dé prix après la dgèrre dé quatorze i'n valait souvent pas la peine dé porter ses patates au 'bridge'.

Mais au mains nou'n'les tchériet pas au dump, nou'les dounnait à mangi ès couochouns. Malheureusement, au jour d'aniet les fèrmiers né gardent pas d'couochouns, et d'même les patates né valent rein du tout. Et pis, dans l'vièr temps, i'n' couâtait pas tant à faithe des patates tchi fait qu' si la saisoun 'tait mauvaise nou'n' perdait pas tant d'sou qu'nou' perd achteu.'

'Ma fé', s'fit l'Ph'lip, 't'as bein raisoun là. Achteu, reinqu' pour dêfoui, i'faut des macheinnes qui couâtent des milliers dé louis, tandi'qu'dans l'bouan vièr temps tout ch'tchi fallait ch'tait eune frouque à foui, eun couply éd pannièrs, tchiques bathies d'quat' cabots, et nous avait tout ch'qui fallait pur chèrgi la vainne et s'mett'en route pour le 'bridge'.

'En effet', j'lis dis, "au jour d'aniet si nou'n' dépense pas des sou à tort et à travers les siens disent qué nous est countre él progrès. Et ch'en est d'même pas seulement dans la fèrmerie mais dans tout tchi s'passe en Jèrri dé non jours. Quandtchi qu'les gens apprendrount qué l'souo-disant progrès ch'n'est qu'eune illusioun? Ergarde él tourisme: dans l'vièr temps nou'n'avait qu'tchiques visiteurs, et nou' 'tait countents d'les vaie car ch'tait d'buoannes gens qui savaient s'coumporter. Mais achteu les siens tchi fount l'tripot du tourisme i'veulent lé progrès, ch'est à dithe qué la gourmandise s'est emparée d'ieux. I veulent attirer acquo pus d'touristes et d'même i' faut acquo pus d'hotels et pus d'attractiouns vuldgaithes pour les faithe v'ner.'

'J tais l'aut'mardi à êcouter sus t'radio les débâs dans l's'Etâts. I 'taient à distchuter l'tourisme et y'avait là eun pèrrot - je crai qu'il est senateu - que palit tant d'bêtises et d'balivèrnes que v'là tchi m'rapp'lit mon temps au Foreign Office quand j'avais à aller à la Chambre des C'meunnes, m'assiéthe dans l'banc en drièthe dé mon Ministre - eun banc tchi, s'loun les règlyes d'la Chambre n'existe pas mais qu'en pratique est là pour le souastchein des Ministres, pour lus soufflier dans l'ouarthelle coumment rêpoundre à eune tchestioun minse par l'Oppositioun. Ah, mon garçoun, à tch niollin qué j'avais à êcouter et tchi niollin qué j'avais à soufflier au Ministre pour y rêpoundre! Même au jour d'aniet, d'y penser v'là tchi m'fait rouogi d'hounte.'

'Mais, sâbre dé bôuais', s'fit l'Ph'lip, 'tu n'est pas en train dé m'dithe qué les membres éd nos Etâts sount aussi bégauds qu'les membres d'la Chambre des C'meunnes ?'

'Bah, bah', j'li dis, y'en a tchiqueseuns dans l's'Etâts coumme chu sénateu dé tchi qué j'vainne de t'pâler, qui sount des pus achocres de tchi qu'j'aie jamais entendu. Mais, les prenant en gros, pour l'imbécilité j'ai n'crai pas qué y'ait grand' chose entre l's'Etâts et la Chambre éd C'meunnes. La pus grand'bétise qué Jèrri fit après la dgèrre, ch'tait d"érformer' les Etâs. Nou'n'éthait jamais deu mett' les juges et les récteurs à la porte: i' valaient autrement mus qu'chutte niais'rie d'senateurs. Mais enfin, mon Ph'lip, j'éspèthe qué la saisoun tchi veint s'ra mijeuthe qué chétchein pour les fermiers, car la fer­merie ch'est la cheintâthe de sauvetage du vrai Jèrri.

Mais j'voudrais étout qué non férmièrs erveintent à la vieille mode dé fèrmer. La Royale est acquo la miyeuthe patate du mounde, mais achteu qué pour engrais nou's'sert dé chémiques et qu'nou' la couvre avec chutte salop'rie d'plastique oulle a perdu bein d'chu goût spécial qu'oulle avait quand nou' graissait avec du bouân fumi d'fèrme et du vraic. Nos experts nos disent qu'i' faut mett' pus d'soign à présenter et à paqu'ser nos patates, et il'ount assez raisoun, mais chein qu'y'a d'pus important ch'est l'goût d'la patate. I' nos est dit dans l's'Ecrituthes qué si l'sé a perdu sa saveu' i'n vaut pus rein. Il en est d'même dé la Royale.'

 

Le vièr Trin'tais

 

Viyiz étout:

 

Les Pages Jèrriaises