Mousieu, - Eh bein veth d'ghia ma fé, ou zavais yeu dêja "deux Viers" pour Correspondants; eh bein n'en v'chein un traîzième, tchi coumme yieueux est vi aitou, et bein vi par sus l'marchi, yia pus de trente ans
tchil tait dans l's'Etats; dans chu temps là yiavait du pliaizi oquo, mais achteu, dé chein qu'man fis man dit, chest de tchi bein triste. Y patheais qué yia un' houmme tchi voudrait changhi tout, pour le seul pliaizi de tout changhi; l'aut' jour yieun d'ses "Collègues" l'y d'mandit:- "When are you going to be good"? Mais dam' chest tchi rêponnit bein set, et bein rupaiement:- "When you do as I tell you." Né v'là justement l'houmme, faut faithe coumme y vos dit, ou bein carrous ou sen Moter-kerre passe par sus vous.
Le travas a doublet depis veingt ans, dans chu temps là yiavait oquo un mio de camarad'die entre les Membres des Estats, et surtout entre les Juges. Mais achteu, à chein qu'nou m'dit, y sont à s'entre ghettai
coumme des cats à guetté une suouthis, pour vais si n'peuvent pon en trouvé tchiqu'un avec lus pain dans l'sa. Y semblétheait qué tchicq'uns craient qué l's'autres s'enrichissent et sont fortunne sus l's'Etats.
Yia unne chose assais bein certainne, chest qu'les Juges ne font pon fortunne achteu, le temps de tchi j'paulle, y faisaient unne veingtaine de louis par an, v'la tchi lus payait lus lunch quand y v'naient en ville. (En Ghernézi les Juges erchèvent devieirs £80 par an), les siens dé Jerri en ont dé £6 à £7. Le temps passai y'l avaient l'avantage d'avé lus contrats passais sans frais, y n'avaient qu'à payi l'enregistrement. Achteu les Estats les font payi pour la signatuthe du Bailli, et n'ou s'attend qu'au pustôt y faudra tchi paient pour lus propre signatuthe. Mais pour les cou' d'pids y n'en manque' pon, y sont traitaies d'unne manniethe tout à fait libérale quand y s'agit des cou'd'pids.
Tout l'teintamarre dans l's'Estats n'est fait qué pour tâchi dé dêgouôté les hoummes de v'nin en avant servi lus p'tit pays. Yien à tchi n'cherchent qu'à rendre l'Administration impossible, et y s'y'en trouvent tchi sont tuous prêt à lus aidghi; mais "wait a bit," quand y faudra payi les "pots
cassais," la musique chang'gea, nou n'en voudra pus, mais j's'sa trop tard, nou puourra faithe des greinnes, mais faudra payi!!
Et pis les Connêtables, tchil embarras qué tchicq'uns d'yieux ont yieu. Ergardais combein qué l'sien d'Grouville fut eslourdai, et l'sien de St.-Sauveux, houmme dêja âgi et paisible coumme tout, tchi n'voulait pon avé les Assembièes la gnaigt, et tchi cherchait à pièthe à quatre, véthitabliément il a fallu changhi la Loié pour l'empêchi d'être embêtai pus longtemps. Toutes ches choses là ne font autchun bein à l'Ile, et bétôt persounne ne voudra servi sa Pâraisse, pour être tintamaraies coumme chounna. Yia unne buonne chose, chest qu'les Counnêtables puourront achteu avé lus Assembiès quand y voudront, sait le matein ou l'sé, sans s'geaîné si Mousieu tel ou tel, est otchupai par ailleurs; même quand y s'c'ait un Juge et même otchupai à la Cour. Né v'là qu'chest qué dêtibotchi "le Cat tchi dormait": il est si facile tchique faies d'allé se ruoullé sus unne vêprièthe, et s'y faithe pitchi sans l'voulé. Les Anghiais appellent chounna: "The irony of fate."
Yieun Tchest Dêja Agi.
St.-Hélier, 12 Mai, 1905
Nouvelle Chronique de Jersey 17/5/1905
Viyiz étout: