Maît'e Cliément d'Caen r'est oquo dans l'embarras.
Et chose assez drôle ch'est tréjous à nous qu'i' vaint s'pliaindre quand tchiquechose ne vas pas bain.
Chute feis ch'est san dêfouisseux qu'est à li faithe de la minsèthe.
Ch'est pour chenna qu'i' vint l'aut'e matin nos d'mander d'inséther une annonce dans not'e gâzette demandant une frouque compliète pour dêfoui huit vergies d'patates.
“Savous-bain,” i' nos dit, “qu'y a un peûle par siez-nous à tchi que j'donni du travas tout l'hivé passé et qui m'promins de m'foui mes patates. Eh bain, v'là tchi fut bain pour deux jours, et pis hier matin je fut porter des bathis au clios, comptant qu'il 'tait là comme d'habitude, mais i' n'y avait personne.
J'envyi ma nièche siez-li vaie tch'est qu'chenna voulait dithe et v'là-t-i' pas qu'on r'vint avec la nouvelle que man pêrrot était à dêfoui dans l'gardin à Laiesse Ernon.
Naturellement, je m'y en fut tout-d'suite demander des explications et dithe à Laiesse tch'est que j'pensais d'li, mais i' n'fît que de m'rithe au nez et m'dit que m'n homme li avait promins i' y a pus d'deux mais de li foui ses patates quand i' saient bouannes.
Je d'mandi à l'homme pourtchi qu'i' n'm'en avait pas pâlé, à mé et il m'raîponni qu'i' n'criyait pas que v'la qu'en valait la peine. Ch'est gens-là n'sont pas dêrangeants.
Mais je perdi pus d'chinq louis sus l'prix d'chu jour-là, mé!
Le lendemain au matin i' tchiyait d'la plyie averse et man ouaisé se r'mins trantchillement à foui dans man clios, mais la terre était trop à pité et je li ordonni de s'en raller siez Ernon s'i' voulait, mains qu'i' n'dêfouithait pas siez-mé.
Je finîmes par aver des patholes et je l'congédyi tout-à-fait.
“Ne m'pâlez pas des dêfouisseurs de Jêrri, je n'en r'veurs pas.”
“Pourtant,” j'li raîponimes, “i'y a des gens qui mettent des lettres sus les gâzettes disant que toutes les patates dev'thaient être dêfouies par les gens d'ichin et qu'i' n'dévthait pas v'nin d'Bretons!”
“Oh vaithe, je l'sais bain, mais tout chenna est du d'vis d'imbécile! Ch'est là les théories des villais, des barbiers, des quincailliers et des marchands d'drap, des gens qui sont tréjous prêts à donner d's avis ès fermiers sus des tchestions de tchi qu'i' n'connaissent rain du tout.”
“Ou criyiz bain don, Maît'e Cliém, que les fermiers ne pouorraient pas lus graie sans la main-d'oeuvre qui vaint d'France?”
“Ah dame, i' n'ont qu'à y êprouver! Tandis que j'craîtrons des patates i'nos faudra du monde pour les dêfoui.”
“Mais, Mess de Caen, extchusez que j'en faichions la r'merque, mais nou se d'mande pourtchi qu'ou n'en faites pas v'nin une êtchipe par le Syndicat.”
“Eh bain, v'là justement le boustre d'noeud!
Par principe j'ai voulu souôtenin l'ouvriyi local, et v'la comme je sis arrangi! J'ai 'té au bureau vaie si ch'est qu'i' pouorraient me tither d'embarras, mais le maudit Secrétaithe ne veurt pas aver rain à faithe à mé devant que j'aie payi mes arriéthages, et i' m'fait bain ma d'aver à dêbourser deustrais louis pour l'amour d'aver mes patates défouites.”
“Ou n'pouvez sinon admettre, Maît'e Cliém que l'Secrétaithe à parfaitement raison, i' faut bain qu'i' faiche observer les règlyes. Ou savez bain qu'i' ne s'sait pas admissiblye qu'ou pouorrethiez joindre et tchitter comme bouan vos sembliethait et justement quand v'là tchi vos convaindrait. I n'y a autchune organisation qui peut être condite souos ches conditions-là.”
“Nan dja, ch'est bain vrai,” se fit l'buanhomme, “je n'aithais jamais deu aver tchitté, mais pour chette année, avec les deustrais vrégies qui m'restent, ch'n'est quâsi pas le peine.”
“Mais, Maît'e Cliém,” je li dîmes, “si ch'est qu'ou r'mettez la chose oquo un an, qu'ous aithez à payer et la somme vos pathaîtra d'autant pus forte.”
“Ah bain, tant piethe,” i' raîponni, “arrive tchi pliante, i' peut s'arriver bain des choses d'ichin l'année tchi vaint, peut-être que je ne f'thai pas d'patates, et je s'sai p't-être mort, sapresti!”
“I' n'est pas d'mêtchi, Maît'e Cliém,” je li dis, “tch'est que l'Caouain f'thai sans vous?”
Caouain
1929
Viyiz étout: