Les Pages Jèrriaises

St.-Laurens. - L'Élection


Réponse du Couosin John au Couosin Kliément

Tu d'mande, couosin Kliément,
Si je sis ben malade.
Oui! j'men vais t'dire coument
J'ai erchu unn' salade:
Le sé d'vant l'êlection,
Oprès ma longue course,
J'entri siez Frank Ouelbé,
Je dêhali ma bourse,
Pis je m'rafraîchi l'bé.

Mais, oh! malédiction!
Le mal-à-tête me prins,
Et je manqui ma route.
(J'n'avais pon mez ammins):
J'étais tout en dêroute.
Quand je vins à sortir,
J'm'encouori coum' unn' balle:
J'érais voulu dormir,
Ma tête faisait brimballe!

Je prins le mauvais k'min:
(Ch'était le k'min d'la ville.)
Ov mé, pas un anmin,
Et pas sèlement ma fille.
Je d'cends le Mont-Fêlart;
Mais unn' pierr' fêsant rouelle
Souos men pi - bachouart!
Tout men long j'm'êtravelle.
Là, je d'meur' êbaubi
Dans l'pus profond bourbi.

Hélâ! j'pensi: qui honte
Pour un bouon tee-tôt-leur:
Pour mé, que tous l'monde comte
Un fameux goude-tem-pleur!
Et l'êlection - que faire
Demain, oprès dîné?
Mon doux! mon doux! mon père!
Mé qui sis dans l'puté!

Qui mont! ch'nest pas l'Mont-rose,
Je t'asseure, men Kliément,
J'n'y r-irait pon d'unn' pause.
Tout bouon'ment,
Men Kliément!

Là! j'tai compté ma paine.
J't'en prie, ne le r'dit pas
Partout la Ville-au-Bas.
Si j'ai fait unn' frédaine,
Y n'faut pas m'exposer,
Et fair' les gens jâser.
Est-i' besoin de dire
Que je sis bleck-aisè?
Dit qu'je n'peux pon êcrire,
Qu'j'ai l'bras paralysè!

Et quant à l'organiste,
Dis-li don, men fistaud,
De mettr' sa bouon' batiste;
Qu'ou peut sauter en haut,
Et faire unn' bell' pirouette.
Je n'veux pon li fair' tort,
La pouor' petit' drinette,
Quand je serais assez fort
Pour les faire! Et pis, damme.
Fair' tort à unn' bell' femme!
Et pis, n'ou dit partout,
(Unn' autre idée malinne),
Que ch'est qu'oul est étout
Unn' ben pouor' orféline!
Et que sa mère
Est grabataire.
N'ou dit qu'en êlection
N'ou peut dire des brûlées;
Que tout moyen est bon,
Vère! pour ben qu'ou z-arrivées.

Pour finir, men Kliément:
Si tu'es mélancolique,
Je t'invite franchement;
Vein ouï rnot' bouon' musique,
Et not' superbe chant,
Qu'ont la vèrtu magique
D'apaîsi ta l'instant
La pus mauvaise colique,
Même la plus cronique!
Vein promptement,
Men Kliément!

 

Viyiz étout:

 

Les Pages Jèrriaises