Dans chu temps là, Fèrmi s'disait
D'la Terre être un Propriêtaithe!
Tout ch'qu'était bon, tout ch'qui r'lîsait,
Lis servait, - souvent pour mal faithe!

La Poumme, erlîsant tout l'êtè,
Dev'nait d'pus en pus grosse et tendre;
Mais s'innocence et sa bieautè
N'pouvaient pas du Fèrmi la d'fendre.

L'solei' brûlant, en sitchant l'fain,
Faisait rouogi san bieau visage,
Mais sus san trône on s'pliaîsait bein;
Et n'pensait pon à s'mettre en viage.

Au S'tembre, un jour, le Fèrmi vint
L'assonmmer à grands coups d'ravaulle
Le peûle! I' l'agni souos ses grins
En riant ét hautchissant l's'êpaules!

Sus la terre ou' resti longtemps,
L'Vêpre ét la Grive, et la Limache
Se ruant sus l'yi, vivant d'san sang,
Et lis dêfidguthant la fache.

Un bathi lis servi pus tard
De coffre! Et, sans cérémonie,
Oprès qu'oulle eut passè l'Hôgard
La Reine était bétôt finie.

Nou l'enterri la tête en bas!
Sa tombe était bein fraidde et duthe,
Etraite et ronde et mucre... Hélas!
Et jamais n'y craissait d'verduthe!

Mais l'Fèrmi n'tait pas satisfait
Sa haine allait pus lliain qu'la vie.
Et souos sa meule, affreux forfait!
La Poumme eut sa chair êgliammie..

l' voulit même occouo' la nier.
D'peux qu'ou se s'rait rêssuscitèe; -
Et, sus l'cadâvre, i' fut envier
De l'iuau d'la pompe à graud' bouq'têes.

Avec sa pelle, un p'tit pus tard,
Nou l'vit puchi le corps sans forme;
Nou l'vit l'êtreindre en un vrai mar'
Souos un êtau qu'était ênorme!

Dans un grand tchuai, le sang d'goutti,
I' l'transvâsi dans sa barrique-
I' l'bouoll'yi raidde - et pis l'gouôtti
Et dit que ch'tait d'tchi magnifique!

I' l'bait ach'teuthe à tout instant
Pour satisfaithe occouo sa haine;
Et convie, à longs jours, les gens
A baithe ov li le sang d'la Reine!