Les Pages Jèrriaises

L'autre jour j'tais sus le bridge

L'autre jour j'tais sus le bridge a èscouté les d'vis de deux ou trais grands d'une paraisse iou que l'année tchi vint y s'en va y aver d's' élections et iou qu'nous a canvassé les électeurs d'pis déjà tchiques semaines !

J'vis arriver l'buanhomme Phlip, l'sien qu'est sec coumme un brochet et qu'a des c'veux qui frisent coumme des chandelles et un nez rouoge pour aver sucer trop de gliaçon. Oprès avoir passé sus l'bridge avec sa vannée de patates, y s'mint à attendre les marchands, mais tous les siens qui ergardites ses barils s'n allites sans l'y faithe de prix viyant qu'ils taient d'avis que chès patates n'valaient pon la peine d'acater. Son marchand de guano l'y offrit 16/-, mais l'buanhomme n'vouli pas les vendre à chu prix. Malin coumme une chouette y fit mînne d'aller du bord de l'un des stores et oprès aver traversi la ville s'en vint par Hill Street à la coue des autres vainées. Oprès avoir passé sus l'bridge une deuxième fais, du diantre si y n'eut pas un ètchu de pus pour ses patates ! Coumme s'faisait l'vier : Ch'est mé qui les ait joués chèst marchands.

***

L'affaithe bouoge dans la paraisse iou l'boss s'ra tréjous jeune, même quand il n'aura nonante ans et pus.

Mercredi au sé nos gens étaient sus pid et par les k'mins diversèment tard dans la nièth. Ils allites de divers bord.

Chein que j'sais pour seur, ch'est que les blieus voudraient aver un candidat éttout car si tchiques ieuns d'lus bord promites il y a quasiment douze mais, de batchi George si r'prenait pour la job de chantgni et qui s'en vont pour seur t'nir pathole, y voudrait èttout et s'en vont essayer raide d'aver un candidat pour bouller l'sien d'la Commune. J'sais bein qu'Alfred du bas de Rozel s'rait prêt à prendre le poste mais son ménage est quassiment à l'aute but du monde.

Claude, l'y est encore un mio trop jeune dans ses d'vis pour s'mêler des affaithes des autres et pour éprouver à ramener la paix iou qu'nou n'peut lavé san leinge sal en famille sans brit !

J'sis seur que ch'est John du Hurel qui f'rait l'pus de plaisi ès blieues mais y n'veur pon contester d'élection.

N'v'la iou que l'affaithe en est pour achteu mais pour seur y s'en va y aver une bordée d'élection et les femmes lus en mêleront, ch'est pourtchi l'sien qui s'ra l'prumi du mauvais bord pourra dithe : Ch'est la faute ès maudites femmes !

J'sis ès écoutes et j'espèthe bein que j'pourrai vos en raconter tchique p'tits buts quant l'affaithe s'ra finie car pour achteu j'aime mus taithe ma becque.


Caouain
26/6/1920
 

Viyiz étout:

 

Les Pages Jèrriaises