A la Trintai yia unne trentaine d'annaies, yieu unne êlection tchi fut fortement contestaie, ch'tait pour Connêtable. Ch'n'tait pon le "Luothi" contre la "Rose"; les partis 'taient dêja connus coumme "Les Ruouges" et "Les Bieus."
Yiavait un buoun houm' Mait' Tom à Rôsé, et un autre sus la "Campanne," ch'tait Mait' Josué; persounne ne savaient de tchi côtai tchil' taient, ch'tait un p'tit mio sus l'preincipe, "des premiers venus, les prumiers servis"!!
Le matin de l'êlection, les carosses des deux partis furent pour nos deux hoummes. D'un côtai yiavait l'Chantgni quétait un "Ruouge" des "Ruouges," et Mess Cabot, il 'tait un tout "Bieu" des "Bieus," châtchun dans sa vétuthe, avec les couleurs du parti au fouet. Le "Bieu" tait l'prumi à Rôzé et preins Mait' Tom à bord, justement coum' le Chantgni, avec sa ruouge cocarde arrivait, mais ch'tait la vieille histoithe, il 'tait justement "unne minute tard"; che fut là tchi s'meindrent à "rêcé," à tchi arriv'theait l'prumi au haut pour prendre Mait' Josué, ils allaient quédaine, y faisaient peux à vais: le Chantgni avait les miyeu ch'vaux, et y dêpassit Mess Cabot en arrivant à haut, mais il 'tait tel'ment pressi, que d'temps en temps y r'gardait par la f'nêtre d'san cab pour vais, tant et si bein, qu'unne buounne fais san chapé tchit dans la rue, et y fut oblighi de d'sendre pour le ramassé, mais v'la tchi permeins es "Bieus" d'passé l'avant et arrivé les prumieirs à la hèche. Laissons Mess Cabot raconté l'histoithe:
"Le Chantgni dans sa vétuthe nos suivait d'près,
J'prends Jo par l'bras, li par le fond de ses brès;
Je teins bon... je hali, tout en cratchi,
J'pensais que la preinse allait m'mantchi.
Je fît un êsfort, je tchit sus l'dos
Dans le fond du cab avec Mait' Jo...
Le cocher tchi viait, pas au galo,
Laissant le Chantgni seul sans san balo!!
Mait' Jo dît, il a 'tait indélicat,
Y n'étheai pon deu m'attrapé par là;
Mes brès étaient bouannes, j'en étais bein,
Le morcé à pres' restai dans sa main;
Le Chantgni ma fait grand mà, je créthais
Tchi y'ia laissi la merque de ses daigts!!
Alfred Messervy
Almonnas d'la Nouvelle Chronique 1907
*La poésie est un but d'Vote Secret, ou Votaies Par Balo - r'înmprînmée pus tard dans Les Chroniques de Jersey lé 27/12/1939
Viyiz étout: