Les Pages Jèrriaises

Histouaithe du temps d'la fraude

 

Dans les travèrs dé 1850 les gens d'la Douanne eûdrent du renfort, pouor êprouver à arrêter la fraude lé tou des côtes. Un cèrtain individu tchi vint d'Angliétèrre, et tchi s'criyait tchiquechose, s'en allait faithe un tas d'tchi. I' s'n allait bein vite arrêter tout ch'la, li - i' s'n allait faithe mithacl'yes!

Eh bein, tout d'un co i' dispathut. Et pèrsonne n'en r'vit janmais rein. Mais, eune vîngtaine d'années auprès, à la fîn d'eune forte tempête, tchiques pêtcheurs dé La Grève dé Lé sortîdrent au baté pouor vaie pouor du ouaîrage, car y'avait ieu un naûfrage sus Les Pièrres dé Lé. Comme i' s'adonnit il' entrîdrent dans l'Creux d'Lassé - un creux du côté d'Crabbé, au ouêst d'L'Ane, où'est qu' pouor des années à la fais pèrsonne né vont. Il' y trouvîdrent êchouée eune stchelette et, par la bague en or sus iun des dés, nou vînt à penser pus tard qué ch'tait bein seux la stchelette du fanmeux douannyi!

 

Chennechin fut raconté y'a bein d's années au docteur Fraînque Le Maistre par lé Sieur T. W. Attenborough tchi l'avait ieu li-même d's années devant ch'la d'un bouonhomme Jean Sarre

 

Viyiz étout:

 

Les Pages Jèrriaises