Et'ous-là? Et'ous-là? Et'ous-là, don?
Oui! Tch'est qu'ch'est? Tch'est qu'i pâle?
Ch'est mé, mé, mé!
Extchusez, je n'comprends pas, tch'est qu'chest qui m'pâle?
Ch'est mé, j'vos dit mé, Elie. Ne r'counnaissous pon ma vouaix?
Nannin? Ch'est.... Mélie tchi? qu'ou dites?
Oh, d'jantre: - Mé; j'vos dit, mé, Elie; - pas Mélie ELIE, votre Elie, le seul Elie. entend'ous ach'teu? Ch'est VOTRE Elie.
Oh bon! fallait l'dithe, don. et fallait d'viser un mi pus cliai. tch'est qu'tu r'veurs?
Rein! Ecoutez: Ph'lip Le Gros: chent quarante-deux! Ph'lip Le Feuvre: septante-tchun'... Oui, chent quarante-deux; - septante-tchun'... Oui, j'en sis seux. Je l'tchein d'la bouche du Juge Aubin...
- Tchi mâjorité! T'en r'veins-tu?
Oh, pas occouo! Eh! bein vaithe! M'en r'venin ach'teu? Faut que j'vaie si j'pourrai ertrouver man crayon siez Mess Jarnet; j'l'avais oublié sur l'assiette à fromage!
Brrrrrrr...
Et ne v'là coumment que l'résultat d'l'êlection à St.Louothain fut annoncé par téléphone d'abord à Mess Bisson et pis à tout l'monde par le grand papi qui fut mins dans la f'nêtre d'la Novelle Chronique avec les chiffres dessus. qué v'là qu'attithi un peupl'ye!
Ah! j'men dounniti d'la peine chu jour là, par le temps qui faisait.
Coumme la séthèe d'la nomination, Mess Bisson n'avait pas voulu m'donner pus d'quat sous pour payi man train! prétendant que nou m'ramènethait en vétuthe. (J'pensais d'abord qu'il avait dit: ratrain'rait, mais quand j'lis d'mandi tch'est qu'il avait dit, en prenant man parapluie par le bu, man parapluie à une grosse tête à la bouanne vielle mode, i' dit bein cliaith'ment: ramèn'na).
J'eu la chance. A miéqu'min du mont, l'docteu Marret - que non dev'thait app'ler Moussieu d'Avranches (coumme sans pèthe avait nom) me rattrappe avec sen automobile. Il avait 'té qu'si deux êlecteurs qu'avaient, l'un mal au pi et l'autre un mio d'fraid, et coumme i' y'avait occouo du run en travers, sus lus pis, i' me d'mandi d'monter. I' s'rapp'lait d'la bordée d'lautr' sé et d'une petite sornette que j'lus avait contè - pour l'honneu' d'la gazette et un verre de limonade.
Si ch't'auto-là avait'té un gh'va - ou même deux gh'vaux - éthaiti'tè lassè!!
J'tais à peine assis d'dans que j'arrivions! J'nos trouvîmes fliantchis endré l'Parish hall dans l'mitan d'la route et du pité; les quatres fièrs en l'air! Quand j'nos r'lévimes; le docteu' dispathaissait dêjâ drièthe les Trais Bouais, à feu d'galop, si s'non peut s'ecprimer d'même au sujet d'une vétuthe dans quédolle.
L'hôlouoge mertchait oquo 12h 10 à peu près, mais il 'tait ben une heuthe de mains et je m'mins à r'garder chein qui s'passait. Pas d'musiques, pas bannièthes. Mais d'l'animâtion! En astu? en veurstu? n'en v'la! J'ai veu' d'sêlections par tout Jerry, mais j'vos asseuthe que quand les Saint Louothenchais s'y mettent, n'y'a pas pardevant yeux. Si j'tais Saint Louothenchais... mais tch'est que j'gagne?...
Ch'tait châque de main par ichin, châque de main par là; galoppe ichin, galoppe là; va vaie par ichin va vaie par là! Pl'yie, vent, pité, casaques mouoillies, bottes crottès, gh'vaux hord d'haleine, cigares à maintchi fumèes, pipes dêteintes, mousses sous les pids, tchans à la vaie, cabbies altéthès, reporters partout, deux photographes (Mess Tynan passit sa matinée gindè d'bu, sus l'haut d'la pompe à attendre pouor les vaie porter l'gagnant à la haute dgherre!) clioches de bicyclettes, cônes d'automobiles, caqtéthie, distcut'ties, extchus'sies, promesses pour seux, esprit du scrutin, respect d'la loé et enfin tout l'ba-ta-cliam d'une èlection bein contestèe.
Je n'mé ravis pour qu'là vieille Chronique eusse restè siez l'yi. Ch'tait pon là une plièche pour des anciennes coumme chonna. Tout l'monde pâlait, couothait, r'gardait, allait, r'venait, s'trempait, s'sètchait, se r'trempait derché. Tchi journée! N'y'avait qu'l'hôlouoge qui restait tranchille. Ou n'bouogi pas pus qu'on n'a fait fait déd'pis douze ans. I' f'thaient aussi bein d'la d'valler. Si l'animâtion d'Mardi n'put pon la rêvillyi et la rapp'ler à san d'vé, oul est bein fichue et l'seul établ'yissement qui lis conveint est l'Musée dans Pier Road. Moussieu l'Avocat Nicolle: prenez en note!
Pour de mé, j'm'en alli. Nou m'avait dit qu'Mess Jarnet, du British, avait d'bouan fromage et qu'il avait acatè vingt ou trente pots d'lait à Wesley Mallet. Coumme j'avais sé et qu'les vaques à Wes. ont une bouanne réputation en Améthique, j'm'en alli bèthe un verre de lait et brinotter une galette et un mio d'fromage de roquefort.
J'dêhalli justement en temps pour ouï l'résultat. Mess Tynan 'tait occouo sur sa pompe et prins des portraits, mais Mess Le Gros, ou pustot l'Chantgni L'Gros, n'fut pon porté à la haute dgherre, La gazette vos dît. Mêcrédi, coumment qu'chonna s'passi. Man travas, à mé, est simpliément d'soigni d'rapporter chein qu'les autres ont oublié et négl'yigi. Et fortune sait s'ils en oublient et en négl'yigent, les reporters, quand i' s'agit d'êlections!
Man prumié soin, naturellement, oprès aver criè "hourrah," pour faithe coumme le restant, fut d'couorre à l'Arsenal dithe le rêsultat à Mess Bisson. Falait bein lis prouver que j'valais mes quatr' sous!
Ouz'avez déjà lu notr' conversation par téléphone.
Oprès ch'là, coumme je vos l'disais, j'men alli fini' man fromage et ma verrèe d'lait...
Pour le restant, chein que j'vi' et chein que j'dis, et chein que j'fis, ch'n'est pon la peine d'en pâler. I' suffitha d'dithe que j'me r'trouvi sain et sauf à ma propre porte.
Elie.
P.S. - Mess Jarnet n'est pas trop content à mé. J'avais laissi man parapluie dans san ch'yi et quand j'alli l'ramasser hier au sé, i' m'dit: Tu n'avais pas qu'faithe de dithe dans la gazette que j'avais ordonné chinquante chinq douzaines de bouteilles de bièthe: j'eus trais fais pus d'monde que j'm'attendais. I' nos en vint d'par tout Jerry. Et j'fu' obliji d'téléphoné à Randall à douze heuthes pour trais autres barriques et d'aver une pipe de cidre de d'siez Ph'lip Gibaut.
7/10/1911
Viyiz étout: