Ou savez sans doute que quand il enn'yie à un houmme siez li, i' ne d'mande pas mus que d's'en aller passer deuxtrais heuthes ailleurs. ch'n'est pas se'lment que v'là qu'i' y'aide à passer l'temps, mais y'a ètou la tchestchon d'êconomie. Par le temps qui va et d'la manièthe que la flieu et les êpices augmentent de prix, sans pâler que l'tchèrbon n'est pas sûs de r'moli, le mains d'temps qu'nou passe à sa propre tabl'ye et l'pus nou peu s'faithe nouorri par des amins charitabl'yes, le mus nou z'est au point d'vue d'sa paute et d'sa digestion. Pour de mé, j'nai jamais trouvès à r'dithe sus un bouan r'pas prépathè sus un autre feu que l'mein et tandis qu'man vaisin a bein voulu m'inviter à baithe du cidre de d'dans sa jougue, je n'me sis pon gênè si la meinne 'tait à peu près vièdde; ch'est p'têtre bein là d'la philosophie, mais si tè' est l'cas v'la qui veurt simpl'yement dithe que la philosôphie, ou du mains chutte philosôphie là, a du bon et hardi d'bon. Nou n'counnaît pas d'précédent (coumme les hoummes d'affaithes dîsent) yoù que j'aie jamais erfusè une invitâtion à prendre un r'pas par ailleurs.
Et, d'mème l'autre jour, quand une couôsine à mé, appathentèe au jen'saipuscombeinième dégrè me d'mandi d'li faithe le pliaisi (pensèz don!) d'aller baithe une tassèe d'thée ov yi et d'gouôter la gâche qu'oul' a fait d'après une nouvelle ercette, je n'pouvais pon sinon m'faithe un d'vé d'accepter. J'avais occouo à apprendre que nou n'vait pon tréjous au travers des ruses des femmes et mé, qui n'en ai pas d'expéthience, je n'pouvais pon mantchi d'être aisiment attrapè, - et j'y fu'.
Ma couôsine est Jerriaise. Ou'l' a 'tè el'vèe dans la campagne. San péthe et touos ses grands-péthes aussi l'yain coumme nou peut r'monter 'taient principaux d'pâraisse, surveillants, inspecteurs des qu'mins ou experts. Ou'l' a 'té à l'églyîse de d'pis san janne temps. N'y a jamais veu un seul mot à r'dithe sus sa condite: touos ses anchêtres ont 'tè conservateurs jusqu'au p'tit bu des ongl'yes. Et bein, ma couôsine, fille d'un principa d'pâraisse, v'nue d'une famille des pus conservatrice de Jerry, ma couôsine à mé, est dev'nue suffragette! SUFFRAGETTE!! Je n'l'éthais pas creu si j'n'en avais pas veu la preuve de mes propres yièrs.
J'en sis occouo à me d'mander si ch'n'tait pas un mauvais bardghin que j'fis d'aller prendre un r'pas siez ma couôsine pour être obl'yigi d'êcouter san bavin en faveur des votes des femmes et d'lus droiets. Ch'est difféthent dé si j'tais mathiè. Coumme tchi au monde que v'là qui peut m'intéressi, mé qui n'ai rein à faithe ove les femmes, et qui n'cherche qu'à l's'êviter, si ma couôsine veurt aver permission d'aller patruflier dans l's'assemblièes d'pâraisse? J'avais tréjous 'tè d'opinion, quant à mé, que ch'n'est pon les batd'lagoule qui nos manquent; jamais j'nai ouï personne se pliaindre qu'i' y en avait dîsette et je n'peux pon vaie du tout coumment qu'les choses îthont mus ov chinquante femmes spathèes, veuves ou vieilles filles, du calibre de ma couôsine envièes pardessus l'marchi dans une minséthabl'ye assembl'yèe d'pâraisse! J'savons tous bein tch'est que "caq'ter coumme une poule dênichie" signifie: n'y'a pas d'homme qui n'ait y'en à en souot'nin l'expéthience, malheutheusement pour li, au mains une fais dans sa vie. Mais, criyizmé, mes chiers lecteurs, tout chein qu'une femme peut dithe dans autchune autre circonstance n'est coumme rein et n'méthite pas même que nouz'y pense quand ou s'met à pâler SUFFRAGE, SUFFRAGETTES et SUFFRAGISME! L'expression d'moulin-à-clientchet n'lus fait pas justice! Ch'est coumme le dou't des Grands Vaux oprès siez s'maines de pl'yie; coumme une êcl'yuse de moulin qu'nou laiss'sait courre tout d'un coup; coumme la mer à la Pulente par un fort vent d'Seur-Vouest dans un jour de grande mathèe d'Mars.
Ma couôsine, qu'est maline coumme une pie, attendi que j'fusse assis d'vant que d'qu'menchi à m'laver l's'ouothelles de san sujet. Ou n'l'entammi pas devant être suthe que je n'pouvais pon m'sauver hors d'la vaie. Sans faithe la mine de rein, ou' me d'mandi d'abord combein d'nos Juges qu'étaient mathiès! et si ch'tait vrai que l'Juge Vaudin avait dit un jour devant quatorze personnes, à la Nouvelle Chronique, que quand i v'yageait en Russie, il avait veu des dames de l'aristocratie fumer des cigarettes et qui n'viyait pon pour tchi lus en faithe de r'proches et qu'la police angliaiche f'thait tout aussi bein d'laissi Miss Spankhurt en r'pos coumme de la pourchasser par tout l'pays parce qu'oul avait env'yé une poignie d'gravi à la f'n'être d'la lav'thie à Mess Will Crooks ou à tchic autre membre du Gouvernement.
J'ouvrais ma bouoche pour lis faithe tchic sorte d'rêponse mais d'vant qu'j'eusse peu dithe un seul mot, l'affaithe quemanchi pour de bon.
En m'versant ma prumié tassèe d'thée, ou' m'caltchuli à une fraction près la proportion du rât d'la ville qu'est payi par chaque sexe et dans la même haleine ou me d'mandait si j'avais fait l'même caltchul pour la pâraisse de St.Cliément? En m'mettant du lait, ou' me d'mandi si l'Counnetabl'ye de St.Sauveux 'tait aîsi à persuader quand nou sait s'y prendre et si y'avait chance que l'Deputé Priaux souotinsse la cause des suffragettes dans lés paraisses su Ouest si l'affaithe en v'nait là? D'vant m'passer l'assiettèe d'beurrèes, fallît que j'l'y'adminsse que la reine Victoria avait gouvernè avec pus d'charité qu'Henri 8 et qu'Abdul Tchicchose, Sultan d'Turquie.
J'mordais à même ma beurrèe pour la prumié fais quand ou m'arrêti tout court pour mé d'mander m'n'opinion sus l'attitude de Moussieu Asquith dans la distchussion du projet pour la conciliation des femmes. Coumme j'n'avais pas d'opinion là-d'sus, j'm'en allais lis dithe, sinon qu'ou s'mins tout d'un coup à compter combein de vouais que j'pouvais faithe dans nos deux vingtaines de haut en m'y mettant d'bouan tchoeu et en qu'menchant en temps.
En s'extchusant pour n'aver pon passè les radiches devant, ou m'asseuthi que jamais l'Député Cory n'éthait deu mettre la qualification d'servir dans la milice coumme un droiet à voter dans une êlection et que jamais i' ne f'thait adopter d'itèt par une assemblièe d'personnes sérieuses - nan, pas s'i' vivait jusqu'à l'âge de chent ans, - qu'ou dis!
J'êprouvi à lis dithe que sus chu point là j'tais d'accord avec lyi, mais dès qu'ou vit mes lèvres bouogi ou m'passi la piatlèe d'rhubarbe en s'mettant à raconter par ordre alphabétique les noms des voteurs de la Trin'tè qui, dans s'n'opinion, sont incapabl'yes d'voter drait dans une êlection et devraient être hallès de d'sus la liste du rât, et dêcliathès aver besoin d'être mins souos curatelle.
V'là qui lis prins abouan d'temps car chutte liste là dé être moyennement longue, mais v'là qui m'dounni au mains l'temps d'mangi un mio, - mé qu'étais v'nu pour chonna! J'n'avais qu'à faithe un signe de tête de temps en temps quand ou disait l'nom de tchic ouaisé que Mess Bisson a sus san gros livre coumme n'ayant pas occouo settlè ses viers comptes...
Par bonheur, j'pu' profiter d'une seconde y'où qu'ou r'prenait haleine (entre les P et les Q) pour lis d'mander de m'passer la gâche et pis l'affaithe erprins. Ou fut finie d'sa liste d'vant mé d'ma gâche et en m'versant une deuxième tassèe d'thée ou s'mins à m'prêchi sus l'êgalitè des sexes au point d'vue d'la louai et sus l'Economie domestique d'Adam et d'Smith. (Mé, qui n'avais jamais entendu ches ardghuments là d'vant, j'en fus tout êtounnè, mais j'mé d'mandais tout d'même sus tchi que l'vier Adam pouvait bein pratitchi d'l'êconomie domestique, li; - pour Smith, je n'dithais pon, mais pour chein qu'Adam possédait!...) mais jè n'm'en allais pas distchuter ov ma couôsine - merci!
Pas une patholle je n'pu' dithe, - pas y'unne qui n'est qu'yunne et bétôt quand j'fu' rassassiè, j'frumi l's'yièrs et m'renvertchi sus ma tchaîthe.
Je n'sai' pas combein d'temps que j'dormi; ma couôsine ne s'en aperchut pon mais l'malheur est qu'ou prétend que j'lis promins de souotnin l'suffrage toutes fais et quantes; de pâler en faveur; d'êcrithe des articl'yes pour; de cherchi des vouaix; de trouver des signatuthes à toutes les pétitions; de porter l'banner par les rues d'la ville quand y'étha des démonstrations et enfin de garder tréjous man parleux prêt pour y muchi les siennes qu'éthaient peu passer lus poing à travers les auzainnes de la salle des Etats. Ou prétend que jamais la police ne pens'sa à cherchi là et que, en attendant, qu'i' piessent s'naller en D'Ghernezi, j'trouvthai tréjous assez d'run à m'couochi sus une poutchie d'rabotins driéthe l'êtabl'ye dans la tchèrpent'tie!
Ah, m's'amins, que ch'est ichin un monde de minzèthe! - M'y r'viyous, à porter un banner: VIVE LES FEMMES, DOUNNER LUS VOUAIX à la tête de chinq chents veuves et vieilles filles un samedi l'arlévée, tout l'tou' du Vier Marchi ov une orgue d'barbarie qui jouaithait: "Partant pour l'Assyrie" sur l'air de Malbro?
Elie
Nouvelle Chronique de Jersey 27/4/1912
Viyiz étout: