En Jerri, il n'y a rein de dithèt qu'une élection pouor éclairer les gens!
N'v'la qui s'entend pouor les siens qui veulent saver à tchi s'en tenir sur chein que l's'autres pensent d'ieux.
Ch'est d'même, si une fais qui sont en office nous lus fait hardi d'compliements quand vint l'moment d'la députation pouor lus d'mander d'r'prendre lus job, il en est autrement si ch'est l'intention de s'porter candidat pouor une autre poste et qu'il y a élection.
Et quand lus amins viennent pouor canvasser ch'est alors que l'candidat est habillé d'un tas de r'proches et déshabilly d'autant de capacités.
Chein qu'est pire, ch'est que si nous n'peux rein dithe contre l'sien qu'est candidat nous va jusqu'à déterrer les morts pouor dithe que l'pépée ou la mémée était un grippesou ou un rein qui vaille.
Touot chunna est dit en secret! Et nous en laisse entendre pus qu'nous n'dit.
Ch'n'est pon de tchi d'même que j'voudrais vos raconter, car touot chunna est du pithèt et couomme nous dit: Quand nous écopie en haut, ch'la vos r'chiet dans l'bec. Ch'est dantchi y faut mus n'pon en pasler.
Quant à mé, j'aime mus raconter tchiques p'tites histouèthes qui n'f'ront d'mâ à personne sinon d'faite rithe les siens qui n'y sont pouor rein, si l's'autres sont d'humeuthe d'en ritonner d'peur d'être la riselée d's'autres si nous apprenait que c'tait ieux qui fites les r'marques que chutte maudite babillarde Marie Hibou met dans la gazette.
Ch'est à l'entouor de l'élection pouor juge qui faut que j'vos raconte tchiques p'tites scènes risibles.
J'connais un oisé d'une paraisse que quand on alli ly d'mander sa vouaie pouor ieun des candidats y s'fit que jamais de sa vie y n'voudrait mettre une croix au but du nom de chu candidat et chunna viyant qu'il y a tchiques années il fut mins à l'amende pendant la visite des qu'mins!
Tchès qu'est l'sien qui fut réveilli au mitan d'la nièth par un grand d'sa paraisse qui s'promenait avec s'n'arme et ly d'mandi pouortchi qu'il allait voter?
N'v'chein une histouèthe qui n'est pon une histouèthe en touot d'pis que ch'est la pure, pleine et entièthe vérithèt, fouai de Marie Hibou.
Chunna s'passi dans la paraisse ou s'passi, il y a tchiques mais ieun des pus grands évènements que nous ai enregistré dans les rôles de chutte paraisse, c'estàdire une élection pouor Chantgni sans baithe, même pon la séthée d'la nomination du sien qu'est achteu en poste.
Donc Jack d'la rue à l'ieaue - il 'tait à canvasser pouor un buveur d'ieau - Jack avec son parchonnier. George était à faithe une touornée d'la paraisse.
Quand vint un temps, y frappi à la porte d'une maison dans l'vaisiné de chein qui n'est pon d'vos affaithes.
Ch'est la Missis qui ly réponni et oulle s'fit: Buan, tchès que ch'est achteu.
- J'sis à canvasser pouor juge.
- Est-ce té qu'est candidat? Tu peux compter sus mé et l'buanhomme, si ch'est d'même.
Ch'tait bé seur, un grand honneu pouor Jack, mais couomme y s'fit, nennin, ch'n'est pon pouor mé que j'sis à canvasser chutte fais, mais pouor Mess Brée. L'amin George s'approchi à san touor.
En l'viyant la Missis s'écriyit: Bon, t'v'la à canvasser achteu avec les buveurs d'coco, eh bain tu peux être seur je n'voterons pon ton bord chutte fais, car l'iaue et l'coco n'v'la qui n'd'valle pon avaut la gorge. J'en avons bein assez de ses buveurs d'coco dans la paraisse.
Et ch'est oulle ly en conti!
L'amin à Jack n'en r'venait pon et couomme il l'y fit un p'tit pus loin: Ou tiens d'sa mémée. Ch'n'est pon mé qui voudrait avèr une femme couomme chunna siez mé.
Dans chutte même paraisse, quand nos gens qu'étaient à canvasser voulutes regagner lus motor ils aperçutes un oisé souos les rouages. Ch'tait Georges et quand nous l'déshalli de dessouos y s'fit qu'il s'tait mucchi d'même criyant que ch'tait des gens qui v'naient pour voler ses poules.
Iun de ceux qu'était à cavasser ly d'mandi: Georges, pouor tchi qu't'es?
Georges de répondre que la dernièthe fais il 'tait pouor Mess Brée. J's'rais pouor ly encouore à chein qui s'fit, mais...
- Il n'douonne pas à baithe?
- Tu l'as, ch'est chunna!
Dans une autre paraisse une mémée avait dit à son fils qui, maltheusement, n'est pon des pus smarts, qu'il fallait qu'il aille voter pouor Mess Brée.
Chutte mémée ieut la précaution de s'asseuther qu'nous aiderai son fils à rempli l'bulletin de vote et en pasli à ieun des grands d'la paraisse.
Oulle ly dit tant d'fais qu'il n'fallait pon faithe de méprinse et n'pas s'laisser détouorner chu aucun compte que quand vint l'moment d'mettre sa croix il marmotait "Baudains, Baudains" touot l'temps d'peur d'oublier! Et deux ou trais fais nous ly d'mandi si ch'est qu'il tait bein certain pouortchi qui voulait voter, touos chein qu'il pouvait répondre était: Baudains, Baudains!!
L'jour d'l'assermentation, en sortant d'la Cohue Royale, une brave femme, s'faisait que ch'tait honteux qu'un homme qui prêchait la tempérance à longueur d'jour avait ieu l'audace d'invithèt les gens à baithe à sa santé selon la buanne et ancienne couotume. Et chutte femme est ieunne de celles qui d'la vie n'a jamais touché un lermin d'ieaus de vie.
Y sont touos d'mêmes, qu'oulle s'fit. Une fais qui sont à haut ils oublient l'passé.
Ieune d'ceux qu entendit chutte r'merque s'fit: Mais Missis ch'est la couotume pouor ces Messieurs et pis ch'n'est pon d'la litcheur qui lus offre.
- Et tchès que ch'est donc?
- Ch'est du vin!
- Oh, si ch'est d'même n'v'la qu'est allright.
Et chutte brave femme rentri sièz elle satisfaitte, car oprès touot l'vin n'est pon d'la litcheur!
Caouain
1929
Viyiz étout: