Les Pages Jèrriaises

L'êlection à Ste. Mathie

Ki ri-ki-ki
Ka-ra-ka-ka

L'êlection à Ste. Mathie. J'y fus, comme un tas d'autres, pour senti. Y'avait un bouon fliotchet d'gens attroupés à l'entou d'la Salle quand l'rêsultat fut dêcliathé, mais chose êtrange assez n'y avait pon l'excitement qu'nouséthait creu. L's êlections d'acheteu n'sont pon les cheinnes d'aut'fait; les gens sont bein pus sérieurs qué dans les vièrs temps. J'pensais d'aver eune ordée d'fanne, de vaie des couleurs, ouï d'la musique et d'la dgeul'lie, vaie d's hommes soux, etc., mais nannîn, n'y'avait rein d'chenna.

Tout pliein d'bâl'lie d'goule mais pas grand rêvillon. La pâraisse avait 'té en suspens et y'avait bein des pièches d'êtchu d'gagies quant au rêsultat. J'vos ai dit qu'y'avait du monde et jé l'répète. La population d'la p'tite pâraisse avait cru chu jour-là au mains d'la maîntchi. Nou sait qué dans pathelles occasions i' s'en trouvent des pâraisses vaisinnes tchi n'ont pon grand' chose à brâsilli, et ch'est étou eune bouonne opporteunité dé v'nîn s'entchêter d'la santé dé iun, au mains, des candidats! Et pis, étou, comme l'aut' jour à Ste. Mathie, des êlections s'adonnent pûtôt dans l's arriéthes saîsons - mais don, si tel n'est pon l'cas, d'habitude nou peut aîsiement fabritchi tchique extchuse pour s'y trouver. Par exemplye, nousétha chu jour-là eune rente à r'chéver des héthitchièrs Maît' Jean Bigthé d'la Landelle, ou ofûche i' faudra aller réglier auve Cliém Lé Bro du Huthé pour les p'tits animaux qu'nou li' acatit dans la Faithe. O véthe, rein pus aîsi qué d'prendre eune vacance un jour d'êlection! Enfîn, v'là tchi n'fait pon d'ma à pèrsonne et j'pathis qué sans ch'la ches bordéeschîn es'saient dé bein tristes affaithes, toutes faillies tch'i' sont à compather ès cheinnes d'aut'fais.

Pour en dithe deux'trais d'hors-pâraisse tch'étaient là, y'avait à c'menchi l'Fraînque du Huthé (i' n'a pon cru fort dépis qu'jé n'l'avais veu, mais i' pathaît en bouonne santé), Charles Siex Rues (tch'avait oublié san tchias et n'pathaîssait pon trop à s'n ais). Frainque dé Lé (tch'a aidgi à faithe bein d's êlections par lé passé), lé gros Jean d'la Ville au N'veu (tch'est seux d'être chentenyi tchique jour). Edmond d'la Bagatelle (atou sa plieume dans san chapé), Jean des Tours (qué j'apèrchu à mangi dans la tente comme un affamé), l'Georges d'la Haule (pas rasé mais dgai comme pînchon) et l'Jean du Haut d'la Rue (St. Ou) tch'est porté pour lé fanne et aime bein un mio d'excitement d'temps en temps.

Y'avait eune lingnie d'vaituthes du but d'la Vèrte Rue beintôt jusqu'à la Rue Mahyi, et du bliu riban sus toutes les deux ou trais câsaques qué nou rencontrait. tout d'abord nouséthait creu qu'i' n'y'avait qu'un parti car lé rouoge, s'i' y'en avait, n'tait dame pon bein visiblye. Mais, sans doute, ch'n'est pon l'habit tchi fait l'mouine; du tèrme, ch'n'est pon tréjous l'riban tchi gangne l'êlection!

Il est pus ou mains entendu, j'pense, qué l'êlection fut condithe comme i' faut et sans r'proches contre autchun. Y'a des reumeurs, naturellement, mais ch'est d'la part des mauvaises langues, et nou n'en tcheint pon d'compte - tout d'même, n'y' p'têt' pas d'ma à vouos dithe un mio d'chein qu'j'ai ouï. Nou m'ai dit qué l'Henri L'Mèrquand fut veu l'sé du dimanche dé d'vant par Iouville, à qu'si des vouaix appathemment. N'y'a pas d'ma dans ch'la nan, mais la pèrsonne tchi m'racontait chennechîn entendit tch'il éthait deu être à la chapelle à prier pour san candidat à v'nîn d'dans. J'lî rêponnit qué n'y'a pas d'doute tch'il îthait l'dimanche en r'vénant! Et pis j'ai entendu étout qué l'Charles Bisson sortait hardi au sé du bord du Rondi y'avait tchiques sémaines et qu'nou soupçonnait qué ch'tait rapport à l'êlection. Mais d'mandez, est'che qu'un homme né peut pon faithe eune promenade pour sa santé auprès san jour dé travas, s'i' v'là tchi lî pliaît? Lé Raymond Lé Cornu fut veu dans l'bel dé l'hôtel à înviter l'Pigeon du "Critic" à v'nîn baithe eune fais.

Eh bein véthe, i' sait parfaitement bein qué l'ouaîsé a 'té altéthé d'pis sa naissance (quand ousa bu la méthe nouss tréjous sé!) mais ché n'tait pas pour faithe sa vouaix car lé Pigeon né d'meuthe pas dans les bouaîs'sies d'la pâraisse, et pis d'ailleurs, ch'tait auprès l'êlection! Nou m'a lavé l's outhelles d'un tas d'tchi acouo tchi n'est pas supposé d'être seu - y'a l'Jean L'Mèrquand tchi n'couochi pon à san iet pour trais nyits après qu'i' r'vînt d'France (souodisant, ch'n'est pas mé qui l'dit) et Georges d'la Haye tchi s'traînait par la Hougue Maugi et amont la Rue Motchi, la tête en bas et les mains dans ses pouchettes. Chein qué j'dî, mé, quand y'a eune êlection en allant y'a chent mille reumeurs par les c'mîns et pour un rein nousest soupçonnés d'être à travailli dé d'ssous et mithacl'ye à quatre!

Nousa ouï étout qu'y'en eut trais ou quatre tchi faillîtent à aller ès Ecréhos pour un couplye d'jours. I' n's'en fallit pon fort qué nous n'les entraînîsse, j'pense, pour un viage à bouon marchi, pour les empêchi d'voter, sans doute, mais la mé boulait gentiment et nousabandonnit. Estche la véthité? Ma fé, j'n'en sai rein, mais v'là tchi s'faisait hardi l'temps passé et j'm'imaginne que nou lé f'sait acouo bein s'nousavait la chance aujourd'aniet!

L'êlection finnie, jé m'rangi comme bein d'autres à la tente des rouoges au bas d'la rue tchi mène au Pont, ouêque y'avait eune divèrse bouonne tabliée d'maintcheint, eune tabliée, ma fé, comme nou n'vait pon souvent considéthant qu'tout 'tait gratuit! Et y'en avait du catchet, sous la tente, ch'tait piéthe qué dans l'Pûlé. Pis auprès ch'la j'm'en fus m'faufiler siez les blius, baithe tchiques drammes à la santé d'lus candidat, pour montrer qu'i' n'y'avait autcheune rantcheune dé ma part, et j'fus sèrvie comme un moussieu étou! Sans doute, (j'avais oublié à l'dithe du c'menchement) j'tais pûtôt du côté des rouoges.

Eh bein, tchi sorte d'chentenyi qué l'Ph'lippe Lé Feuvre f'sa est la tchestion tchi s'pose au moment actuel. espéthons, comme touos les Ste. Mathiais, qu'i' n'sortitha pon trop souvent d'sa bouaîs'sie, qu'i' freumtha ses yièrs et bouch'cha ses ouothelles dé temps en temps et qu'i' n'enrichitha pon la pâraisse atou d's amendes, mais espéthons étou qué si tchitchun êprouve à lî piler sus les pids i' vouos les pînch'cha et les f'sa danser! Quant au vier chentenyi châtchun sait sa valeur car il a rendu d'bouons sèrvices et est acouo acheteu aussi acti et mannigat comme un gamîn d'giezhuit ans. Souhaitons qu'i reste en poste jusqu'à sa nénantième!

Mais tch'est qu'j'érai ouï, qu'il y r'étha êlection pour député, et d'vant longtemps? N'împorte, nousen r'pâl'la pus tard - nou vèrra acouo du fanne!

Marie la Pie
Cs 3/10/1936

 

Viyiz étout:

 

Les Pages Jèrriaises