Saint Mâlo (en Gallo: Saent-Malo; en Bréton: Sant-Maloù) est eune ville en Brétangne dans l'dêpartément d'Ille-et-Vilaine.
Saint Mâlo est bein fanmeux pouor sa ville enmuthaillie tchi soulait êt' eune fausse-île d'vant la bâtithie des caûchies tchi l'ont lié à la grand' tèrre.
Achteu la c'meune dé Saint Mâlo est composée des villes à l'entou d'l'engoulême d'la riviéthe Ranche tchi 'tait dans les touos vièrs temps l'tèrritouaithe des Coriosolites tch'avaient lus capitale à Reginca (pus tard Aleth). Les Romains contchéthîtent tout chu pays, mais l'islet restait sans habitants.
Au 7e siècl'ye un Chrêtchien Gallouais tch'avait nom Mâlo vînt d'meuther sus l'islet et d'vînt l'preunmié êvêque dé Saint Mâlo. Ch't' êvêtchie 'tait ieune des neuf êvêtchies d'Brétangne tchi sont la fondâtion du pays.
La ville d'Aleth fut attatchie par les Nouormands et au 12e siècl'ye l'islet fut fortifié et d'pis chu temps-là la ville enmuthailli a 'té un centre dé conmèrce, dé pêque et d'aventuthe. Jacques Cartier fut né à Saint Mâlo et ses viages fûtent lanchis d'ilo. Des navidgants d'Saint Mâlo bâptîsîtent les Îles Malouinnes (Îles Falkland). La caûchie d'Saint Mâlo atchilyait des corsaithes.
Duthant la S'gonde Dgèrre Mondiale la ville fut passecrite par lé bombardément d's Améthitchains. Auprès la dgèrre la ville fut r'bâtie.
Des batchieaux et des batchieaux à vaituthes d'l'Angliétèrre et d's Îles d'la Manche vont et veinnent à la caûchie auve des pâssagièrs et des cartchaîsons.
Viyiz étout: