Les Pages Jèrriaises

St.-Laurens. - L'Élection


Ah man doux, man pouor John,
Dis mé, ès tu malade?
Tu n'as pas ieu grand fun,
As tu r'chu unn salade;
Ou ben est-che Miss Pid-roué
Qui a ieu la victoire;
Quand tu t'en tes allè,
Tu ne voulais pas m'craire.

Ah! si j'avais ben seu,
J'crais parti en ville;
Car j'ai grand mal au coeu,
V'là q'uimm' rêmeut la bile
De oui tout chu train là,
Et n'avé mot à dire.
Y y'en avait jusqu'à
Q'uavaient la mine de rire.

Bé unn' tasse de thée,
Ne fait pon si laie mine,
T'uaimais mus Miss Konnouée
Que ma propre cuosine;
Maiss d'pis q'u chest Miss Pid-roué
Y n'y pas rein à faire,
Je sis bein aise, ma fé,
Qu'ouille ai ieu la victoire.

Donne mé deux d'gouts d'liqueu
N'mélourdes pas la tête,
Je m'sis trouvé tout seu
De m'en bord, à la fête;
Mess Konnouée ni l'Chantgni,
Pas même Mess Morel,
N'étaient là pour m'aidgui,
Ni l'couosin Philip Pinel.

Y y'a Tom Saumarée
Qu' y a attaqui l'e Viquaire,
Ma fé y fallait l'vée,
J'pensais qu'il allait braire.
Et pis Monsieu Houpé,
Et pis Monsieu l'Viconte,
Y'en ont conté, ma fé,
Assez pour li faire honte.

Chain qui m'fait l'pus mârri,
Ils ont sonné la clioche
Aussi longtemps quasi
Comme i font au Dimanche;
J'allais siez le couosin Douard
Pour bère un verre de bière
Ma fé, j'ai r'virai d'bord,
Car j'tais si en colère.

 

Viyiz étout:

 

Les Pages Jèrriaises