Achteu, pour r'vénin à nos moutons né v'chin tchiques versets que j'trouvi muchi dans la pouchette de veste d'un Trin'tais et que j'li print tandis qui romfliait coumme un steam roller. Ch'n'est pas de la volelie, et les Chantegniers peuvent rester sièz ieux, car le morcé de papi, je r'mint dans la pouchette oprès en avé prins copie:
Dans la pâraisse de man biau cliochi,
I' r'y a quâsiment yeu du bri,
Qué les rouoges et blieus partis
En ont presque tèt rès môtchis,
Car i' failli yavé opposition
Au sujet de l'êlection,
Au mitinne qu yeut l'autre sé
Pour chouaîsi un Prévôt du Roué.
Wal s'était mîns en avant,
N'pensant pas qu'i' yavait de concurrent,
Et il allit vais Charles pour le proposé,
Et Ph'lip qui d'meuthe sus l'Câté.
Mais Charles lus dit que Joe voulait
Etre Prévôt, pour de l'Assise d'Héritage aller au dîner.
Sus chouna Wal ne prit pon,
Et Joe fut êlu sans opposition,
Car ches zouaîsiaux là qui vont êcrithe drièthe la Cour
Ne lus s'entre jouent pas souvent des tours;
Et i' n'aiment pas lus entre grimer,
Si ya moyen d'en èscapper.
Et achteu qu'ils ont mîns Joe,
De la Trintèt, le Prévôt;
De la Milice, il est fini.
Et ya unne chance pour Arti
Dé v'nîn, ch'tannèe, yun des sergents,
Et d'aver le drouèt à mettre des gants,
Ch'est pourtchi il attend fête pour le camp,
D'pis qu'il a haouchi de rank
Et dans la mess i' pouorra aller,
Avec les Sergents fricotter.
J'en sis bein aise de chouna,
Veu qu'Arti est un mio d'licat!
Caouain
Chronique de Jersey 8/6/1912
Viyiz étout: