San Antonio, Texas,
U.S.A.
Lé 31 d'janvyi, 1970.
Moussieu l'Rédacteu,
J'ai ieu la chance chutte sémaine. J'ai r'chu trais gâzettes de Jèrri! La cheinne du onze dézembre est v'nue la preunmièthe, et comme la dreine èrchue au c'menchement d'chu mais 'tait du vîngt d'novembre, j'mé d'mandais tch'était dév'nu des gâzettes du 27 novembre et 4 dézembre quand, à ma grand' jouaie, l'porteux d'lettres m'a présenté ches deux-là en mème temps!
Comme jé n'sai pon 'couo tch'est tch'a gangni l's êlections pour Députés, j'ai pensé en viyant la cheinne du onze dézembre qué j'allais vaie les rêsultats, mais j'ai 'té d'sappointé. J'tais quand-même intérêssi dans l'articl'ye d'fond au sujet, et j'sis absolûment du même avis qué ché s'sait danmage dé vaie un fliotchet d'Députés êlus en blio pour érprésenter eune cèrtaine section d'la populâtion. Y'en a tchi s'appellent "Démocratiques". Ches gens-là ont-i' janmais rêalisé tch'i' y'a toutes sortes d'intèrprétêtions pour dithe tch'est qué l'mot démocratique veurt dithe? Eune chose èrmèrquabl'ye est qu'les Russes et les Chinnouais l'aiment hardi, chu mot-là, et tchi'i' n'y a pon rein d'pus autocratique qué lus gouvernéments! Nouos Êtats n'sont pon là pour lé bénéfice d'un cèrtain parti ou groupe dé pèrsonnes. I' sont là pour lé bein et l'gouvèrnément d'tout l'monde!
V'la tchi m'amuse tréjous quand j'vai l's ardgûments qu'un ouvriyi n'peut pon affaûrder à siégi dans L's Êtats. Pour tchi raison tch'i' veurt y'être? Sé donner pus d'gages? Ou pus d'sou pour mains d'heuthes dé travas? Eune fais assis dans La Chambre Législative i' n'li prendrait pon longtemps à dêcouvri qu'la législation est eune affaithe tchi couvre un tas d'tèrrain, et qué l'bein-être dé l'entchi d'l'Île est dé pus grand împortance qué l's ambitions d'cèrtains îndividus ou d'partis! Et les gens tchi lus pliaingnent qué ch'est des conmèrçants et des gens d'bein tchi siégent dans L's Êtats f'thaient-i' mus s'i' y'étaient ieuxmêmes? I' dév'thaient êt' èrconnaîssants tch'i' y'a assez d'ches mêssieux-là tchi sont prêts à donner lus temps pour rein pour donner lus temps pour rein pour donner un parlément îndépendant à l'Île!
Si j'tais en Jèrri et qué j'pâl'lais d'partis politiques, y'en a sans doute tchi m'dithaient - et auve raison - qué j'mé sis tréjous vanté d'êt' du parti du Louothi à St. Ouën! Ch'est vrai. Ch'tait eune affaithe dé fanmile quand j'tais mousse. À mais qu'les pathents fûssent des vieaux, nou 'tait nés dans eune fanmile dé Louothièrs ou d'Rôsièrs, et ch'tait eune affaithe d'honneu d'êt' louoya au parti d'la fanmile. Mais l'affaithe n'allait pon pus liain qu'la pâraisse. I' s'trouvait tréjous des gens d'qualité comme candidats - comme i' s'en trouve acouo aujourd'aniet, et des gens comme les mêssieux L'Chèr, d'Auvèrgne, Ph'lippe John Le Feuvre, Francis Ph'lippe Hâcou et san fis George, Francis Le Boutilyi et James Le Bro, ouaithe tch'il' 'taient Louothièrs ou Rôsièrs en temps d'êlection, èrprésentaient touos les parouaissiens en affaithes dé pâraisse et dans L's Êtats. Jé n'mentionne pon les dreins Connêtabl'yes viyant qu'les partis 'taient dans l's oubliettes quand il' ont 'té êlus, mais i' sont des gens d'qualité comme lus prédécesseurs.
Enfîn, jé n'sai pon tch'est tch'a gangni l's êlections ouaithe qué nouos v'là quâsi dans l'mais d'févri, mais la préchaine gâzette qué j'èrchév'thai m'donn'na les rêsultats, et i' faut qué j'pâciente en attendant.
Y'en ati' à liéthe des délibéthâtions dans L's Êtats, quand nou r'chait trais gâzettes en même temps! Ieune des choses tchi m'frappe est l'couothage du Sénateu Cyril Lé Mèrquand. Il a à combattre touos les présidents d'conmités. I' lus faut des sou pour toutes sortes d'bésouains et d'entréprînses, et touos l's ans il est oblyigi d'êprouver à les faithe dêpenser mains et d'vèrti La Chambre qué les gros dêpens n'peuvent pon continnuer sans aver à augmenter la taxâtion. L'appèrchu d'à ch't heu est formidabl'ye! Ch'est des millions d'louis. Quand j'tais mousse, chent mille louis éthait 'té êpouvantabl'ye! Lé temps d'l'appèrchu dans L's Êtats m'fait tréjous penser au Juge Francis Vibert Le Feuvre dé mémouaithe respectée, lé p'pèe à Mdlle. Député Enid Le Feuvre. Les Juges siégeaient dans La Chambre dans san vivant, et il aimait hardi à êpinnotchi les chiffres suggéthés par les conmités pour lus dêpenses. I' laissait la délibéthâtion continnuer jusqué présqu'à sa fîn sans dithe un mot, et pis justément d'vant l'appel nominal i' disait san p'tit but et v'là tchi m'ttait tchiquesfais l'bâton dans les reux. Comme mé disait eune fais l'Sieur Edmond Delaquaine dans san vivant "Lé Juge Le Feuvre est malin comme eune chouette!" Ches bouans vièrs Jèrriais-là avaient apprîns à couoyer dès lus p'tits jours, et i' n'oubliyaient pon qu'ch'est l'publyi tchi fournis les sou qué L's Êtats dêpensent!
George d'La Forge
Viyiz étout: