La fraude en Jèrri fut aut'fais un mêtchi hardi profitabl'ye, sustout dans la preunmié maîntchi du dgiex-neuvième siècl'ye. Et y'a acouothe eune mâsse dé gens au jour d'aniet tchi sont bein féthés, comme nou dit - héthitchièrs dé d'pis trais, quat' ou chînq généthâtions des hèrpîns aguenés dans la fraude d'aut'fais par lus anchêtres. Bein des pièches, dgia, né s'en doutent même pon, et nou n's'en va dgéthe sé d'menter d'lus faithe à saver, sans doute. Cèrtains anciens, pouortant, lé fichaient bein au nez à lus ennemîns quand y'avait occâsion! Et, véthe - y'a acouo des fanmiles qué nou connaît tchi s'saient p't-êt' à bouler chiviéthe dé nouos jours au lyi d'porter banniéthe sénon pouor les cheins tchi vêtchûdrent l'avant à ieux.
Chu commèrce fut d'grand' valeu pour bein d's années. Et l'affaithe 'tait traitée séthieusement par les gardes-côtes mais les fraudeurs 'taient souvent acouo pus malîns qu'ieux. En 1826, par exempl'ye, les gardes-côtes fûdrent dgèrnis qué nou 'tait à construithe un baté d'trente pids pouor faithe la fraude entre l'île et l'Angliétèrre. Et pis dèrché, en 1831 la Douanne dêcouvrit bein des nouvelles triques d'la part des fraudeurs. Ieune était d'muchi eune boêtée dé p'tun dans l'haut d'eune bârritchie d'cidre, dé châque but où'est qu' la gaûge du gaûgeux né pouvait aveindre par la bonde. Eune autre était d'aver des souaies dans les faux côtés dé câssées d'oeufs, ou dans des câssées d'preunes secques atout preunes haut et bas et des couoches dé souaie entre. Et pis étout, des poutchies plieines dé p'tun rouôlé pouor èrsemblier à des patates - châque "patate" enveloppée atout eune finne pé et rouôlée dans du pité d'tèrre! En 1834 un baté pêtcheux nommé "Rambler" fut saisi dans tchique hâvre en Angliétèrre ayant à bord 141 bârritchies d'litcheu muchies dans eune fausse câle. Enfîn, pouor donner acouothe eune autre exempl'ye - en 1848 lé Cap'taine du baté nommé "Eliza ", ieune des brigues appartenant à Ph'lippe Nicolle et Cie, ayant 'té arrêté, dêcliathit chein tchi siet, en traduction. "Lé matîn du 8 dé juîn j 'filînmes pouor Bouonne Niet et là j 'prînmes à bord à bein près deux tonnieaux et d'mi dé p'tun, d'la litcheu en bârrique, des cigares et du sno qué j'm'étais accordé dé transporter en Galles au taux dé chînquante louis du tonné. Arrivés à Fishguard, chînq jours pus tard, dans les onze heuthes du sé, j'aidgînmes à mett' la cartchaîthon à l'abri. Pis j'nouos en r'vînmes en Jèrri atout vîngt-deux brébis. À trais heuthes du matîn lé 22 d'septembre j'finmes route pouor La Grève dé Lé, dé St. Hélyi, et là j 'prînmes à bord dans les chînq tonnieaux d'fielles dé p'tun, du sno en balles, des boêtées d'cigares et plusieurs poutchies d'thée et câssées d'litcheu. J 'arrivînmes à Fishguard la niet du 25...", et cétéra, et cétéra.
Eh bein, né v'là don tchiques pétites histouaithes entouor chein tch'était la fraude lé temps pâssé. I' n'faut pas penser tch'i' n'y'a pon d'fraude dé nouos jours, sans doute, mais ch'est bein difféthent. Ch'est sustout eune affaithe dé drogues, à ch't heu, mais autrément ch'est bein p'tit en compathaison au temps pâssé.
F.
Viyiz étout: