Quand nos Etats, à court de sous, y'a deux-trais mais,
S'imaginidrent de mettre un Impôt sus notr' thée
Et d'nos forchi, sans que j'l'eussions seul'ment d'mandé,
A payer la renchiéthe sus une nécessitè,
J'tais bein content de vaie que la "Chronique,"
- Une bouanne gazette, en fait de politique! -

Hâllait san veste, r'brachait ses manches, frumait ses poings,
Et capuchait à tigue-de-corps, sus touos les points,
Pour que l'publ'yic - et les vielles filles - et les pouorres gens -
Pussent acater, aussi bouan marchi coumme devant
Lus livre d'thée de d'sièz Mess Messervy
Ou d'sièz Cooper ou d'sièz lus êpic'yi.

En fin, nou s'en gangni, - car nou veint à but d'tout!
Et l'impôt fut 'r'lévè et nou r'eut ses huit sous.
Et un châtchun criyait que Jerry 'tait en paix.
Hélas i' n'en est rein, car ch'est pliaithe que jamais
Et je m'démande tch'est que j'nos s'n'allons baithe,
Ne v'la-t-i' pas un impôt sus la biéthe!

Ch'n'est pas seul'ment qu'je r'grette de vaie l's'Etats si duèrs
Mais chein qui m'fait sustout monter les lèrmes es yièrs,
Ch'est de vaie la "Nouvelle," en tchi qu'j'avais confiance,
Et qu'avait tréjous yeu, pour mé, toutes le prev'nances,
Oprès s'être tant battu pour le thée d'ma grand mèthe
Applaudir, des deux mains, un impôt sus ma biéthe!

Tch'est qu'éthait creu, qu'la gazette ès Jerriais
Ethait laissi passer, sans mettre san protêt,
Une affaithe comme chonna, un impôt dêtestabl'ye
Qui donne à Mess Couillar' l'air, le pus minzéthabl'ye,
Et qui rendra nos "shows" et êlections
Probabl'yement - d'bain tristes occasions!

Y'a-t-i' à s'êtounner si ch'est qu'la s'maine passèe,
Les jours d'oprès qu'l'affaithe avait 'tè publièe,
Nou viyait les patates à vingt-huit sous l'cabot?
Ch'tait honteux, j'en conveins, les marchands en font trop...
Mais pour chutte fais, tch'est don' qu'i' pouvaient faithe?
I' s'rattrapaient pour l'impôt sus lus biéthe!

Élie