Ch'est un mystéthe dé ioù qu'i' veint, l'nom d'ches bouaissons alcooliques - y'a tant d'histouaithes et d'légendes. Y'en a tchi disent qu'nou soulait donner ès cos litteurs un mêlange dé tout tch'avait 'té laîssi par les b'veurs ès aubèrges où'est qu'les littes à cos soulaient prendre pliaiche. Autrément ch'est qu' nou soulait rêmouer sa vèrrée atout eune plieunme dé co.
Y'en a d'aut's tchi disent, nou-fait, ch'est qu'des bouaissons 'taient sèrvis dans des cocotchièrs, et v'là tchi donnit l'nom au cocktail.
En tout cas, y'a des cocktails tchi sont hardi bein connus – lé vodka martini à James Bond, par exempl'ye: châtchi, pas rêmoué. Ès neuches et à d'aut's célébrâtions, un buck's fizz (du champangne et du jus d'orange) est populaithe, mais pouor dé mé ch'est gâzouoilli du bouôn champangne qué d'lé faithe sèrvi dans un cocktail d'même. Y'a d'aut's cocktails auve du champangne: lé kir rouoya (d'la crème dé cassis et du champangne) et l'împrobabl'ye nièr v'lous (du champangne et du Guinness).
Quand j'tais un êtudgiant lé bliu lagon 'tait populaithe ès partis. Ch'est du bliu tchuraçao auve du vodka et d'la limonnade, mais mêfi'-ous car auprès deux'trais vèrrées né v'là la langue tchi touônne bliue – sans pâler d'la craûl'lie et la jobelinn'nie!
Y'a un tas d'litcheurs dé difféthents pays faites sèrvis dans des cocktails. Par exempl'ye, y'a la mèrdgitte tch'est du téquila Mexitchain, d'la litcheu d'oranges (Couaintreau, Grand Marnyi ou tchuraçao) et du jus d'vèrt limon.
S'nou-s'a d's anmîns siez sé et tchiques boutillies d'litcheurs dans la cocktail'lie, i' vaut bein expéthimenter car, d'vant patchi ses tailes, i' vaut dêpatchi ses cocktails, n'est-che pon, bouonnes gens? Santé!
Geraint Jennings
Viyiz étout: