Les Pages Jèrriaises

UNE DÉPUTATION.


Dans iune de nos pâraisses d'amont
Vêtchu un certain Tom La Fond,
Un bouan garçon a chein qu'nou ouai,
Qu'àvait de tout temps fait san d'vai.
Offici d'police à djaix-huit ans,
Chinq ans opprès un Surveillant
Et comme il 'tait solide gaillard
Nou l'mins Chant'nyi quatre ans pus tard.

Jamais n'vouli monter pus haut
Mais ses amins disaient "I' faut."
J'allons l'nommer not'e Connaîtablye,
J'n'avons pas d'homme aussi capablye,
Mais jamais Tom vouli céder
Ch'tait inutile de l'persuader.
"Ne m'tracassez don pas la vie
Laissez mé trantchille j'vos en prie."

Ils avaient biau l'êtibotchi,
I'resti ferme comme un rotchi,
Mais che n'tait raique pour un p'tit d'temps.
Les Députés au but d'trais ans
D'vaient r'être êlus ou rempliaichis.
Le sien sortant lus dit, "Cherchiz
Un autre candidat s'ou voulez
Quant à mé j'en ai leu assez!"

La pâraisse dît, "Faut qu'nou ramasse
Un candidat d'une certaine classe,
Des candidats? Et ouest qu'i'sont?
Y'en a pas d'autre que Tom La Fond!"
Alors un jour les Inspecteurs,
Les Chant'niers et Monsieur l'Recteur,
S'en furent siez Tom pour li d'mander
De s'laissi nommer Député.

Ah ça, man Tom, je sommes venus
Té dithe chute feis n'y a pas de r'fus;
Les êlecteurs si fient sus té
Pour rempliaichi not'e Député.
Tom lus dit qu'i n'en voulait rain
Mais les Messieux l'fliattithent si bain
Qu'i vinrent à li touaner la tête
Et Tom cédi à lus rétchête.

Une si importante situation
Méthite bain une députation.
C'est pourtchi Tom j'veindrons siéz té
En grande tenue Mardi au sé,
Ne te dêrange pas, ch'n'est pas la peine
Je ne s'rons pas fort pus d'une trentaine
Dis à ta femme, j'pouvons nos grée
D'un mio d'gâche et d'une tassée d'thée.

Tom s'en fut trouver Isabelle
Et li annonci la grand'nouv'elle,
I's'attendait qu'ou f'thait du train
Mais lyi ou tappit des deux mains
Et s'écryi: "Que j'sis heutheuse
Je m'en vais-t-i' étre ordgilleuse;
Tu s'ras "Moussieu" et mé "Madame"
Ne t'en va pas r'fuser, man Tom.

I'n' y eut pas grand dormi la nièt
Car comme un moulin à cliantchèt,
Isabelle n'cessit pas san d'vis
Ou plianni ses prépathâtis.
Comme ou disait "Des tasses de thée?
Tout ch'la est bon, mais j'allons vaie
Que dans des patheilles situations
Nou n'fait pas d'même siez les La Fond.

Ou dit à s'n homme qu'ou s'en allait
Ramasser tout ch'qu'i' lus fallait;
D'la gâche, du vin et des litcheurs,
D'la limonade pour le Recteur.
Tom d'vait aller avec le querre
Sièz sa belle-soeur cherchi des verres,
Partie des siens étaient bûchis
Et n'avaient pas 'té rempliaichis.

Quand Mardi vint, ou pouvez craithe
Que tout l'ménage 'tait en affaithe,
Une rangie d'bouteilles sus l'drécheux,
Et toutes les chaises minses dans l'parleux.
A chinq heuthes Tom s'en fut à haut
S'râser et s'laver comme i' faut,
Changi sa c'minse et san corsèt
Qu'Isabelle avait mins sus l'lièt.

A sept heuthes juste la clioche sonni;
Ch'tait la servante qui raîponni,
Ou fit entrer touos les messieux
Et les fit passer dans l'parleux,
Tom entri au but d'tchiques instants,
Souôlevant de grands applaudissements.
De l'assistance i' fit la ronde,
Et châtchi d'main avec tout l'monde.

Ch'tait l'Recteur qui fut l'porte-vouaix;
I'toûssoti un couplye d'fais,
Et dit comme ch'la "Moussieu La Fond
Ou savez bain pourtchi qu' je v'nons,
V'chin en deux mots la position;
Pour éviter une êlection,
Ch'est tout le désir des électeurs
Qu'ou nos fachiez une grande faveur."

"Not'e Député à décliathé
Qu'il est malade, bétôt pathé,
Et nos dit qu'i' n'est pus tchestion,
Qu'i r'entreprenne une autre gestion,
Alors, je nos sommes réunis,
Et tout l'monde est du méme avis,
N'y a bain seux pas deux opinions,
L'homme qu'i' nos faut ch'est Tom La Fond!"

Il est vrai qu'y en a qui disent
Qu'ou n'étes pas souvent à l'églyse,
Je vos y ai veu tchiquefais pourtant
Dans l'temps qu'ous étiez Surveillant
Et j'espèthe que pus tard, "you know,"
Ou r'veindrez r'joindre man p'tit troupeau,
Mais ch'la peut tréjous s'distchuter
"Une feis qu'ou s'sez not'e Député."

Isabelle, par tchuthiositè,
S'n ouotheille collèe au creux d'la cliè,
Ouï bain tout l'monde se mettre à rithe,
Pensi, "Tch'est qu'Tom s'en va lus dithe?
Il a d'la becque quand j'sommes touos seurs?
Mais dans la présence du Recteur
S'en va aheuqueter comme un sot,
Et finitha par ne dithe mot."

I' n'y a pas d'doute Tom 'tait nerveux,
Mais malgré ch'la, i' dit, "Messieux,
Je sis bain liain d'être orateur
Mais faut qu' je r'mercie not'e Recteur
De tout ch'qu'il a dit a m'n êgard;
J'n'en méthite pas la pus p'tite part.
Ses beIIes patholes m'ont touchi l'tchoeu.
Ou m'faites, Messieux une grande honneu."

Je n'sis pas digne d'une patheille chose
Mais puisque ous insistez, j'suppose
Qu'i faut bain que j'diche oui, bouannes gens."
(Une vouaix, "Hear Hear!") (applaudissements)
"Je n'promets pas d'faithe des mithaclyes,
Mais j'garantis d'mettre tout obstaclye
A touos les siens qui cherchethont
D'bouleverser not'e constitution.

Si vaint dans tchique temps des bandits
Nos d'mander des chinq chents mille louis,
J'lus raipondrai, "Arrête un mio!
Je lève la Clameur de Haro!"
Maintenant Messieux, je voudrais craithe
Qu'ous allez prendre une fais à baithe,
Ou m'extchus'sez pour tchiques instants
Que j'ordonne des rafraîchissements."

Isabelle, entrant dans l'parleux
Fut applaudie par les Messieux
Ch'tait l'moment l'pus heutheux d'sa vie.
Oulle 'tait visiblement touchie.
Le Recteur dit quand tout fut prêt
"Messieux, attention si vos pliaît
Viédgons un "bumper" jusqu'au fond!
A "Moussieu" et "Madame" La Fond!"

 

Vèrsion modèrnîsée:

 


EUNE DÉPUTÂTION


Dans ieune dé nos pâraisses d'amont
Vêtchut un cèrtain Tom La Fond,
Un bouôn garçon à chein qu'nou ouait,
Tch'avait dé tout temps fait san d'ver.
Offici d'police à dgiêx-huit ans,
Chînq ans auprès un Seurvilyant
Et comme i' 'tait solide gaillard
Nou l'mînt Chent'nyi quatre ans pus tard.

Janmais n'voulit monter pus haut
Mais ses anmîns disaient "I' faut."
J'allons l'nommer not' Connêtabl'ye,
J'n'avons pas d'homme aussi capabl'ye,
Mais janmais Tom voulit céder
Ch'tait innutile dé l'pèrsuader.
"Né m'tracassez don pas la vie
Laîssiz-mé trantchil'ye j'vos en prie."

Il' avaient bieau l'êtibotchi,
I' restit fèrme comme un rotchi,
Mais ché n'tait raîque pour un p'tit d'temps.
Les Députés au but d'trais ans
D'vaient r'être êlus ou rempliaichis.
Lé sien sortant lus dit, "Chèrchiz
Un aut' candidat s'ou voulez
Quant à mé j'en ai ieu assez!"

La pâraisse dît, "Faut qu'nou ramâsse
Un candidat d'eune cèrtaine clâsse,
Des candidats? Et où'est qu'i' sont?
Y'en a pas d'aut' qué Tom La Fond!"
Alors un jour les Înspecteurs,
Les Chent'nièrs et Moussieu l'Recteu,
S'en fûtent siez Tom pour lî d'mander
Dé s'laîssi nommer Député.

Assa, man Tom, jé sommes vénus
Té dithe chutte fais n'y a pas dé r'fus;
Les êlecteurs s'y fient sus té
Pour rempliaichi not' Député.
Tom lus dit qu'i' n'en voulait rein
Mais les Mêssieux l'fliattîtent si bein
Qu'i' vîntent à lî touônner la tête
Et Tom cédit à lus rétchête.

Eune si împortante situâtion
Méthite bein une députâtion.
Ch'est pourtchi, Tom, j'veindrons siez té
En grande ténue Mardi au sé,
Né t'dêrange pas, ch'n'est pas la peine
Jé n's'sons pas fort pus d'eune trentaine.
Di à ta femme, j'pouvons nos graie
D'un mio d'gâche et d'eune tâssée d'thée.

Tom s'en fut trouver Isabelle
Et li'annoncit la grande nouvelle,
I' s'attendait qu'ou f'thait du train
Mais lyi ou tapit des deux mains
Et s'êcriyit: "Qué j'sis heutheuse
Jé m'en vais-t-i' être ordgilleuse;
Tu s'sas "Moussieu" et mé "Madanme".
Né t'en va pas r'fuser, man Tom.

I' n'y'eut pas grand dormi la niet
Car comme un moulîn à cliantchet,
Isabelle n'cêssit pas san d'vis:
Ou pliannit ses prépathâtis.
Comme ou disait "Des tâsses dé thée?
Tout ch'la est bouon, mais j'allons vaie
Qu'dans des pathelles situâtions
Nou n'fait pas d'même siez les La Fond."

Ou dit à s'n homme qu'ou s'en allait
Ramâsser tout ch'qu'i' lus fallait;
D'la gâche, du vîn et des litcheurs,
D'la limonnade pour lé Recteur.
Tom d'vait aller auvec lé quèrre
Siez sa belle-soeu chèrchi des vèrres,
Partie des siens étaient bûchis
Et n'avaient pas 'té rempliaichis.

Quand Mardi vînt, ou pouvez craithe
Qué tout l'ménage 'tait en affaithe,
Eune rangie d'boutelles sus l'drécheux,
Et toutes les tchaîses mînses dans l'parleux.
À chîntch' heuthes Tom s'en fut à haut
S'râser et s'laver comme i' faut,
Changi sa c'mînse et san corset
Qu'Isabelle avait mîns sus l'liet.

À sept heuthes juste la clioche sonnit;
Ch'tait la sèrvante tchi rêponnit,
Ou fit entrer touos les mêssieux
Et les fit pâsser dans l'parleux,
Tom entrit au but d'tchiques înstants,
Souôl'vant de grands appliaudissements.
Dé l'assistance i' fit la ronde,
Et châtchit d'main auvec tout l'monde.

Ch'tait l'Recteu tchi fut l'porte-vouaix;
I' toûssotit un coupl'ye d'fais,
Et dit comme ch'la "Moussieu La Fond,
Ou savez bein pourtchi qu'jé v'nons,
V'chîn en deux mots la position;
Pour êviter eune êlection,
Ch'est tout lé d'si des êlecteurs
Qu'ou nos faichiez eune grande faveur."

"Not' Député à dêcliathé
Qu'il est malade, bétôt pathé,
Et nos dit qu'i' n'est pus tchestchion,
Qu'i r'entréprenne eune aut' gestion,
Alors, jé nos sommes rêunnis,
Et tout l'monde est du même avis,
N'y'a bein seux pas deux opinnions,
L'homme tch'i' nos faut ch'est Tom La Fond!"

Il est vrai qu'y'en a tchi disent
Qu'ou n'êtes pas souvent à l'églyise,
Jé vos y'ai veu tchiquefais pourtant
Dans l'temps qu'ous êtiez Seurvilyant
Et j'espéthe qué pus tard, "you know,"
Ou r'veindrez r'jouaindre man p'tit troupeau,
Mais ch'la peut tréjous s'distchuter
"Eune fais qu'ou s'sez not' Député."

Isabelle, par tchuthiôsité,
S'n ouothelle collée au creux d'la clié,
Ouït bein tout l'monde sé mettre à rithe,
Pensit, "Tch'est qu'Tom s'en va lus dithe?
Il a d'la becque quand j'sommes touos seurs
Mais dans la présence du Recteur
S'en va aheuqu'ter comme un sot,
Et finnitha par né dithe mot."

I' n'y'a pas d'doute Tom 'tait nèrveux,
Mais malgré ch'la, i' dit, "Mêssieux,
Jé sis bein liain d'être orateur
Mais faut qu'j'èrmercie not' Recteur
Dé tout ch'qu'il a dit à m'n êgard;
J'n'en méthite pas la pus p'tite part.
Ses belles patholes m'ont touchi l'tchoeu.
Ou m'faites, Mêssieux, eune grande honneu."

Jé n'sis pas dîngne d'eune pathelle chose
Mais puisque ous însistez, j'suppose
Qu'i' faut bein qué j'diche oui, bouonnes gens."
(Eune vouaix, "Hear Hear!") (appliaudissements)
"Jé n'promets pas d'faithe des mithacl'yes,
Mais j'garantis d'mettre tout obstacl'ye
À touos les siens tchi chèrchéthont
D'boulevèrser not' constitution.

Si veint dans tchique temps des bandits
Nos d'mander des chîn chents mille louis,
J'lus rêpondrai, "Arrête un mio!
Jé lève la Clameur de Haro!"
Maintenant Mêssieux, jé voudrais craithe
Qu'ous allez prendre eune fais à baithe,
Ou m'extchûs'sez pour tchiques înstants
Qué j'ordonne des rafraîchissements."

Isabelle, entrant dans l'parleux
Fut appliaudie par les Mêssieux
Ch'tait l'moment l'pus heutheux d'sa vie.
Ou 'tait visibliément touchie.
Lé Recteur dit quand tout fut prêt
"Mêssieux, attention s'i' vos pliaît
Viédgons un "bumper" jusqu'au fond!
A "Moussieu" et "Madanme" La Fond!"

 

Viyiz étout:

 

Les Pages Jèrriaises