S'lon toutes les appathences, nos v'la rouôlés en fait d'Election pour Juge. A bon d'monde - j'pouôrais quazi dithe, tout l'monde - sé fiaient la d'sus pour nos aîdji a roublié chutte fichue djèrre, et nos v'la tous d's'appointés. Mais tchez qu'ou voulez quand les candidats d'ach't'heu n'ont pon pour deux liards de "pluck"! Je m'faisais seux qu'Moussieu l'Cornu s'n'allait nos protchuthé la jouée d'voté pour li; car, ne vos y trompez pas, ch'tait la l'candidat d'man chouêx! Ch'est la l'houmme pour tchi j'éthais voté, a drouette, a gauche, sus toute les couôtuthes. Et pis, a la dernié minute, après avé 'té ès frais d'met eunne belle anonce sus les gazettes, i' fiche san camp, sans dithe pourtchi ni pourtchêche, justément coumme j'm'étais décidé a met' toutes mes capacités a san sérvice! J'n'appèle pas ch'la jonnie de sa part. Et tchès qu'en est d'san coummité et les nombreux élécteurs qui y'avaient d'mandé en grace de s'met' sus les rangs?
Ch'est pas qu'j'aie rin a r'dithe contre le Counnèstablye Pepin, bin au contraithe. Moussieu Pepin est un bouon vier Jerriais "en tchi n'y'a point d'fraude," coumme il est dit dans la Biblye, et d'un sens j'sis bin aise que j'sait li qu'aie la djob. Mais j'avais fait man compte qu'y'éthait eunne éléction! J'm'étais fié d'allé oui des "speech", j'avais compté sus "open-house" dans toutes les paraisses, ov toute la calfait'tie du temps passé. Les gazettes sont tréjous a nos dithe que chést un grand privilege que j'avons en Jerri, d'èslithe nos Juges. Justement! Mais quand n'y'a pas d'éléction tchès qui d'vint d'nos privileges? Ch'est de ch'la que j'me pliens; ch'est coumme si nou m'vollait tchiq'chose!
Ou'ès qu'sont les temps passés? Ch't'ait la l'bouan temps! Y'avait tréjous deux ou très candidats pour chaque poste; vos en souv'nous? Y'avait des réunions dans toutes les paraisses, des carosses a touos les car'fours, du jambon, d'la musique, et souvent des coups d'bâton, et, en fin d'compte, ch'tait tréjous un houmme de grande capacité qui v'nait preumi, et les gazettes chantaient ses louanges, et nos disaient que, au bu du compte, les electeurs de Jerri 'taient boustrément pus intélligents qu'nou n'lé dithait a vaie lus fache.
"N'y'a pon d'elections parc'que n'y'a pas d'candidats," m'dithous? "Nous a bieu lus dithe que la pliéche de Juge est tout ch'qu'i' y'a d'pus distindji (sans pâslé d'allé en carosse ès frais d'l'île et ès Mintchiers dans l'Duc) les balloques n'en veulent pon." Hé bin! d'pis qu'ch'est d'même, faut les forchi, gasdéouélle! Nou forche bin les paraissiens d'être Inspecteurs des C'mîns ou Officiers de Police, et d'même! Pourtchi pas servi les Juges de la même moniéthe? Mé même, y'a bin d's autres, la Cour me condâmni a tchiq'chose coumme sept louis d'frais viyant qu'j'avais r'fusé d'être Inspecteur des C'mîns, et j'en ai veu d'autres servis d'la même moniethe pour avé r'fûsé d'être Offici d'Police. Hé bin! Tchès qu'empêche d'en agi d'même quand i' s'ajit d'un Juge? Si nou peut noummé un Offici d'Police contre sa volonté, j'propose que nous en faîche autant pour un Juge. "J't'avons chouézi pour être Juge, man fiston," nou lis dithait, "et Juge tu t'en vas être le restant d'tes jours, ou sînon...." Et si ch'est sept louis d'amende pour un Inspecteur des C'mîns qui r'fûse d'inspecté, hé bin, ché s'ait tchiq' chose coumme deux chents louis pour un Juge qui r'fûs'sait d'jugi. Y'a ti du bon dans m'n'idée?
Piteur Pain
16/9/1916
Viyiz étout: