Comme j'ramontais la Route à la Pendue hièr l'arlévée j'rencontris l'Bouan'homme Mess Amice Gabouothé. "Ma bouannefemme mé disait hièr qu'oulle avait veu dans la Chronique qu'nou n'peut pon voter pour un Juge, ach't'heu!" i' m'dit: "Ch'est drôle, ch'là, - et mé tch'avais des candidats dans l'idée dans la préchaine êlection!"
"Bon," j'li dis: "Les tchés qu't'avais dans l'idée!"
"Eh bein," i' m'dit: "J'avais pensé à Moussieu d'St. Ou pour iun, - et pis l'y'a not' Connêtablye, - il est temps qu'i' s'sais rêcompensé pour aver 'té Connêtablye si longtemps! Et l'y'a Maît' Douard Le Feuvre de Grosnez, et Moussieu Hâcou tch'a tchitté comme Député! Et Freddo Maugi, l'Inspecteux des marchièrs! I' f'thais tous d'bouans Juges, - et j'dév'thons aver pus d'St. Ouennais dans l's'Etats! N'y'a rein qu'un villais qué j'voudrais vaie Juge. Ch'est un Moussieu tchi va hardi siez l'Connêtablye. San nom en Jerriais es'sait "Couvreux en g'yi." I' n'sait pon fort lé Jèrriais, mais tu pâles tch'i' peut vouos en dêclianqu'ter en angliais, man bouan'homme!"
"Mais, arrête eune munute, amice!" J'lî dis: "I' n'y a pon d'Juges dans l's'Etats ach't'heu!"
"Si fait, l'y'ena!" i' m'dit: "L'Juge Edwards, tchi souongne d's'intéthêts des fermyièrs, est acouo là, et l'Juge Le Mèrquand, tch'est en faveur de nouos bâti des talustres dans la baie d'St. Ou!"
"Véthe!" j'li dis: "Mais i' n'sont pon dans l's'Etats comme Juges, i' sont Sénateurs, ach't'heu!"
"Eh ben mafîngre!" i' m'dit: "J'ni connais pus ni bliu ni blianc, mé! Tch'êque ch'est qu'un Sénateur?"
"Amice," j'li dis: "Nou vait bein qu'tu n'es pus au couothant d's'affaithes! Tu n'sai pon, don, que l'vi système tchi nouos avait donné la prospéthité n'valait rein, et tch'i' fallait l'change? Ch'estentchi les Juges ont 'té rempliaichis par des Sénateurs, et les Recteurs par un tas d'Députés! Lé titre dé Sénateu a 'té empreunté d'l'Améthique, car i' n'pouvaient pon penser à un titre Jèrriais, - et pis il' ont pensé que v'la tchi f'thait pliaisi ès Améthitchains, et tch'i veindront p't'êt' acater acouo pus d'vaques en Jèrri!"
"Mais i' m'semblye que Moussieu l'Mathinné est acouo Membre, pourtant," Amice mé dit.
"Véthe!" j'li dis: "I' pathait tch'il a eune drôle d'idée qu'san d'vé est d'souongni dé s'n'églyise preunmiéthement et d'la politique oprés, - ch'est pourtchi il ont pensé tch'i' n'les embêt'tait pon fort, li, - et comme il est Douoyen d'l'île, i' l'ont laissi là pour dithe les priéthes!"
"Veurtu m'dithe qu'un Juge n'est pon bouan assez pour siégi dans l's'Etats?" Amice mé d'mandit.
"Nannîn!" j'lî rêponnis: "Jé n'veur pon t'dithe d'ité! Mais j'té dis qu'la louai a changi: Un Juge siége dans la Cour Rouoyale, mais i' n'peut pon siégi dans l's'Etats ach't'heu a mains tch'i' s'sait un sénateur étou. I' peut êt' les deux en même temps."
"Eh bein! En v'là-t-i', du mêlange!" Amice mé dît: "Et comment qu'les Juges s'en vont êt' êlûs, ach't'heu?"
"Par lé Collége Electoral!" j'lî dit.
"Bon," i' m'dit: "J'n'avais pon ouï pâler d'chu Collége-là, mé! J'criyais qu'i' n'y'avait rein qu'lé Collége Victoria en Jèrri! Ch'est vrai qué jé n'mé promène pon fort ches jours, autrement j'l'éthais p't'êt' veu. J'né pon mîns l'pid en ville dépis quej'mé teurtis la gu'ville du pid gauche en sautant dé d'dans man hèrnais lé s'tembre passé, - et j'n'èrgarde pon fort la gâzette, viyant qu'j'ai besouain d'eune neuve pathe de leunettes. ma bouannefemme dépichit mes vielles eune séthée quand ou' s'assiévit d'sus! Ch'tait ma faute, - jé l's'avais laissies dans la tchaise ioù qu'ou' s'assiet à liéthe la Nouorrituthe de l'Ame dévant s'couochi! Enfin, j'peux bein signer man nom sans leunettes, et j'avais tréjous ieu l'ambition d'signer l'papi d'nomination d'un juge dévant mouothi, - et j'sis hardi dêmins qu'ches Mêssieux-là en ville ont changi la louai devant que j'piêsse lé faithe!"
George d'La Forge
19/3/1949
Viyiz étout: