Trenton, Michigan, USA.
Lé 16 dé janvyi, 1982.
À la fin des fins! La gâzette du dgiex-neuf dé novembre, 1981, veint d'arriver, et j'vai l'rêsultat d's êlections pour Sénateu. J'sis content d'vaie qué l's êlecteurs dé l'Île ont ieu l'avis d'voter pour continnuer les gestions des Sénateurs Ralph Vibert et John Le Mèrquand, deux fanmeux Jèrriais d'bouannes vielles fanmil'yes, et les deux seuls hommes sus les chînq candidats tch'ont des noms Jèrriais. Madanme Baal, sans doute, a un nom Jèrriais étout - san nom d'mathiage. Et i' faut complyimenter l'Sénateu Shenton d'aver ieu l'pus d'vouaix dans toutes les pâraisses - même à St. Ouën!
V'là tchi m'ramémouaithe qu'eune arlévée quand j'tais assis sus un banc en d'vant d'la Salle Pârouaîssiale dé St. Brélade, lé bouanhomme Ben Shenton (lé Sénateu est-i' sans fis?) vînt s'assiéthe à côté d'mé, et à ma grand' surprînse i' c'menchi à m'pâler en Jèrriais! I' l'pâlait parfaitement et sans êtrange accent.
J'l'avais connu, lé Sieur Ben, dépis qu' j'avais quatorze ans et qu' j'allais par "train" en ville touos les jours travailli dans l'office à Moussieu Binet. Les Sieurs Ben Shenton et Bill Nolais, deux grands forts hommes, 'taient en chèrge des travailleurs tchi gardaient les rails du train en bouan êtat pour lé rouôlement d'ses engîns, cârrosses et ouadgîns, et il' 'taient bein populaithes auve les gens tchi les viyaient touos les jours à St. Aubîn.
L'êlection pour Sénateurs par les êlecteurs dé toute l'Ile mé fait penser au temps qué ch'tait-là la manniéthe d'êlithe les Juges. Et j'crai qué ch'tait eune bein miyeuthe manniéthe qué la cheinne d'aver un Collège Electoral à l'faithe comme à ch't heu. Comme l'affaithe en est, un membre înfluentiel du collège tch'a un anmîn en veue comme candidat peut l'proposer avantageusement en s'y prannant en temps et en pâlant à ses collègues. V'là tchi peut aver eune tendance qué les collègues lus contentent d'aver un candidat tout d'amain et n'sé gêner pon d'trouver d'la compétition. Et i' y'a ieu des candidats tchi n'taient même pon Jèrriais êlus par lé collège tchi n'éthaient ieu autcheune chance d'êt' êlus par les êlecteurs dé l'Île.
Quand un Juge 'tait êlu par toute l'Île, y'avait quâsi tréjous d'la compétition. L's êtrangièrs n'avaient autcheune chance d'êt' êlus et j'avions des Juges tchi savaient nouos trais langues et tch'avaient, en général, ieu d'l'expérience comme Connêtabl'yes d'lus pâraisses dans l'administrâtion et la louai. J'avions un Banc d'Justice vraiment Jèrriais.
Dévant tchitter Jèrri au c'menchement d'novembre, i' m'sembl'ye aver ouï tch'i' s'en allait y'aver eune êlection pour Députés dans l'mais d'dézembre, et j'ai hâte dé vaie les préchaines gâzettes pour saver les rêsultats.
Ch'tait mangnifique dé vaie l'souôri sus la fache du Sieur Maurice Buesnel auprès aver pèrdu s'n êlection eune traisième fais. V'là tchi montre tch'il est couothageux et un bouan pèrdant.
J'tais întérêssi d'liéthe dans la gâzette qu' un cèrtain nombre d'fèrmièrs craient qué v'là tchi vaudrait la peine d'êprouver à r'colter des patates à la vielle faichon à la pliaiche dé l's endommagi en les r'coltant à la machinne. Né v'là eune raide bouanne idée si ch'est possibl'ye dé les vendre à un prix profitabl'ye.
Quand nou vait comment tch'i' rouôlent dé d'ssus la machinne tchi l's êrachent, tchiquefais à maintchi p'lées et souvent couvèrtes d'tèrre, nou n'peut sénon penser ès vainnées d'belles jaunes et nettes patates, auve des bathis d'quat' cabots couronnés d'grosses patates dé parfaite forme et couleu d'or, spécialement chouaîsies et appelées des "toppers" en Angliais et Jèrriais étout.
Les jannes d'aniet n'ont pon veu d'ité. Ont-i' même veu l'fanmeux crapaud tchi rendait honmage ès Rouoyales dans tchi tch'i' s'muchait dans l'temps d'la dêfouithie, souvent en dangi d'pèrdre sa vie par contacte auve les dés d'la frouque?
Mais comment les dêfoui au jour d'anniet à la frouque auve lé manque et l'couôtement d'la main d'oeuvre? Et j'me d'mande tchiquefais si les patates dé Jèrri r'éthont janmais la priorité dans l'marchi Angliais tch'il' avaient d'vant l'êpoque du "Marché Commun." Tch'est tchi sait?
Viyiz étout: