Sam'di passait y vint me vais,
Et me dit, "L'anmin Flippe,
Venais un jour beze du tais
Et ptuné une pipe,
En aucun temps yézà siès nous,
Une gorgie de cidre doux
Pour vous,"
Oh! ho! ho! ho! Ah! ha! ha! ha!
J'entrezai quand j'îzai par là,
Là, là.

Piès y me dit, "Vechin Janvi
Qui bain vite s'apreche,
Y nos faudra bétôt choisi
Qui j'allons mettre en plièche.
De nommé nos réprésentants,
Je cré qu'il en est betôt temps,
Nos gens."
Oh! ho! ho! ho! Ah! ha! ha! ha!
Prépazous tous pour chu jour là,
La, la.

"J'envions," di-ti, "dans les Etats,
Depie bain des annaïs,
Une vraie racachie d'ingrats
Qui nos ont rit au naïs.
J'avons, et j'en fais les aveux,
Mins la quezue devant les beux,
Messieurs."
Oh! ho! ho! ho! Ah! ha! ha! ha!
Pâle ti bain chet homme-là.
La, la.

"Combain de fais que j'ai bisqui,
Souvent même j'en plieuze,
De les entendre nos prêchi
Mingnet à quatorze-heuze.
Y sont tréjoue à nos conté
Qui vont bétôt tout reformé,
Ma fé."
Oh! ho! ho! ho! Ah! ha! ha! ha!
Qui reforme y nos ont fait là,
La, la.

"Si souvent va le pot à liau,
Qu'à la fin y se casse;
Et de chès faiseurs de biau-biau,
A la fin nou se lasse.
Pour mé je hait les orguilleurs,
Les parvenus, et les faiseurs
De teurs.
Oh! ho! ho! ho! Ah! ha! ha! ha!
A qui fait-ti alluzion la?
La, la.

"J'espeze bain que les villais
Connaissent lue zafaize,
Et qu'en nommant lue députés
Y sezont bain qui faize,
Quand a voté pour Dujardin,
Je cré que chès du vrai gniolin,
L'anmin.
Oh! ho! ho! ho! Ah! ha! ha! ha!
Ya du vrai dans chan qui dit-là,
La,la.

Pie Maîte Jean prins san chapé,
Et dit, "A la préchaine;
Il est grand temps de men allé.
Mais d'ichin à quinzaine.
La Trin'tait va se rêvilli,
Je n'allons pas nos endormi,
Pargui.
Oh! ho! ho! ho! Ah! ha! ha! ha!
Jezons du fanne chu jour-la,
La, la.

L'ANMIN FLIPPE.