Les Pages Jèrriaises

La biéthe


 


 


 


 


 


 


 

La biéthe est la pus vielle bouaisson alcoolique dans l'histouaithe. La pus vielle preuve dé l'existence d'la biéthe a 'té trouvée archéologiquement dans l'Êst du Mitan à eune date dans l'chîntchième millénaithe d'vant l'Christ, mais ch'est bein probabl'ye qu'les gens avaient dêmuchi la biéthe (par la fèrmentâtion natuthelle des grains) bétôt auprès lé c'menchement d'la fèrméthie y'a dans les douze mille ans.

La preunmié biéthe dé blié a 'té datée jusqu'à dans les chîn mille ans dans l'Êst du Mitan, et y'a dans les sept mille ans en Chinne nou brachait d'la biéthe atout du riz. Dans des difféthents envithonnements et tchultuthes, la biéthe a 'té grée dé difféthents grains: du blié, du fronment, d'l'avaine, du riz, du maïs, ou autchun aut' grain qué nou peut fèrmenter. Nou-s'a ajouôté des goûts: d's êpices, des hèrbes, des frits et du myi, mais l'ajouôtage du houbillon n'tait pon connu d'vant l'neuvième siècle auprès l'Christ en Ûrope. Les Jèrriais tchi travaillaient au Cannada connaîssaient la biéthe dé spruche. D'la biéthe au gengivre soulait êt' alcoolique, mais achteu nou graie des vèrsions sans alcool. D'l'ambrais à chein tchi pathaît 'tait fait sèrvi en Jèrri dans la brach'chie d'biéthe au run du houbillon.

La biéthe est la bouaisson alcoolique la pus bue dans l'monde, et la traîsième bouaisson entout, auprès l'ieau et l'thée.

La biéthe est grée conmèrcialement dans eune brach'chie. Un bracheux est l'chein tchi graie d'la biéthe. Nou c'menche auve du brais: ch'est du blié tch'a 'té prépathé pouor la brach'chie. I' soulait y'aver un moulîn à brais où'est qu'est la Rue d'la Mad'leine achteu à Saint Hélyi. Lé blié est trempé dans dé l'ieau épis nou l'laîsse gèrmer un mio, v'là tchi c'menche la graiethie d'chucres dans l'grain. Lé blié est s'tchi et rôti, ajouôté à d'la caude ieau épis bouoilli. Du l'vain est ajouôté à seule fîn d'fèrmenter l'mêlange, et du houbillon pouor d'la gouôte. Lé houbillon est étout antibiotique et dêcouothage des microbes dé dêv'lopper dans la biéthe, laîssant aînchin lé l'vain travailli sans compétition.

Lé por'teur est eune biéthe brachie atout du brais bein rôti à seule fîn d'produithe eune biéthe quâsîment néthe, et lé lag'èr est brachi à eune bâsse tempéthatuthe tch'est confortabl'ye pouor la manniéthe dé l'vain tchi l'fèrmente.

Pouor bein d's années en Jèrri, la brach'chie d'la Rue des Hèlles griyait d'la biéthe Mary Ann, et y'a d's annonches en Jèrriais pouor chutte biéthe-là. Y'avait étout d's annonches pouor lé Guinness en Jèrriais; y'en avait eune grande pouor bein longtemps à l'Aéroport.

À l'aubèrge, la biéthe est d'amors pompée d'bathilyies gazifiées, mais y'a des biéthes artisanales et traditionnelles qué nou peut acater étout ofûche en boutelles. Hardi d'biéthe est vendue au jour d'aniet en tinnes. À vot' bouan amendement!

 

Viyiz étout:

 

Les Pages Jèrriaises