Ch'est conv'nu: j'soummes pour allé faithe la pliant'tie siez Laiésse Ernon, mé Laïzé et Lonôre. Y'a papi d'passé pardévant témoins, avec vingt louis d'dédit contre Laïésse s'i' n'remplyit pas ses engag'ments. Laïésse vindra, touos les matins, nos cherchi dans san quèrre, et nos rapportétha l'sé, natuthellement. Nous est pour être dans l'clios à neuf heuthes "sharp" touos les matins; et "nock-off" a quatr' heuthes pour nos dounné l'temps d'rentré siez nous, grée l'tée, et s'èstchippé pour la chapelle - ch'est Laïzé qu'à insisté sus chutte dernié clause-là.
Il est d'pus conv'nu que Laïzé, viyant qu'oul est sujette au crampe, n'itha pon plianté. Ou réstétha souos l'shed, enfliubée dans des shâlles, à copé d'la s'menche, et, entre temps, aidji à la missis à grée à mangi. J'din'nons avec la famille, viyant qu'nous est jerriais touos ensemblye, et que j'fûmes fréthes de gobille, Laïesse et mé, dans not' jeunne temps; les Brétounnes, si y'en a, prendront lus neurtuthe dans l'prînseu. Lonôre îtha plianté: mais coumme oul est courte d'haleine et sujette ès èstourdisaisons, sa méthe a stipulé qu'oul étha l'drouét d's'assiéthe sus eunne casse viedde un tou d'tchéthue entr-autre.
Ma djob, à mé, viyant qu'j'ai té maniéthement maître-de-grave à la côte, ché s'a d'marchi "up-an-down" le clios, à crié hourras, nos gens, hourras! et à cliamuzé les mousses qui rompthont les germes. La jougue s'sa souos mes soins, et j'éthai drouét à eunne modjie d'cidre extra toutes les fais qu'Laïésse èstérnuetha.
Et pour gages, ch'est chinq chlings par jour pour mé et ma fille; "three an' six" seulment pour Laïzé viyant qu'il est probablye qu'ou s'endormitha parfais souos l'shed quand n'yétha persounne à villyi.
Laïesse Ernon aheucti un mio sus la clause des gages. Mais quand j'yeut lu ch'qu'en disait l'Député Cory, et que j'y'eut prouvè qu'touos les fermiers puchaient d'l'or à la pelle, i' fini par se gratté la tête et dithe que véthe. Et il ajouôti qu'en tout cas, si les poummes de terre ne payaient pon, nou pouorrait s'n'allé siez l'député lis d'mandé d'avé la bonté d'payi l'déficit.
Ch'est tant tchi, j'nos n'allons c'menchi sitôt la terre en èstat. Lonôre aithait voulu s'habillyi en houmme - j'la trouvi ti pas à s'èsprouvé dans mes habits l'aut' sé - coumme font les hardélles angliaiches, qu'ou dit; mais sa méthe l'vi les bras en haut et lis d'fendi sévéthment d'pensé à eunne telle chose. Ch'est quâzi dommage! Laïesse m'asseuthe qu'il éthait 'té content d'lis dounné douze sous d'pus par jour.
Piteur Pain
21/2/1917
Viyiz étout: