Eune soixantaine dé membres lus rêunîtent, vendrédi, l'25 de mai, dans la Salle d'Agritchultuthe, St. Hélyi, et l's affaithes c'menchîdrent par la lectuthe et l'adoption du rapport dé la rêunion du mais d'avri, et l'êlection dé quatre nouvieaux membres.
Lé Président annoncit que l'Service Annuel étha lieu l'17 dé juin, à la Chapelle Méthodiste dé St. Martin à 3 heuthes l'arlévée, et la rêunion mensuelle su 27 dé jullet comme eune visite au nouvieau réservoir au Vaux d'la Mathe. Auprès, i' d'mandit ès membres dé filer amont la Rue des Trais Pigeons jusqu'à l'office du Tourisme pour vaie l'travas qui s'y faîthait.
Lé Député Dupré c'menchit par faithe la beinv'nue à tous, et dit qué v'là tchi li faithait grand pliaîsi d'pouver donner ès membres tchiques explications entouor la routine dé san départément d's Etats.
Iune sus huit
Lé Député fit un bein întérêssant discours entour la manniéthe qué l'Ile est publiée en Anglyéterre et à l'êtrangi par des annonces dans les gâzettes et par un film. En donnant bein des chiffres du couôtage dé tout chenn-chîn, i' dit qué les sou qu'i' y étaient dêpensés ram'nés dé bouan intéthet à l'Ile. Eune chose întérêssante 'tait qué sus chaque huit personnes qui sortaient du Royaume Uni chaque année en vacances iune v'nait en Jèrri.
À la fîn du discours lé film, en couleurs, qu'est montré pour publier Jèrri, fut montré, et i'y a dé divers bouans portraits parmi d'autres qui n'sont p'têtre pas si bouans.
Un coup l'film fini, lé Député rêponnit bein des tchestchions qui lî futent d'mandées par des membres, et les învitit à faithe lé tou d's offices, et iune, auve touos les chiffres des tourists qui veinnent dans l'Ile, lé nombre dé batcheaux, et d'avions, dé licences Anglyaiches pour cachi et les siennes internationalles, etc., 'tait bein întérêssante à vaie.
Les membres pathûtent aimer la séthée, et tous sont bein ermerciant au Président du tourisme, et les membres dé s'n office qu'i' 'taient là avec li à explyitchi à m'suthe qu'les membres d'L'Assembliée faîthait l'tou, pour tout l'embarras qu'ils avaient prînt à arrangi la séthée.
JWP 9/6/1962
Viyiz étout: