Mon chier Mess l'editeur, - J'ai pairdu l'adraisse dé mon couôsin Flip; si ou voulais maittre ma laittre dans votre Chronique p'taitre q'y la verra:
Man chier Flip,
J'attendi jusqu'à un quar' de sept, pour tai Vendredi paissait, car tu m'avais promains de v'nai mé criait pour allé au "Town hall," pour vais tchique les candidats pour l'Election avais à dir'; ah bain, quan' j'vi tu v'nais pas j'men allit tou seu, car, tu vait, j'tais tou prêt, et j'avais mains une naitte kémainse et un beau "tie" pour la serrais.
Ah bain, mé v'la au "Town Hall," parmi tous les messieus, ait y'en avai quatre sus les d'grais, à vous djaittai en passaint mais j'monti alright, et j'eu la chance d'avai une buonne piaiche, tout dans lé d'vans; il tai justement sept heurs quan' Mons. Le Connétable monti le "platform," avec tous les autres, et y comenchi à nous dir' des tas dé choses qué j'avais lus dans les papiers, mais quan' il eu fini, n'é v'la lé docteur Godfrey qui saute, mon buonne houmme, tout dans lé d'vans du "platform," ait comenche à nous pâlai dé l'avoca Nicolle, ait quan' il fut fini Mess Le Huquet nous d'mandi tous dé voté pour Mess Renouf; épis y'avait le Chantgni Ouless pour Mess Tom Lé Tchaine; Chantgni Cory pour Mess Gallichan, du square, ai Mess Sinnatt pour l'Avoca Richardson, épis lé dairn'yi étai Mess Vautchi pour Maît' Douar Laurains, et après qu'ils avais tout fini, l'é v'la Mess Orviss qui monti sus le "platform" et leur d'mandi tous une tchestion, comme si ch'tai un "examain" d'Ecole du Dimanche!
L'Avocat Nicolle été le premi à nous pâlé et y nous dis des tas dé choses que j'savaîmes tous d'vant. epis y nous conti une p'tite histoirre d'un Beu et des crapeaus, et y nous dis que le Beu avai pillait sus les crapeaus, mais son "strong pint" étai sur la Louèt, sur les Testaments, et j'crai, si chez comme y nous dis, qué chez une buonne chose.
Mess Renouf été le préchin à pâlé, mais yen avai tchiquens en driair qui n'voulais pas l'laissi, mais quand y comenche il y'en faut pus qu'chona pour l'arrêtai, et sais-tu bain, man Flip, qu'après qui nous avai di tou, j'sis bain seux que chez pas sa faute que les soudars sont hors, il a tait bain poussait à fair chique qu'il a fai, mais y'a pas dé soin j'verrons qui s'ra pas bain loin du haut du "poll" le gran' jour.
Après li Messe Le Tchaine prains san tou, et ma fé! Flip, j'savais pas qui pouvai pâlé si bain, et j'tait pas du niolin n'intout, son speech étai plain de bon sens, ait j'crai qu'y serai un buon homme dans les Estats.
Epis lé v'la lé petit Messe Gallichan, du Square, qui komenche à nous pâlé, et saistu bain, man Flip, qui m'ergardi tout drai, et di, qui vallait bien la paine dé dêpensé tchique louis pour avait l'plaisi de vais tous ches biaux messieus d'évans li; ah abain, Flip, saistu bain entre nous nou pourrait fair' pièr, qué mettre Mess Gallichan dans les Estats, car chez un homme qu'on peu s'fier dessus, et quan' ils sont pas de buonne humeur là-bas j'sis bain seux qu'y peu les fair' rir'. Apis y nous dit que y'avait des ervenants dans lé Fors et qué les ras allais pas y restai d'autre, mais j'crai q'uy dît chuna pour fun, ah bain, quand il eu fini d'pâlé il t'ai passet neuf heures et il faisait si caud là d'dans, que j'men r'vins à la boutique pour "frumé" épis j'em en alli mé cuochi et j'raîvi toute la nyait que la Grand' cour était plaine de beus, et d'crapeaus, et d'ras, et d'serpents, et d'paisson...
Abétos man Flip, j'te vairai dans l'marchi lé jour de l'Election.
Ton couosin,
Johno.
La vieille boutique
d'Union Street.
10/12/1904
Viyiz étout: