Pensèz don qu'en Jerry tout est mort!
Car les choses en sont v'nues jusqu'au piéthe;
Ah Haro, s'tu savais qu'nou fait tort
Es fermiers, en les privant d'lus biéthe!
Passèz la Canne! Euh!!

L's'autes annèes, les Shows d'boeu's, ch'tait d'tchi bé;
Nou'z'y'allait ou l'savez, en grand nombre,
Un chatchun s'y pliaisait, criyiz-mai...
Mais ach'teu', comme l'avenin pathaît sombre!
Passèz la Canne! Euh!!

Chu temps 'chin ov les vents au Nord'Est
Nou z'est g'lès quand nou d'valle de san querre
Et p'lès d'sai' - ou savèz bein tch'est qu'ch'est -
Mais nou' cherche en vain pour un p'tit verre
Passèz la Canne! Euh!!

Les fermiers sont réduits jusqu'à l'ieau!
Eche don drôle, si nou' pend les ouothelles?
Et s'nou fait de si tristes musieaux
Quand au lieu de bouanne jougue et bouteille...
Passèz la Canne! Euh!!

Ah! l'bêstcha souffritha d'tout chonna...
Tch'est qu'des juges peuvent aver le tchoeu d'faithe
Quand nou bait à la pompe comme un g'va
Et qu'nou ouait dithe à propos du baithe:
Passèz la Canne! Yah!!

Nos boeu's baivent d'lieau à bouq'tèe, ch'est seux,
Mais i' l'aiment - chest une grand' difféthence! -
Pour de nous, qu'en avons pustôt peux,
Nos v'la tous mins comme en pénitence:
Passèz la Canne! Yah!!

"Passèz la canne à yieau par ichin"
Ah mon doux! Nou' z'en vait pus d'une sorte...
...Chut! Tais'ous! En eth'ous un lèrmin?
Ne dites mot! Y'en a driéthe la porte!
Passèz la Canne! Ah!

Elie