Les Pages Jèrriaises

Mait' Tom Bliampi ou Moussieu L'Sueur, B.A.
Deux mots d'pliat Jerriais sur une Election et deux Candidats.

Moussieu l'Juge de Quetteville n'est pus,
Jamais ses pids ne r'passont s'n'us,
I nous a tchittés pour tréjous;
Et en l'faisant il a laissi
Une plièche viedde qui faut bein rempl'yi.

L'moussieu qui s'offre à nous d'abord,
Pour remplièchi le sien qu'est hors,
En servant sus les Comités,
En Cour Royale et dans l's'Etats,
Ch'est Moussieu L'Sueux qu'est un... B.A.

Un autre ètou dit qu'il est prêt
A prendre sa plièche ov nos jurés,
A mettre sus ses épaules "la ruoge"
Et faithe san d'vé pour bein servi
Lé p'tit îlo qu'j'app'lons Jerri.

Deux candidats - une êlection...
L'tchèt qui vaut l'mus? v'là la tchestchon,
A vous êlecteurs d'y repondre,
P'sez lus valeur - choiesissez bein...
Donnez l'verdict Mardi tchiveint.

Sou n'savez pon tch'est qu'est l'miyeu
Rapp'lous au mains qu'Jerry achteu
A grand besoin des viers Jerriais
D'solides êcl'yis du vièr choutchet -
V'là chein qu'i faut au jour d'anièt.

Le poste d'Juge! ch'est un honneur
Décerné par les êlecteurs
Au sien qui l'méthite, qu'en est digne...
Lé tchèt qu'ou z'i mettrez des deux?
Mait Tom Bliampi ou Mousieu L'Sueux?

L'prumi des deux a travailli
D'pis sa jeunesse pour san pays
Il a qu'menchi au bas d'l'êtchelle
I n'êprouve pas dans un seul saut
A v'nin jusqu'à la broque de haut!!

Mait' Tom Bliampi dé d'pis longtemps
A fait ses preuves - en travaillant
Sans aver honte des pus p'tits postes
I l's'a rempl'yis modestement
Et fait san d'vé conscientieusement.

Jerriais, j'cré qu'tout chein qu'il a fait
A certainement bein méthité
Une rêcompense - n'l'oubliez pas.
Fidèle dans toutes les p'tites affaithes
Il f'tha les grandes d'la même manièthe.

Si d'Moussieu L'Sueux je n'vos dit rein
Ch'est qué j'né l'connaît pas trop bein
J'sait simpliément qu'il est B.A.
N'ou n'peut pon jugi d's'en avnin
Par ch'qu'il a fait d'en par ichin.

Mait' Tom Bliampi nouos appartchein
Ch'est yun du peupl'ye - nou l'connaît bein;
Jerriais n'seyis don pas ingrats;
Donnez li ch'tchi'l a méthité:
Une êcrasante majorité.

Elie
1903
 

Viyiz étout:

 

Les Pages Jèrriaises