Nou n'peut pon dithe exactément quand tchi' qu'Les Êtats fûdrent êtablyis. Mais j' savons tch'il' existaient au tchînzième siècl'ye, et probabliément longtemps d'vant chu temps-là étout. D' après La Chronologie de Jersey, oulle existait en 1497. Lé 28 d'Octobre dé ch't' année-là, L's Êtats fîdrent des règl'yes au sujet d's êcoles St. Mannelier et St. Anastase. l' n'pathait pon y'aver grand'chose par êcrit tchi peut nouos donner la date dé lus originne. Charles Lé Tchêne, dans san "Constitutional History of Jersey", nouos dit qué les r'cords des Êtats c'menchidrent en l'année 1602 mais tch'il' avaient 'té dêtruits d'vant ch'la dans un feu.

Les Êtats ont changi avaû les siècl'yes comme Jèrri li-même, car aut'fais i' 'taient constitués difféthemment tch'i' n'lé sont àch't heu. Par exempl'ye, les Jurés-Justiciers siégeaient dans L's Êtats aussi bein qué sus L'Banc d'Justice dans La Cour Rouoyale, et ch'tait ieux tch'étaient nommés à la tête des difféthents Conmités.

Les douze Recteurs dé l'Île y prannaient lus pliaiche étout et les douze Connêtabl'yes et les Députés tchi sont êlus par châque pâraisse.

Les Mêssieux d'La Couronne 'taient là étout, mais ouaithe tch' I' fûssent tchique-fais d'mandés d'donner lus opinion officielle sus la légalité dé tchique proposition d'vant La Chambre i'n'avaient pon l'drouait d'voter. Moussieu l'Bailli est l'President d's Êtats et ouaithe qué lé Lieut'nant-Gouvèrneux sait pèrmîns d'siégi (sans voter) à côté du Bailli, san siège est tchiques pouces pus bas qué l'chein du Bailli.

Les Êtats ont veu un tas d'changements d'pis la dreine dgèrre et l'Otchupâtion et sustout d'pis 1948, car lé 29 d'Avri 1947 les gens fûdrent învités à voter dans les Salles Pârouaîssiales pour ou contre la réforme d's Êtats, et 64 pour chent votîdrent en faveur, et 36 pour chent contre. Lé 17 Févri 1948, la réforme fut adoptée par Les Êtats mèmes. Auprès les r'formes, les Juges fûdrent rempliaichis par douze Sénateurs, et les Recteurs n'avaient pus l'drouait d'siégi dans L's Êtats, et les v'là don mins à la porte étout, et rempliaichis par les vingt-huit Députés êlus par châque pâraisse. Les Connêtabl'yes y sont tréjous mais y'a même cèrtaines gens tchi veulent les fliantchi à la porte étout! Lé Douoyen siège et peut pâler mais pas voter.J'avons, don, chinquante-trais membres êlus; douze Sénateurs (six êlus touos les trais ans), à ch't heu vingt-neuf Députés d'pâraisse êlus touos les trais ans et les douze Connêtabl'yes tchi, ieux étout, sont êlus par lus pâraisses pouor eune période dé trais ans.

Les Jurés-Justiciers sont êlus par un Collège Êlectoral à ch't heu à la pliaiche d'êt' êlus par lé peupl'ye. Ch'tait l'pus grand honneu pour un Jèrriais d'êt' êlu Juge par les vouaix dé toute l'île auprès d'longues années d'sèrvice comme Connêtabl'ye ou d'tchique aut' poste, mais ch'n'est pus la mème chose.

L'Français et l'Angliais sont acouo les deux langues officielles dans l's Êtats et jusqu'ès preunmiéthes années d'chu siècl'ye nou ouïyait touos les dêbats en Français. Nou fait tréjous la priéthe en haut Français et les votes 'pour' ou 'contre' sont exprinmés en Français. Mais tchiquefais cèrtains des membres étant d'vrais Jèrriais patriotiques, font sèrvi lus langue matèrnelle - ch'est à dithe - lé Jèrriais.